യുഎസിൽ സ്ഥിരതാമസത്തിനും ജോലിക്കും ആഗ്രഹിക്കുന്നവർക്ക് ഇനി മുതൽ കൂടുതൽ നിയന്ത്രണങ്ങൾ വരുന്നു. ഗ്രീൻ കാർഡിന് അപേക്ഷിക്കുന്നവരുടെ സമൂഹമാധ്യമ അക്കൗണ്ടുകൾ ഇനിമുതൽ യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് പരിശോധിച്ചേക്കും. രാജ്യസുരക്ഷ ലക്ഷ്യമിട്ടാണ് നീക്കമെന്നാണ് സൂചന.
തീരുമാനം ഇന്ത്യയിൽ നിന്നും മറ്റും യുഎസിലേക്ക് കുടിയേറാൻ ആഗ്രഹിക്കുന്നവരെ പ്രതികൂലമായി ബാധിക്കാൻ സാധ്യതയുണ്ട്.
ഇതിനായുള്ള നിർദേശം യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് സമർപ്പിച്ചതായിട്ടാണ് പുറത്തുവരുന്ന റിപ്പോർട്ടുകൾ.
ഇനി മുതൽ സമൂഹമാധ്യമത്തിലെ വിവരങ്ങൾ ഗ്രീൻ കാർഡിന് നൽകുന്ന അപേക്ഷകളിലെ വിവരങ്ങളുമായി പൊരുത്തപ്പെടണം. അല്ലാത്തപക്ഷം ചിലപ്പോൾ അപേക്ഷ നിരസിക്കുന്നതിന് ഇത് കാരണമാകും.
പൗരത്വം, അഭയം, ഗ്രീൻ കാർഡുകൾ എന്നിവയ്ക്കുള്ള അപേക്ഷാ ഫോമിൽ അപേക്ഷകൻ നൽകുന്ന സമൂഹമാധ്യമ അക്കൗണ്ടുകൾക്കു പുറമെ മറ്റ് അക്കൗണ്ടുകൾ ഉണ്ടോയെന്നും പരിശോധിച്ചേക്കും.
അതുകൊണ്ടുതന്നെ ഗ്രീൻ കാർഡിന് അപേക്ഷിക്കാൻ ആഗ്രഹിക്കുന്നവർ സമൂഹമാധ്യമത്തിലെ പോസ്റ്റുകളിൽ ജാഗ്രത പാലിക്കണം. മുൻപ് സമൂഹമാധ്യമങ്ങളിൽ പങ്കിട്ടിട്ടുള്ള വിവാദപരമായ ഉള്ളടക്കങ്ങൾ നീക്കം ചെയ്യുന്നതാണ് നല്ലതെന്ന് വിദഗ്ധർ അഭിപ്രായപ്പെടുന്നു.
