പാലക്കാട്: തെരഞ്ഞെടുപ്പ് കണ്‍വെന്‍ഷനില്‍ നിന്ന് ബിജെപി സംസ്ഥാന കമ്മിറ്റി അംഗം സന്ദീപ് വാര്യര്‍ ഇറങ്ങിപ്പോയി. എന്‍ഡിഎ സ്ഥാനാര്‍ഥി സി. കൃഷ്ണകുമാറിന്റെ തെരഞ്ഞെടുപ്പ് കണ്‍വെന്‍ഷനിടെയാണ് സംഭവം. ഇ. ശ്രീധരന്‍ ആണ് ചടങ്ങ് ഉദ്‌ഘാടനം ചെയ്തത്.(Sandeep Warrier walked out from BJP convention)

മറ്റൊരു ചടങ്ങില്‍ പങ്കെടുക്കാനുണ്ടെന്ന് പറഞ്ഞാണ് സന്ദീപ് വാര്യര്‍ ഇറങ്ങിപ്പോയത്. എന്നാൽ പ്രാധാന്യം ഇല്ലാത്ത നേതാക്കള്‍ക്ക് അടക്കം സീറ്റ് നല്‍കി തനിക്ക് സീറ്റ് നല്‍കിയില്ലെന്നതാണ് സന്ദീപിന്റെ പിണക്കത്തിന് കാരണമെന്നാണ് സൂചന. അതേസമയം ഇക്കാര്യത്തില്‍ സന്ദീപ് പ്രതികരിച്ചിട്ടില്ല.

സംഭവത്തെ തുടർന്ന് സന്ദീപ് വാര്യരെ അവഗണിച്ചിട്ടില്ലെന്ന് ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍ പ്രതികരിച്ചു. ”സന്ദീപ് വാര്യരെ ഹൃദയത്തില്‍ ചേര്‍ത്തുനിര്‍ത്തിയതേ ഉള്ളൂ. എന്‍ഡിഎ കണ്‍വെന്‍ഷനില്‍ വേദിയിലിരുന്നത് പ്രധാന ചുമതലക്കാര്‍ മാത്രമാണ്. ചെറിയ ചെറിയ കാര്യങ്ങള്‍ ഊതി പെരുപ്പിക്കുകയാണെന്നും ബിജെപിയില്‍ ആശയക്കുഴപ്പം ഉണ്ടാക്കാന്‍ നോക്കേണ്ടെന്നും കെ സുരേന്ദ്രന്‍ പറഞ്ഞു.