താലിബാൻ ഡല്ഹിയില് സ്ഥിരം നയതന്ത്ര പ്രതിനിധിയെ നിയമിച്ചു
ഡൽഹി: ഡൽഹിയിലെ അഫ്ഗാൻ എംബസിയിൽ താലിബാൻ നയതന്ത്ര പ്രതിനിധിയെ നിയമിച്ചു. താലിബാൻ കാബൂളിന്റെ നിയന്ത്രണം ഏറ്റെടുത്ത് ഏകദേശം അഞ്ച് വർഷങ്ങൾക്ക് ശേഷമാണ് ഡൽഹിയിലെ അഫ്ഗാൻ എംബസിയിൽ സ്ഥിരം നയതന്ത്ര പ്രതിനിധി ചുമതലയേൽക്കുന്നത്.
താലിബാൻ ഭരണകൂടത്തിന്റെ വിദേശകാര്യ മന്ത്രാലയത്തിലെ മുതിർന്ന പ്രതിനിധിയായ മുഫ്തി നൂർ അഹമ്മദ് നൂറാണ് ഡൽഹിയിലെത്തി ചുമതലയേറ്റത്.
ഡൽഹിയിലെ അഫ്ഗാൻ എംബസിയിൽ നിലവിലുള്ള അഫ്ഗാൻ പതാകയും നിലവിലെ ജീവനക്കാരെയും തുടർന്നും നിലനിർത്താനാണ് തീരുമാനം.
താലിബാൻ ഡല്ഹിയില് സ്ഥിരം നയതന്ത്ര പ്രതിനിധിയെ നിയമിച്ചു
ഇത് ഇന്ത്യയും അഫ്ഗാൻ ഭരണകൂടവും തമ്മിലുള്ള നയതന്ത്ര ബന്ധങ്ങളിൽ ഒരു പുതിയ ഘട്ടത്തിന് തുടക്കമാകുന്നതായാണ് വിലയിരുത്തൽ.
താലിബാൻ ഭരണകൂടത്തെ ഇന്ത്യ ഇതുവരെ ഔദ്യോഗികമായി അംഗീകരിച്ചിട്ടില്ലെങ്കിലും, പ്രവർത്തനാത്മകമായ നയതന്ത്ര സഹകരണം ശക്തമാക്കുന്ന സമീപനമാണ് സ്വീകരിച്ചിട്ടുള്ളത്.
താലിബാൻ വിദേശകാര്യ മന്ത്രി അമീർ ഖാൻ മുത്തഖി കഴിഞ്ഞ ഒക്ടോബർ 25-ന് ഡൽഹി സന്ദർശിച്ചതിന് പിന്നാലെയാണ് ഈ വിഷയത്തിൽ ഇന്ത്യയും അഫ്ഗാൻ ഭരണകൂടവും തമ്മിൽ ധാരണയിലെത്തിയത്.
അന്ന് ഇന്ത്യയുടെ വിദേശകാര്യ മന്ത്രി എസ്. ജയശങ്കർ അമീർ ഖാൻ മുത്തഖിയെ സ്വീകരിച്ചിരുന്നു. ഇതിന് പിന്നാലെ ഡൽഹിയിലെ അഫ്ഗാൻ എംബസിയിൽ സ്ഥിരം പ്രതിനിധിയെ നിയോഗിക്കുന്നതിനുള്ള നടപടികൾ വേഗത്തിലായി.
കാബൂൾ ആസ്ഥാനമായ അഫ്ഗാൻ വിദേശകാര്യ മന്ത്രാലയത്തിലെ ആദ്യ പൊളിറ്റിക്കൽ ഡിവിഷന്റെ ഡയറക്ടർ ജനറലാണ് മുഫ്തി നൂർ അഹമ്മദ് നൂർ.
എന്നാൽ ഇതുവരെ ഔദ്യോഗിക നിയമന കത്തുകൾ അദ്ദേഹം ഇന്ത്യക്ക് കൈമാറിയിട്ടില്ല. അതിനാൽ തന്നെ ഇത് പൂർണ നയതന്ത്ര അംഗീകാരമല്ലെന്നും, സാങ്കേതികവും ഭരണപരവുമായ ചുമതലകൾ നിർവഹിക്കുന്ന നിയമനമാണെന്നുമാണ് സൂചന.
2023-ൽ തന്നെ ഡൽഹിയിൽ താലിബാൻ നയതന്ത്രജ്ഞനെ നിയമിക്കാൻ ശ്രമം നടത്തിയിരുന്നെങ്കിലും അഫ്ഗാൻ എംബസിയിലെ ചില ജീവനക്കാർ ഈ നീക്കത്തെ ശക്തമായി എതിർത്തിരുന്നു.
ഇതേ തുടർന്നാണ് അന്ന് തീരുമാനം മാറ്റിവെച്ചത്. പിന്നീട് മുംബൈയിലെ അഫ്ഗാൻ കോൺസുലേറ്റിലേക്ക് നോമിനിയായി ഇക്രമുദ്ദീൻ കാമിലിനെ നിയമിക്കുകയും, ഹൈദരാബാദിലെ കോൺസൽ ജനറലായ മുഹമ്മദ് ഇബ്രാഹിംഖിൽ ഡൽഹിയിൽ ചുമതല ഏറ്റെടുക്കുകയും ചെയ്തിരുന്നു.
ഡൽഹിയിൽ താലിബാന്റെ പുതിയ ഉദ്യോഗസ്ഥൻ എത്തിയതോടെ മുഹമ്മദ് ഇബ്രാഹിംഖിൽ വീണ്ടും ഹൈദരാബാദിലേക്ക് മടങ്ങുമോയെന്ന കാര്യത്തിൽ ഇതുവരെ വ്യക്തത വന്നിട്ടില്ല.
നിലവിൽ ഡൽഹിയിൽ മുംബൈയിലെയും ഹൈദരാബാദിലെയും കോൺസുലർ ഉദ്യോഗസ്ഥർ തുടരുകയാണ്. പുതിയ നിയമനം ഇന്ത്യ–അഫ്ഗാൻ ബന്ധങ്ങളിൽ കൂടുതൽ പ്രായോഗിക സഹകരണത്തിന് വഴിയൊരുക്കുമെന്ന പ്രതീക്ഷയിലാണ് നയതന്ത്ര വൃത്തങ്ങൾ.
