കൊച്ചി: നിറത്തിന്റെ പേരിൽ ജോലി നിഷേധിക്കപ്പെട്ടു എന്ന വെളിപ്പെടുത്തലുമായി യുവതി. സ്വാതി എന്ന യുവതിയാണ് സോഷ്യൽമീഡിയയിൽ പങ്കുവെച്ച വീഡിയോയിലൂടെ നിറത്തിന്റെ പേരിൽ നേരിടേണ്ടി വന്ന വിവേചനത്തെ പറ്റി വെളിപ്പെടുത്തിയത്.
സ്റ്റുഡന്റ് കൗൺസിലർ തസ്തികയിലേക്ക് താൻ തെരഞ്ഞെടുക്കപ്പെട്ടെന്നും എന്നാൽ പിന്നീട് താൻ വേണ്ടത്ര വെൽകമിങ് അല്ലെന്നും മുഖത്തിന് തിളക്കമില്ലെന്നും ആരോപിച്ച് ജോലി നിഷേധിക്കുകയാണുണ്ടായതെന്നും സ്വാതി പറയുന്നു. ഇവർ പങ്കുവെച്ച വീഡിയോ വളരെ പെട്ടെന്നാണ് സൈബറിടങ്ങളിൽ വൈറലായത്.
യുവതി പറയുന്നത് ഇങ്ങനെയാണ്: ഇന്നലെ ഞാൻ ഒരു ഇന്റർവ്യൂവിന് പോയി. ഇന്ന്, ജോലിയുടെ പ്രൊഫൈൽ എന്താണെന്ന് സംസാരിക്കുന്നതിന് വേണ്ടി അവർതന്നെ എന്നെ വിളിക്കുകയും ചെയ്തിരുന്നു. ഒരു സ്റ്റുഡന്റ് കൗൺസിലർ പൊസിഷനിലേക്കാണ് ഞാൻ അപേക്ഷിച്ചിരുന്നത്.
എന്നെ സെലക്ട് ചെയ്ത ഒരാൾ ഉണ്ടായിരുന്നു, പിന്നെ എല്ലാം വിശദീകരിച്ചിരുന്ന ഒരു സ്ത്രീ കൂടി അവിടെ ഉണ്ടായിരുന്നു- എന്താണ് ജോലി, എങ്ങനെയാണത് ചെയ്യുക, എന്താണ് പ്രതീക്ഷിക്കുന്നത് എന്നെല്ലാം അവർ വിശദീകരിച്ചു.
എങ്ങനെയാണ് ജോലി ചെയ്യുന്നത് എന്ന് അറിയുന്നതിന് വേണ്ടി അവർ എന്നെ കുറച്ചുനേരം നിരീക്ഷിച്ചു. കുറച്ച് സമയത്തിന് ശേഷം, എന്നെ ഒരു ക്യാബിനിലേക്ക് വിളിച്ചു, ആ സ്ത്രീ പറഞ്ഞത്, ‘നിങ്ങൾക്ക് ഈ ജോലിക്കുള്ള യോഗ്യത ഇല്ലെന്ന് ഞാൻ കരുതുന്നു’ എന്നാണ്.
നിങ്ങളുടെ വസ്ത്രധാരണം ഞങ്ങൾക്ക് ഇഷ്ടമായില്ല. വേണ്ടത്ര വെൽകമിങ് അല്ല. ഞങ്ങൾ ആഗ്രഹിക്കുന്ന തിളക്കം (ഗ്ലോ) നിങ്ങളുടെ മുഖത്തില്ല. ഈ ജോലിക്ക് തങ്ങൾ ആഗ്രഹിക്കുന്ന എന്തോ ഒന്ന് നിങ്ങളുടെ രൂപത്തിൽ ഇല്ല.
അത് നിറത്തെ കുറിച്ചല്ല, മുഖത്തെ തിളക്കത്തെ കുറിച്ചാണ് എന്നും അവർ പറഞ്ഞുവെന്നും സ്വാതി പറയുന്നു. എങ്ങനെ പ്രതികരിക്കണം എന്ന് തനിക്ക് മനസിലായില്ലെന്നും യുവതി പറയുന്നു.
ചെറുപ്പം മുതൽ നിറത്തിന്റെ പേരിൽ ചില വേർതിരിവുകൾ താൻ അനുഭവിക്കുന്നുണ്ടെന്നും സ്വാതി പറയുന്നു. ഇരുണ്ട നിറമുള്ളവളാണ് എന്ന് ചെറുപ്പത്തിൽ പലരും തന്നോട് പറഞ്ഞിട്ടുണ്ട് എന്നും യുവതി പറയുന്നു.
നിരവധിപ്പേരാണ് യുവതിയുടെ വീഡിയോയ്ക്ക് കമന്റുകളുമായി എത്തിയത്. നിങ്ങൾ എങ്ങനെയാണോ ഇരിക്കുന്നത് അങ്ങനെ തന്നെ നിങ്ങൾ ഭംഗിയുള്ളവളാണ് എന്നാണ് ഏറെപ്പേരും കമന്റ് ചെയ്തിരിക്കുന്നത്. അതേസമയം, അവരുദ്ദേശിച്ചത് നിറത്തെയല്ല എന്ന് കമന്റ് നൽകിയവരും ഉണ്ട്.
