ദക്ഷിണ റെയില്വേക്ക് കീഴിലുള്ള ലോക്കോ പൈലറ്റുമാര് വിവിധ ആവശ്യങ്ങള് ഉന്നയിച്ച് ഇന്ന് അനിശ്ചിതകാല സമരം ആരംഭിക്കും. ഓള് ഇന്ത്യ ലോക്കോ റണ്ണിങ് സ്റ്റാഫ് അസ്സോസിയേഷനാണ് സമരത്തിന് നേതൃത്വം നല്കുന്നത്.
ദക്ഷിണ റെയിൽവേയിലെ പാലക്കാട്, തിരുവനന്തപുരം, സേലം, ചെന്നൈ, തിരുച്ചിറപ്പള്ളി, മധുര ഡിവിഷനുകളിലെ രണ്ടായിരത്തോളം ലോക്കോ പൈലറ്റുമാരാണ് ഇന്ന് മുതൽ സമരത്തിന് ഇറങ്ങുക. അതേസമയം ട്രെയിൻ ഗതാഗതം നിർത്തിയുള്ള സമരമല്ല നടത്തുന്നതെന്ന് അസോസിയേഷൻ അധികൃതർ വ്യക്തമാക്കിയിട്ടുണ്ട്.
ഒറ്റയടിക്ക് 10 മണിക്കൂറിൽ കൂടുതൽ ജോലി ചെയ്യില്ലെന്നും തുടർച്ചയായി 2 രാത്രികളിൽ കൂടുതൽ ട്രെയിൻ ഓടിക്കില്ലെന്നുമാണ് തീരുമാനം. 48 മണിക്കൂറിനകം ആസ്ഥാനത്തേക്ക് മടങ്ങിയെത്താൻ കഴിയണം. ആഴ്ചയിൽ 30 മണിക്കൂർ വിശ്രമം ലഭിക്കണം തുടങ്ങിയ ആവശ്യങ്ങളുന്നയിച്ചാണ് സമരം നടത്തുന്നത്. ആവശ്യങ്ങള് നടപ്പാക്കിയില്ലെങ്കില് ജോലി സമയം കഴിഞ്ഞാലുടന് അധികജോലി ചെയ്യാതെ വണ്ടി നിര്ത്തി പോകുമെന്നാണ് മുന്നറിയിപ്പ്.
ഓരോ വർഷവും പുതിയ ട്രെയിനുകൾ വരുന്നുണ്ടെങ്കിലും 2018 നു ശേഷം പുതിയ ലോക്കോ പൈലറ്റുമാരുടെ നിയമനം നടന്നിട്ടില്ല. തിരുവനന്തപുരം ഉള്പ്പെടെ 21 റെയില്വേ റിക്രൂട്ട്മെന്റ് ബോര്ഡിന് കീഴില് 5696 അസി. ലോക്കോപൈലറ്റുമാരെ നിയമിക്കുമെന്ന് റെയില്വേ വ്യക്തമാക്കിയിരുന്നു. ദക്ഷിണ റെയില്വേയില് 218 ഒഴിവുകളാണുള്ളത്. ജനുവരി 20 മുതല് ഫെബ്രുവരി 19 വരെ അപേക്ഷകൾ സ്വീകരിച്ചിരുന്നു. എന്നാല് മാസം മൂന്നു കഴിഞ്ഞിട്ടും തുടര്നടപടികള് ഒന്നും ഉണ്ടായില്ലെന്നാണ് ഉയരുന്ന ആരോപണം.
