അഭിഷേകിനൊപ്പം ഓപ്പണറായി വൈഭവ് സൂര്യവംശി എത്തും; പ്രഖ്യാപനം മാർച്ച് 27 ന് ശേഷം
അണ്ടർ 19 ലോകകപ്പ് ഫൈനലിൽ ചരിത്ര റെക്കോർഡ് പ്രകടനം കാഴ്ചവെച്ച വൈഭവ് സൂര്യവംശിക്ക് ഇന്ത്യൻ സീനിയർ ടീമിലേക്കുള്ള വഴി ഇനി അധികം ദൂരെയല്ല. ഐസിസിയുടെ പ്രായപരിധി സംബന്ധിച്ച നിയമമാണ് ഇതുവരെ താരത്തിന് തടസമായിരുന്നത്.
എന്നാൽ 2026 മാർച്ച് 27 കഴിഞ്ഞാൽ ആ നിയമതടസം മാറും. നിലവിലെ ഫോം തുടർന്നാൽ, മാർച്ച് 27ന് ശേഷം തന്നെ വൈഭവ് ഇന്ത്യൻ സീനിയർ ടീമിൽ ഇടം നേടാൻ സാധ്യതയുണ്ടെന്ന വിലയിരുത്തലാണ് ക്രിക്കറ്റ് വൃത്തങ്ങളിൽ ശക്തമാകുന്നത്.
അണ്ടർ 19 ലോകകപ്പ് ഫൈനലിൽ ഇന്ത്യയുടെ സ്കോറിങ്ങിന് വേഗം നൽകിയതിൽ നിർണായക പങ്കുവഹിച്ചത് ഓപ്പണറായി ഇറങ്ങിയ വൈഭവിന്റെ തീപ്പൊരി ബാറ്റിങായിരുന്നു.
ഇംഗ്ലണ്ടിനെതിരായ ഫൈനലിൽ 80 പന്തിൽ 175 റൺസാണ് വൈഭവ് അടിച്ചുകൂട്ടിയത്. 15 സിക്സും 15 ഫോറും ഉൾപ്പെട്ട ഈ ഇന്നിങ്സിൽ, ഓടിയെടുത്ത റൺസ് വെറും 25 മാത്രമായിരുന്നു.
അണ്ടർ 19 ലോകകപ്പ് ഫൈനലിലെ ഏറ്റവും ഉയർന്ന വ്യക്തിഗത സ്കോറെന്ന റെക്കോർഡും ഇതോടെ വൈഭവ് സ്വന്തമാക്കി. ടൂർണമെന്റിൽ ആകെ 30 സിക്സുകളാണ് താരം പറത്തിയത്. ദക്ഷിണാഫ്രിക്കൻ താരം ഡെവാൾഡ് ബ്രെവിസിന്റെ റെക്കോർഡും വൈഭവ് മറികടന്നു.
അണ്ടർ 19 ലോകകപ്പിൽ കാഴ്ചവെച്ച തകർപ്പൻ ഫോമിന് പിന്നാലെ വൈഭവിനെ ഇന്ത്യൻ സീനിയർ ടീമിൽ ഉടൻ ഉൾപ്പെടുത്തണമെന്ന് ഒരു വിഭാഗം ക്രിക്കറ്റ് ആരാധകർ ആവശ്യപ്പെട്ടിരുന്നു. എന്നാൽ ഐസിസിയുടെ മിനിമം പ്രായപരിധി സംബന്ധിച്ച ചട്ടമാണ് താരത്തിന്റെ മുന്നേറ്റത്തിന് തടസമായത്.
ഐസിസി ചട്ടപ്രകാരം, ഒരു ക്രിക്കറ്റ് താരത്തിന് രാജ്യാന്തര മത്സരം കളിക്കാൻ കുറഞ്ഞത് 15 വയസ് പൂർത്തിയായിരിക്കണം. യുവ താരങ്ങളുടെ ശാരീരികവും മാനസികവുമായ ആരോഗ്യ സംരക്ഷണം ലക്ഷ്യമിട്ട് 2020ലാണ് ഈ നിയമം പ്രാബല്യത്തിൽ വന്നത്.
2011 മാർച്ച് 27-നാണ് വൈഭവ് സൂര്യവംശിയുടെ ജനനം.
നിലവിൽ 14 വയസാണ് പ്രായം. അതിനാൽ 2026 മാർച്ച് 27 കഴിഞ്ഞാൽ മാത്രമേ അദ്ദേഹത്തിന് ഇന്ത്യൻ സീനിയർ ടീമിലേക്ക് തിരഞ്ഞെടുക്കപ്പെടാനുള്ള പ്രായപരമായ അർഹത ലഭിക്കൂ.
എന്നാൽ ആ തീയതി കഴിഞ്ഞാൽ, നിലവിലെ മികവ് പരിഗണിച്ച് വൈഭവിന് ഉടൻ തന്നെ ദേശീയ ടീമിൽ അവസരം ലഭിക്കാനിടയുണ്ടെന്നാണ് വിലയിരുത്തൽ.
അതേസമയം, അണ്ടർ 19 ക്രിക്കറ്റിൽ വൈഭവിന് മുന്നിലുള്ള വഴിയിലും നിയന്ത്രണങ്ങളുണ്ട്. 2026 അണ്ടർ 19 ലോകകപ്പിലെ മികച്ച താരമായിരുന്നെങ്കിലും, പ്രായപരിധി അനുസരിച്ച് 2028ലെയും 2030ലെയും അണ്ടർ 19 ലോകകപ്പ് ടൂർണമെന്റുകളിൽ വൈഭവിന് കളിക്കാൻ കഴിയില്ല.
ഇവിടെ തിരിച്ചടിയാകുന്നത് ബിസിസിഐ പിന്തുടരുന്ന ‘വൺ–ടൂർണമെന്റ്’ നയമാണ്. ഒരു താരത്തിന് ഒരേയൊരു അണ്ടർ 19 ലോകകപ്പ് ടൂർണമെന്റിൽ മാത്രമേ അവസരം നൽകൂ എന്നതാണ് ഈ നയം.
കൂടുതൽ പുതിയ പ്രതിഭകൾക്ക് തുടർച്ചയായി അവസരം നൽകുന്നതിനായാണ് ബിസിസിഐ ഈ സമീപനം സ്വീകരിച്ചിരിക്കുന്നത്.
എന്നാൽ അണ്ടർ 19 ക്രിക്കറ്റിലെ വഴികൾ അടയുമ്പോഴും, മാർച്ച് 27 കഴിഞ്ഞാൽ സീനിയർ ടീമിലേക്കുള്ള വാതിൽ തുറക്കുമെന്ന പ്രതീക്ഷയിലാണ് ഇന്ത്യൻ ക്രിക്കറ്റ് ആരാധകർ.
English Summary
Vaibhav Suryavanshi, who created history with a record-breaking 175-run knock in the Under-19 World Cup final, is likely to become eligible for the Indian senior team after March 27, 2026. ICC rules currently restrict him due to the minimum age requirement of 15 years. With his outstanding form, selectors may consider him for the senior side once the age barrier is cleared.
vaibhav-suryavanshi-eligible-for-india-senior-team-after-march-27
Vaibhav Suryavanshi, Under 19 World Cup, Indian cricket, ICC age rule, India senior team, youth cricket, record innings, BCCI policy
