ഓച്ചിറ: യുവാവിനെ സോഡാകുപ്പി ഉപയോഗിച്ച് കുത്തി പരിക്കേൽപ്പിച്ചയാളെ പൊലീസ് പിടികൂടി. ഓച്ചിറ പായിക്കുഴി ത്രീ റോസസ് ഹൗസിൽ ആരീസ് മുഹമ്മദ് ആണ് ഓച്ചിറ പൊലീസിന്റെ പിടിയിലായത്.
കായംകുളം പുതുപ്പള്ളി സ്വദേശി നവാസിനെ (37) ആണ് സോഡാ കുപ്പി ഉപയോഗിച്ചു കുത്തിയത്. ഞായറാഴ്ച രാത്രി 11.30ഓടെയാണ് സംഭവം നടന്നത്. ഓച്ചിറ രാഗം ജങ്ഷനിലെ കടയിലെത്തിയ ആരീസ് അവിടെയിരുന്ന സോഡാകുപ്പി എറിഞ്ഞുടക്കുകയും ഇത് സമീപത്ത് നിന്ന നവാസ് ചോദ്യം ചെയ്യുകയും ചെയ്തതോടെ ഇരുവരും തമ്മിൽ വാക്കേറ്റമുണ്ടാവുകയും പൊട്ടിച്ച സോഡാ കുപ്പിയുമായി ആരീസ് നവാസിനെ ആക്രമിക്കുകയുമായിരുന്നു.
പലയിടങ്ങളിലായി ആഴത്തിൽ മുറിവേറ്റതിനെ തുടർന്ന് 48 തുന്നലുകളാണ് നവാസിന്റെ ശരീരത്തിൽ ഇടേണ്ടിവന്നത്. എസ്.ഐമാരായ റെനോക്സ്, സുനിൽ, എസ്.സി.പി.ഒ രാഹുൽ, സി.പി.ഒമാരായ കനീഷ്, അനീസ് എന്നിവരടങ്ങിയ സംഘമാണ് പ്രതിയെ പിടികൂടിയത്.
