തിരുവനന്തപുരം: ലഹരി ഉപയോഗിച്ച് സ്കൂളിലെത്തിയ 20 കാരൻ സ്കൂൾ അധ്യാപകനെയും വിദ്യാർത്ഥികളെയും ആക്രമിച്ചു. തിരുവനന്തപുരം വർക്കലയിലാണ് സംഭവം. ഹരിഹരപുരം സെന്റ് തോമസ് യുപി സ്കൂളിലാണ് ആക്രമണം ഉണ്ടായത്.
തോണിപ്പാറ സ്വദേശിയായ രഞ്ജിതാണ് സ്കൂളിൽ അക്രമം നടത്തിയത്. ലഹരിയിലായിരുന്ന യുവാവ് സ്കൂൾ കുട്ടികളെ വിളിക്കാൻ എത്തിയ വാഹനങ്ങൾ ആദ്യം അടിച്ച് തകർക്കുകയായിരുന്നു. ആക്രമണം തടയാൻ ചെന്ന പ്രധാന അധ്യാപകനെയും യുവാവ് ആക്രമിച്ചു.
പിന്നാലെ സ്കൂളിൻറെ ജനൽ ചില്ലകൾ അടിച്ചു തകർത്തു. യുവാവിനൊപ്പം മറ്റു രണ്ടു യുവാക്കൾ കൂടി സ്കൂളിലെത്തിയിരുന്നു. ഇവർ ബൈക്കിൽ സ്കൂളിൽ എത്തിയ ശേഷമാണ് അക്രമം നടത്തിയത്. രഞ്ജിത്തിനെ പൊലീസ് പിന്നീട് അറസ്റ്റ് ചെയ്തു.
