ബഹിരാകാശം മറ്റൊരു വലിയ പൊട്ടിത്തെറിക്ക് സാക്ഷ്യം വഹിക്കാൻ ഒരുങ്ങുന്നു. നിലവിലെ നിരീക്ഷണങ്ങളുടെ അടിസ്ഥാനത്തിൽ 2024 സെപ്റ്റംബർ മാസത്തിൽ സ്ഫോടനം നടക്കുമെന്നാണ് കരുതുന്നത്. ഭൂമിയിൽനിന്ന് കൊണ്ട് കാണാവുന്ന തരത്തിൽ ആയിരിക്കും ഈ സ്ഫോടനം എന്ന് ശാസ്ത്രജ്ഞർ കണക്ക് കൂട്ടുന്നു. (Space is all set to witness another big explosion)
ഇത് വെറുമൊരു കാഴ്ചയല്ല മറിച്ച് വിലപ്പെട്ട ഒരു ശാസ്ത്ര അവസരമാണ്. കൊറോണ ബോറിയലിസ് നക്ഷത്രസമൂഹത്തിൽ സ്ഥിതി ചെയ്യുന്ന T Coronae Borealis (T CrB) എന്ന നക്ഷത്രം ഉടൻ തന്നെ അപൂർവവും അതിശയകരവുമായ ഒരു നോവ സ്ഫോടനത്തിന് വിധേയമാകുമെന്ന് ഗവേഷകർ കരുതുന്നു. T CrB പൊട്ടിത്തെറിച്ചാൽ, ദിവസങ്ങളോളം നഗ്നനേത്രങ്ങൾ കൊണ്ട് കാണാൻ കഴിയുന്നത്ര തിളങ്ങും.
ഈ നക്ഷത്രവ്യവസ്ഥയിൽ രണ്ട് നക്ഷത്രങ്ങൾ അടങ്ങിയിരിക്കുന്നു – ഒരു വെളുത്ത കുള്ളനും ചുവന്ന ഭീമനും. വെളുത്ത കുള്ളൻ നക്ഷത്രം ചുവന്ന ഭീമനിൽ നിന്ന് ഹൈഡ്രജൻ വലിച്ചെടുക്കുന്നു, ഹൈഡ്രജൻ അടിഞ്ഞുകൂടുമ്പോൾ, അത് ഒരു തെർമോ ന്യൂക്ലിയർ സ്ഫോടനത്തിന് കാരണമാകും. 80 വർഷത്തിലൊരിക്കൽ ടി സിആർബിയിൽ ഇത്തരം സ്ഫോടനങ്ങൾ ഉണ്ടാകുന്നതാണ്. അവസാനത്തേത് 1946 ലാണ് ഉണ്ടായത്. പിനീട് ഇത് സംഭവിയ്ക്കാൻ പോകുന്നത് ഈ വർഷമാണ്.
സ്ഫോടനം കണ്ടെത്തുന്നതിന്, വടക്കൻ അർദ്ധഗോളത്തിലെ ഏറ്റവും തിളക്കമുള്ള രണ്ട് നക്ഷത്രങ്ങളായ ആർക്റ്ററസ്, വേഗ എന്നിവയ്ക്കിടയിൽ ഒരു സാങ്കൽപ്പിക രേഖ വരയ്ക്കുക, അത് നിങ്ങളെ T CrB നോവ സ്ഫോടനം നടക്കുന്ന കൊറോണ ബൊറിയലിസിലേക്ക് എത്തിക്കും. ഈ പോയിന്റിൽ നോക്കിയാൽ സ്ഫോടനം കാണാനാവും. നാസയുടെ ഫെർമി ഗാമാ-റേ ബഹിരാകാശ ദൂരദർശിനിയും ജെയിംസ് വെബ് ബഹിരാകാശ ദൂരദർശിനിയും ഉൾപ്പെടെ വിവിധ ദൂരദർശിനികളും ഉപകരണങ്ങളും ഉപയോഗിച്ചാണ് ഇത് കാണാനാവുക.
