നനുത്ത കാറ്റുപോലെ വന്ന് ഹൃദയത്തിൽ തൊടുന്ന സിനിമ; ആലുവക്കാരന്റെ തിരിച്ചുവരവ്
തിയേറ്ററുകളിൽ മികച്ച പ്രേക്ഷക പ്രതികരണത്തോടെ പ്രദർശനം തുടരുകയാണ് നിവിൻ പോളിയെ നായകനാക്കി അഖിൽ സത്യൻ സംവിധാനം ചെയ്ത ‘സർവം മായ’.
പ്രേക്ഷകരെ മാത്രമല്ല, സിനിമാ മേഖലയിലെ പ്രമുഖരെയും ചിത്രം ആഴത്തിൽ സ്പർശിച്ചിരിക്കുകയാണ്. സംവിധായകരായ അനുരാജ് മനോഹർ, ദേവദത്ത് ഷാജി, ആനന്ദ് ഏകർഷി, നടന്മാരായ ബേസിൽ ജോസഫ്, അൽത്താഫ് സലിം എന്നിവരടക്കമുള്ളവർ ചിത്രത്തെ വാനോളം പുകഴ്ത്തി രംഗത്തെത്തി.
നനുത്ത കാറ്റുപോലെ വന്ന് ഹൃദയത്തിൽ തൊടുന്ന സിനിമയെന്നാണ് ‘സർവം മായ’യെ അനുരാജ് മനോഹർ വിശേഷിപ്പിച്ചത്. അഖിൽ സത്യന്റെ ‘പാച്ചുവും അത്ഭുതവിളക്കും’ ഏറെ ഇഷ്ടപ്പെട്ട സിനിമയാണെന്നും അതേ പ്രതീക്ഷയോടെയാണ് ടിക്കറ്റ് എടുത്തതെന്നും അദ്ദേഹം പറഞ്ഞു.
നിവിൻ പോളിയുടെ സ്വാഭാവിക അഭിനയവും നർമ്മബോധവും സംവിധായകൻ കൃത്യമായി ഉപയോഗിച്ചുവെന്നും, നിവിൻ–അജു വർഗീസ് കൂട്ടുകെട്ട് സിനിമയുടെ രസച്ചരടിനെ മുറുക്കുന്നുവെന്നും അനുരാജ് അഭിപ്രായപ്പെട്ടു.
മലയാള സിനിമയിൽ ശക്തമായൊരു നായികാ കഥാപാത്രം കൂടി ഉറച്ചുനിൽക്കുന്നതായി പറഞ്ഞ അദ്ദേഹം റിയ ഷിബുവിന്റെ പ്രകടനത്തെയും അഭിനന്ദിച്ചു. വലിയ പുഞ്ചിരിയോടെയാണ് തിയേറ്ററിൽ നിന്നിറങ്ങിയതെന്ന് ബേസിൽ ജോസഫ് പറഞ്ഞു.
നിവിൻ തന്റെ കഴിവിന്റെ പരമാവധി അനായാസമായി പ്രേക്ഷകരിലേക്ക് എത്തിക്കുന്നത് കാണുന്നത് സന്തോഷകരമാണെന്നും, അജു വർഗീസും തന്റെ കഥാപാത്രം കുറ്റമറ്റ രീതിയിൽ അവതരിപ്പിച്ചുവെന്നും ബേസിൽ പറഞ്ഞു.
റിയ ഷിബുവിന്റെ പ്രകടനം അതിശയിപ്പിച്ചുവെന്നും, ഈ ക്രിസ്മസിനെ ഊഷ്മളമാക്കിയതിന് ‘സർവം മായ’യ്ക്കും സംവിധായകൻ അഖിലിനും നന്ദിയുണ്ടെന്നും അദ്ദേഹം കൂട്ടിച്ചേർത്തു. സംഗീത സംവിധായകൻ ജസ്റ്റിൻ പ്രഭാകരനോടും പ്രത്യേക അഭിനന്ദനം അറിയിച്ചു.
ലളിതവും സത്യസന്ധവും ആനന്ദകരവുമായ സിനിമകളാണ് മലയാളത്തിന് കൂടുതൽ ആവശ്യമെന്നും ബേസിൽ അഭിപ്രായപ്പെട്ടു.
ലളിതവും സന്തോഷകരവും ഒരേസമയം രസകരവുമായി നിൽക്കുന്ന സിനിമ സൃഷ്ടിക്കുക എളുപ്പമല്ലെന്നും അഖിൽ സത്യൻ അത് ഇളംകാറ്റുപോലെ കൈവരിച്ചുവെന്നും സംവിധായകൻ ആനന്ദ് ഏകർഷി പറഞ്ഞു.
കുറേ നാളായി മലയാള സിനിമയിൽ നിന്നു നഷ്ടപ്പെട്ട ആ ലളിതമായ ആലിംഗനമാണ് ‘സർവം മായ’യെന്നും, നിവിന്റെ സ്ക്രീൻ സാന്നിധ്യം അതിശയകരമാണെന്നും അദ്ദേഹം വ്യക്തമാക്കി.
യഥാർത്ഥ അദ്ഭുതം റിയ ഷിബുവാണെന്നും, എഴുതാനും അവതരിപ്പിക്കാനും ബുദ്ധിമുട്ടുള്ള കഥാപാത്രം അവർ അതിമനോഹരമായി അവതരിപ്പിച്ചുവെന്നും ആനന്ദ് ഏകർഷി പറഞ്ഞു.
മികച്ച സിനിമകൾ സൗഹൃദത്തിൽ നിന്നാണ് പിറക്കുന്നതെന്നതിന്റെ തെളിവാണ് ഈ ചിത്രമെന്ന് അൽത്താഫ് സലിം പറഞ്ഞു.
നിവിൻ പോളി ഒരു ക്രൗഡ് പുള്ളറായും എന്റർടെയ്നറായും ശക്തമായി തിരിച്ചുവന്നുവെന്നും ‘അടിച്ചു അണ്ണാ ബ്ലോക്ക്ബസ്റ്റർ’ എന്നുമായിരുന്നു സംവിധായകനും തിരക്കഥാകൃത്തുമായ ദേവദത്ത് ഷാജിയുടെ പ്രതികരണം.
ജനാർദ്ദനൻ, രഘുനാഥ് പലേരി, മധു വാര്യർ, അൽത്താഫ് സലിം, പ്രീതി മുകുന്ദൻ തുടങ്ങിയവരെ ഉൾപ്പെടുത്തി വലിയ താരനിരയാണ് ചിത്രത്തിൽ അണിനിരക്കുന്നത്.
ഫയർഫ്ലൈ ഫിലിംസിന്റെ ബാനറിൽ അജയ്യ കുമാറും രാജീവ് മേനോനും ചേർന്നാണ് നിർമ്മാണം. എഡിറ്റിംഗ്: അഖിൽ സത്യൻ, രതിൻ രാധാകൃഷ്ണൻ. സിനിമറ്റോഗ്രഫി: ശരൺ വേലായുധൻ.
English Summary
‘Sarvam Maya’, directed by Akhil Sathyan and starring Nivin Pauly, is continuing its successful theatrical run with overwhelming appreciation from audiences and industry insiders alike.
sarvam-maya-nivin-pauly-film-industry-praise
sarvam maya, nivin pauly, akhil sathyan, malayalam cinema, movie review, industry response, basil joseph, ria shibu
