ഭുവനേശ്വർ: ചികിത്സയെന്ന പേരിൽ യുവതിയുടെ തലയിൽ സൂചികൾ കുത്തിയിറക്കിയ മന്ത്രവാദി പിടിയിൽ. ഒഡീഷയിലെ ബലംഗീർ ജില്ലയിലാണ് സംഭവം. The man who inserted needles into the woman’s head was arrested

സംഭവത്തിന് പിന്നാലെ ​ഗുരുതരാവസ്ഥയിലായ യുവതിയെ ആശുപത്രിയിൽ പ്രവേശിപ്പിച്ചു. സന്തോഷ് റാണ എന്നയാളാണ് അറസ്റ്റിലായത്. ആരോ​ഗ്യ പ്രശ്നങ്ങളുണ്ടായിരുന്ന യുവതിയെ ചികിത്സയ്ക്കായി യുവതിയുടെ ബന്ധുക്കൾ തന്നെയാണ് മന്ത്രവാദിയുടെ അടുത്തെത്തിച്ചത്.

കഴിഞ്ഞ നാല് വർഷമായി യുവതിക്ക് പലതരത്തിലുള്ള ആരോഗ്യ പ്രശ്നങ്ങൾ ഉണ്ടായിരുന്നു. വൈദ്യസഹായം തേടിയിട്ടും നില മെച്ചപ്പെടാത്തതിനെ തുടർന്ന് മന്ത്രവാദിയുടെ സഹായം തേടാൻ കുടുംബാംഗങ്ങൾ നിർബന്ധിക്കുകയായിരുന്നു.

ചികിത്സാവിധി എന്ന പേരിൽ മന്ത്രവാദിയായ സന്തോഷ് റാണ യുവതിയെ ഒരു മുറിയിലേക്ക് കൊണ്ടുപോയി. ഒരു മണിക്കൂറിന് ശേഷം യുവതിയെ പുറത്ത് കൊണ്ടുവന്നു. പിന്നീട്, യുവതി തുടർച്ചയായി അസ്വസ്ഥതകൾ പ്രകടിപ്പിക്കുകയായിരുന്നു. പരിശോധനയിൽ മാതാപിതാക്കൾ തന്നെ സൂചികൾ കണ്ടെത്തി. മകളുടെ തലയിൽ നിന്ന് 8 സൂചികൾ നീക്കം ചെയ്തതായി യുവതിയുടെ പിതാവ് പറഞ്ഞു.

തുടർന്ന് യുവതിയെ ആശുപത്രിയിൽ പ്രവേശിപ്പിച്ചു. സിടി സ്കാനിങ്ങിന് വിധേയയാക്കിയപ്പോൾ തലയിൽ 10 സൂചികൾ കൂടി കുത്തിയതായി കണ്ടെത്തി. മന്ത്രവാദത്തിനിടെ മകൾ ബോധരഹിതയായി വീണുവെന്നും അതിനാൽ സൂചി കുത്തിയതിനെ കുറിച്ച് അറിയില്ലായിരുന്നുവെന്നും യുവതിയുടെ പിതാവ് പറഞ്ഞു. യുവതിയുടെ മാതാപിതാക്കളുടെ പരാതിയെ തുടർന്നാണ് മന്ത്രവാദിയെ പൊലീസ് അറസ്റ്റ് ചെയ്തത്