തിരുവനന്തപുരം: അടിവയറ്റിലെ കൊഴുപ്പു മാറ്റാനായി ശസ്ത്രക്രിയ നടത്തിയതിനു പിന്നാലെ അണുബാധയേറ്റ് യുവതിയുടെ വിരലുകള് മുറിച്ചുമാറ്റി. വനിതാ സോഫ്റ്റ്വെയര് എന്ജിനീയറായ മുട്ടത്തറ ശ്രീവരാഹം ഹിമം വീട്ടില് പത്മജിത്തിന്റെ ഭാര്യ എം.എസ്. നീതു (31) വാണ് ഗുരുതരാവസ്ഥയിലായത്.
നീതുവിന്റെ ഇടതു കൈകാലുകളിലെ വിരലുകൾ സ്വകാര്യ ആശുപ്രതിയില് ശസ്ത്രക്രിയയിലൂടെ മുറിച്ചു മാറ്റുകയായിരുന്നു. കഴക്കൂട്ടം അരശുംമൂട്ടില് പ്രവര്ത്തിക്കുന്ന ‘കോസ്മറ്റിക് ഹോസ്പിറ്റല്’ എന്ന സ്വകാര്യ സൗന്ദര്യ ചികിത്സാ കേന്ദ്രത്തില് വെച്ചാണ് നീതു ശസ്ത്രക്രിയ നടത്തിയത്. ഫെബ്രുവരി 22ന് നീതുവിന് ശസ്ത്രക്രിയ നടത്തുകയും 23നു ഡിസ്ചാര്ജ് ആവുകയും ചെയ്തു.
എന്നാൽ വീട്ടില് എത്തിയ നീതുവിന് ഉച്ചയോടെ അമിത ക്ഷീണം ഉണ്ടാവുകയും ക്ലിനിക്കിലെ ഡോക്ടറെ ഫോണില് വിളിച്ചു വിവരം അറിയിക്കുകയും ചെയ്തു. ഉപ്പിട്ട് കഞ്ഞിയും വെള്ളവും കുടിക്കാനായിരുന്നു ഡോക്ടർ നിർദേശിച്ചത്. തുടർന്ന് രാത്രിയോടെ അവശയായ നീതുവിനെ 24ന് ക്ലിനിക്കില് എത്തിച്ചു പരിശോധന നടത്തി.
രക്തസമ്മര്ദം കുറഞ്ഞെന്നും മറ്റും പറഞ്ഞ് ക്ലിനിക്കിലെ ഡോക്ടര് തന്നെ സ്വന്തം നിലയ്ക്കു നഗരത്തിലെ സ്വകാര്യ ആശുപത്രിയില് എത്തിക്കുകയും അവിടെ വച്ച് ഹൃദയാഘാതം സംഭവിച്ചതായി പറഞ്ഞു തീവ്രപരിചരണ വിഭാഗത്തില് പ്രവേശിപ്പിക്കുകയും ചെയ്തു. പരിശോധനയില് ആന്തരിക അവയവങ്ങളില് അണുബാധയുണ്ടായതായി കണ്ടെത്തിയതിനെ തുടര്ന്നു 21 ദിവസമാണ് നീതു വെന്റിലേറ്ററില് കഴിഞ്ഞത്.
ഡയലാസിസിനു വിധേയമായി കഴിയുന്ന നീതുവിന്റെ ഇടതുകാലിലെ ആര്ട്ടറി ബ്ലോക്കായതിനെ തുടര്ന്നു പാദത്തിലേക്കുള്ള രക്തയോട്ടം കുറഞ്ഞു ചലനശേഷി നഷ്ടമായി. സംഭവത്തിൽ നീതുവിന്റെ ഭര്ത്താവ് പൊലീസ് കമ്മിഷണര്ക്കു നല്കിയ പരാതിയുടെ അടിസ്ഥാനത്തിൽ തുമ്പ പോലീസ് സ്ഥാപനത്തിനെതിരെ കേസെടുത്തിട്ടുണ്ട്.
10 ലക്ഷം രൂപയാണ് ചികിത്സയ്ക്കായി ഇതിനോടകം ചെലവായതെന്നും നീതുവിന്റെ കുടുംബം പറയുന്നു. മെഡിക്കല് എസ്റ്റാബ്ലിഷ്മെന്റ് ലൈസന്സ് ഇല്ലെന്നു കണ്ടെത്തിയതിനെ തുടര്ന്ന് സ്ഥാപനത്തിന് നോട്ടിസ് നല്കി അടപ്പിച്ചെന്നു കഴക്കൂട്ടം പൊലീസ് അറിയിച്ചു.
എന്നാൽ മെഡിക്കല് ബോര്ഡ് രൂപീകരിച്ച് അന്വേഷണം നടത്തി റിപ്പോര്ട്ട് നല്കണമെന്ന് ആവശ്യപ്പെട്ട് കഴക്കൂട്ടം അസി.കമ്മിഷണര് ജെ.കെ. ദിനില് ജില്ലാ മെഡിക്കല് ഓഫിസര്ക്കു കത്തു നല്കിയിട്ടും മെഡിക്കല് ബോര്ഡ് രൂപീകരിക്കാന് അധികൃതര് തയാറായിട്ടില്ല. മുഖ്യമന്ത്രി, ആരോഗ്യമന്ത്രി, കലക്ടര് എന്നിവര്ക്കും നല്കിയ പരാതികള് തുടര് നടപടിക്കായി ഡിഎംഇ ഓഫിസിലേക്ക് കൈമാറി ആഴ്ചകളായിട്ടും നടപടിയില്ലെന്നു നീതുവിന്റെ അച്ഛന് ആരോപിച്ചു.
