കൊച്ചി: നടന്‍ ഷൈൻ ടോം ചാക്കോയ്‌ക്കെതിരെ നടി വിൻസി അലോഷ്യസ് നൽകിയ ലഹരി പരാതി ഒത്തുതീർപ്പിലേക്ക് എന്ന് വിവരം. താൻ നേരിട്ട ബുദ്ധിമുട്ടാണ് പറഞ്ഞതെന്നും പരാതിയില്ലെന്നും വിൻസി ഐസിസിയെ അറിയിച്ചു. സംഭവത്തിൽ ഷൈൻ ടോം ചാക്കോ ഖേദം പ്രകടിപ്പിച്ചെന്നുമാണ് വിവരം.
ഇരുവരും ചർച്ചക്ക് ശേഷം കൈ കൊടുത്ത് ആണ് പിരിഞ്ഞത്. സിനിമയുമായി സഹകരിക്കുമെന്ന് ഷൈനും വിൻസിയും അറിയിച്ചിട്ടുണ്ട്. ഐസിസി റിപ്പോർട്ട് ഉടൻ കൈമാറും.
അതേസമയം, ഷൈൻ ടോം ചാക്കോ പ്രതിയായ ലഹരി കേസിൽ പൊലീസിന്റെ തുടർനടപടികൾ നീളും. തെളിവുകൾ ഇല്ലാത്തതിനാൽ ഷൈനെ വീണ്ടും ചോദ്യം ചെയ്യുന്നതിൽ കാര്യമില്ലെന്നാണ് പൊലീസിന്റെ വിലയിരുത്തൽ. ലഹരി പരിശോധനാ ഫലം വരാൻ രണ്ടുമാസം കഴിയും.
കൂടാതെ കസ്റ്റഡിയിലെടുത്ത ഫോണുകളുടെ ഫോറെൻസിക് പരിശോധന ഫലവും വൈകുമെന്നാണ് വിവരം. എപ്പോൾ വിളിച്ചാലും ഹാജരാകാമെന്ന് ഷൈൻ അറിയിച്ചതിനാൽ തിടുക്കം കാണിക്കേണ്ട എന്ന തീരുമാനത്തിലാണ് പോലീസ്.
