തിരുവനന്തപുരം: കേരളത്തിൽ വിവിധ ജില്ലകളില് താപനില ഉയരുമെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്.
ഇന്ന് കോട്ടയം, പാലക്കാട്, തൃശൂര് ജില്ലകളില് താപനില 37 ഡിഗ്രി സെല്ഷ്യസ് വരെ ഉയരുമെന്നാണ് മുന്നറിയിപ്പില് പറയുന്നത്.
തിരുവനന്തപുരം, കൊല്ലം, പത്തനംതിട്ട, ആലപ്പുഴ, എറണാകുളം, മലപ്പുറം, കോഴിക്കോട്, കണ്ണൂര്, കാസര്കോട് തുടങ്ങിയ ജില്ലകളില് 36 ഡിഗ്രി സെല്ഷ്യസ് വരേയും താപനില ഉയരാന് സാദ്ധ്യതയുണ്ടെന്നാണ് കാലാവസ്ഥാ വകുപ്പിന്റെ മുന്നറിയിപ്പില് പറയുന്നത്.
ഉയര്ന്ന താപനിലയും ഈര്പ്പമുള്ള വായുവും കാരണം ഈ ജില്ലകളില്, മലയോര മേഖലകളിലൊഴികെ, ചൂടും അസ്വസ്ഥതയുമുള്ള കാലാവസ്ഥയ്ക്ക് സാദ്ധ്യതയുണ്ടെന്നാണ് മുന്നറിയിപ്പ്.
അതേസമയം, വിവിധ ജില്ലകളില് ഏപ്രില് 15ന് ഒറ്റപ്പെട്ടയിടങ്ങളില് ഇടിമിന്നലോടുകൂടിയ ശക്തമായ മഴയ്ക്കും സാദ്ധ്യതയുണ്ടെന്നും കാലാവസ്ഥാ വകുപ്പിൻ്റെ പ്രവചനത്തില് പറയുന്നു.
അതോടൊപ്പം മണിക്കൂറില് 30 മുതല് 40 കിലോമീറ്റര് വരെ വേഗതയില് ശക്തമായ കാറ്റിനും സാധ്യതയുണ്ടെന്നാണ് മുന്നറിയിപ്പ്.
നാളെ മുതല് 18/04/2025 വരെ ഇടിമിന്നലോടു കൂടിയ മഴയ്ക്കും സാദ്ധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു.
തെക്കന് ജില്ലകളിലെ മലയോര മേഖലകളിലാകും കൂടുതല് മഴയ്ക്ക് സാദ്ധ്യതയുള്ളത്. ഇവിടെശക്തമായ കാറ്റിനും ഇടിമിന്നലിനും സാദ്ധ്യതയുണ്ട്.
കള്ളക്കടല് പ്രതിഭാസത്തിന്റെ ഭാഗമായി തിരുവനന്തപുരത്തെ കാപ്പില് മുതല് പൂവാര് വരെയുള്ള തീരങ്ങളില് 0.9 മുതല് 1.0 മീറ്റര് വരെയും കന്യാകുമാരി തീരത്ത് 1.3 മുതല് 1.4 മീറ്റര് വരെയും ഉയര്ന്ന തിരമാലയ്ക്കും സാദ്ധ്യതയുണ്ട്.
കടലാക്രമണത്തിന് സാദ്ധ്യതയുള്ളതിനാല് തീരദേശവാസികളും മത്സ്യത്തൊഴിലാളികളും ജാഗ്രത പാലിക്കണമെന്നും മുന്നറിയിപ്പുണ്ട്.
