ഹൈപ്പർടെൻഷൻ മരുന്നായ റിൽമെനിഡിൻ പ്രായമാകുന്നത് മന്ദഗതിയിലാക്കുമെന്ന് ഗവേഷകർ. ഇതുസംബൻസിദ്ധിച്ച് വിരകളിൽ നടത്തിയ പരീക്ഷണങ്ങളാണ് വിജയം കണ്ടിരിക്കുന്നത്. ഇത് മനുഷ്യരിലും സമാനമായ ഫലങ്ങൾ ഉണ്ടാക്കാനുള്ള സാധ്യത ഏറെയാണെന്ന് വിദഗ്ദർ അഭിപ്രായപ്പെടുന്നു. യുകെയിലെ ബർമിംഗ്ഹാം സർവകലാശാലയിലെ മോളിക്യുലർ ബയോജെറന്റോളജിസ്റ്റ് ജോവോ പെഡ്രോ മഗൽഹെസ് പറയുന്നതനുസരിച്ച്, മൃഗങ്ങളിൽ ഈ മരുന്ന് ആയുസ്സ് വർദ്ധിപ്പിക്കുന്നതായി കണ്ടെത്തി. ജനുവരിയിലെ ഒരു പഠനത്തിൽ, ഉയർന്ന രക്തസമ്മർദ്ദത്തിന് സാധാരണയായി ഉപയോഗിക്കുന്ന റിൽമെനിഡിൻ ഉപയോഗിച്ച് ചികിത്സിക്കുന്ന വിരകൾ, കലോറി നിയന്ത്രണത്തിന്റെ ഫലങ്ങളോട് സാമ്യമുള്ള ദീർഘായുസ്സും മെച്ചപ്പെട്ട ആരോഗ്യനിലയും പ്രദർശിപ്പിച്ചു.
(ഇത് ഗവേഷണത്തെ അടിസ്ഥാനമാക്കിയുള്ള വിവരം മാത്രമാണ്, സ്ഥിരീകരണമല്ല. അതിനാൽ ഇത്തരം മരുന്നുകൾ സ്വയം വാങ്ങി കഴിയ്ക്കുന്നത് വലിയ അപകടത്തിന് കാരണമാകും. )
റിൽമെനിഡിൻ മനുഷ്യരിലും വാർദ്ധക്യം കുറയ്ക്കുമോ?
ഈ കണ്ടെത്തലുകൾ മനുഷ്യർക്ക് ബാധകമാണോ എന്നും ആരോഗ്യപരമായ അപകടങ്ങൾ ഉൾപ്പെട്ടിട്ടുണ്ടോ എന്നും വ്യക്തമല്ലെങ്കിലും, തീവ്രമായ കലോറി നിയന്ത്രണം കൂടാതെ തന്നെ വാർദ്ധക്യം മന്ദഗതിയിലാക്കാനുള്ള വഴികൾ ഈ കണ്ടുപിടുത്തം വഴി ഉണ്ടാകുമെന്നു ശാസ്ത്രജ്ഞർ പ്രതീക്ഷിക്കുന്നു. എലികളുടെ വൃക്കയിലെയും കരളിലെയും ടിഷ്യൂകളിലെ കലോറി കുറയ്ക്കുന്നതുമായി ബന്ധപ്പെട്ട ജീൻ പ്രവർത്തനത്തെ മരുന്ന് സ്വാധീനിച്ചതായും ഗവേഷണം വെളിപ്പെടുത്തി. റിൽമെനിഡൈന്റെ ഫലപ്രാപ്തിയിൽ നിർണായകമായ നിഷ്-1 എന്ന ബയോളജിക്കൽ റിസപ്റ്ററാണ് വാർദ്ധക്യത്തെ മന്ദഗതിയിലാക്കുന്നതിൽ പ്രധാന പങ്കുവഹിക്കുന്നത് എന്നാണു കണ്ടെത്തൽ.
നിഷ്-1 ഇല്ലാതാക്കുന്നത് മരുന്നിന്റെ പോസിറ്റീവ് ഇഫക്റ്റുകൾ ഇല്ലാതാക്കുകയും റിസപ്റ്റർ പുനഃസ്ഥാപിക്കുകയും റിൽമെനിഡിൻ ചികിത്സയിലൂടെ ആയുസ്സ് വർദ്ധിപ്പിക്കുകയും ചെയ്തു. “നിഷ്-1 ഇല്ലാതാക്കിയപ്പോൾ റിൽമെനിഡൈന്റെ ആയുസ്സ് വർദ്ധിപ്പിക്കുന്ന ഫലങ്ങൾ ഇല്ലാതാക്കിയതായി ഞങ്ങൾ കണ്ടെത്തി,” ഗവേഷകർ അവരുടെ പ്രബന്ധത്തിൽ വിശദീകരിച്ചു. ഗവേഷണം പ്രാരംഭ ഘട്ടത്തിലാണെങ്കിലും, ഈ കണ്ടെത്തലുകൾ ഭാവിയിൽ വാർദ്ധക്യം മദഗതിയിലാക്കാൻ ഈ മെഡിസിൻ ഉപയോഗിക്കാനുള്ള സാധ്യതകളെക്കുറിച്ചുള്ള വലിയ പഠനത്തിനാണ് സാധ്യത നൽകുന്നത്.
NB: മരുന്നുകൾ ഒരിക്കലും സ്വയം തീരുമാനിച്ച് കഴിക്കരുത്. ഗുരുതരമായ അപകടങ്ങൾ ഒഴിവാക്കാൻ ഏതുമരുന്നു കഴിക്കുന്നതിനു മുൻപും ഒരു ഡോക്ടറിന്റെ നിർദേശം പാലിക്കുക.
