യുപിഐ സേവനങ്ങൾ തകരാറിലായതിനെ പിന്നാലെ വാട്സാപ്പിലും തടസ്സം നേരിട്ടതായി ഉപയോക്താക്കൾ. പലർക്കും സ്റ്റാറ്റസുകൾ ഇടനോ ഗ്രൂപ്പുകളിൽ മെസേജുകൾ അയക്കാനോ കഴിയുന്നില്ല, ചിലർക്ക് കോളുകൾ ചെയ്യാനും പറ്റുന്നില്ലെന്നാണ് പരാതി. ആഗോളതലത്തിൽ തകരാർ നേരിടുന്നുവെന്നാണ് വിവരം.
ഇന്ത്യയിൽ രാത്രി 8.10 മുതലാണ് പ്രശ്നം ആരംഭിച്ചത്. അതേസമയം സാങ്കേതിക തകരാറിനെ കുറിച്ച് വാട്സാപ്പ് വൃത്തങ്ങൾ പ്രതികരിച്ചിട്ടില്ല. സംഭവത്തിൽ വ്യാപക പരാതി ആണ് ഉയരുന്നത്. ഇന്ന് പകൽ ഏകീകൃത പേയ്‌മെന്റ് ഇന്റർഫേസ് (യുപിഐ) സേവനങ്ങൾ തടസപ്പെട്ടിരുന്നു. ഇതിന് പിന്നാലെയാണ് ഇപ്പോൾ വാട്സാപ്പും പണിമുടക്കിയത്.
യുപിഐ ആപ്പുകൾ പ്രവ‌ർത്തനരഹിതമായതോടെ ഓൺലെെൻ പണമിടപാടുകൾ വ്യാപകമായി താറുമാറായി. ഫോൺ പേ, ഗൂഗിൾ പേ, പേടിഎം തുടങ്ങിയവ വഴി പണം കെെമാറ്റം നടക്കുന്നില്ലെന്നാണ് പരാതി ഉയർന്നത്.
ഒരു മാസത്തിനുള്ളിൽ ഇത് മൂന്നാം തവണയാണ് വ്യാപകമായി യുപിഐ സേവനങ്ങളിൽ തടസ്സമുണ്ടാകുന്നത്. ഇന്ന് ഉച്ചയ്ക്ക് 12 മണിയോടെയാണ് സംഭവം. ഈ സമയത്ത് പേടിഎം, ഫോൺപേ, ഗൂഗിൾ പേ ഉപയോക്താക്കൾക്ക് യുപിഐ പേയ്‌മെന്റുകൾ നടത്താൻ കഴിഞ്ഞില്ല.
