മഴയും കാറ്റും; നിർമാണക്കെട്ടിടത്തിൽ നിന്ന് കല്ല് പതിച്ച് റാസൽഖൈമയിൽ മലയാളി യുവാവ് മരിച്ചു
ദുബായ്: യുഎഇയിലെ റാസൽഖൈമയിൽ ശക്തമായ മഴയും കാറ്റും തുടരുന്നതിനിടെ, നിർമ്മാണം നടക്കുന്ന കെട്ടിടത്തിൽ നിന്ന് കല്ല് ദേഹത്ത് പതിച്ച് മലയാളി യുവാവ് മരിച്ചു.
മലപ്പുറം കൊടിഞ്ഞി സ്വദേശിയായ സൽമാൻ ഫാരിസ് (27) ആണ് മരിച്ചത്. ഇന്ന് പുലർച്ചെയായിരുന്നു അപകടം.
കള്ളനെന്നാരോപിച്ച് ആൾക്കൂട്ട മർദ്ദനം; വാളയാറിൽ ഇതര സംസ്ഥാന തൊഴിലാളി മരിച്ചു
അഭയം തേടിയിടത്ത് അപകടം
മഴയും ശക്തമായ കാറ്റും കാരണം സമീപത്തെ നിർമ്മാണം നടക്കുന്ന കെട്ടിടത്തിൽ അഭയം തേടിയതായിരുന്നു സൽമാൻ ഫാരിസ്. ഇതിനിടെയാണ് കെട്ടിടത്തിൽ നിന്നു കല്ല് ദേഹത്ത് പതിച്ചത്.
ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. റാസൽഖൈമയിൽ ഷവർമ കടയിലെ ജീവനക്കാരനായിരുന്നു സൽമാൻ.
റാസൽഖൈമയിൽ വ്യാപക നാശനഷ്ടം
റാസൽഖൈമയിലുടനീളം ശക്തമായ കാറ്റും മഴയും തുടരുകയാണ്. കാറ്റിനെ തുടർന്ന് പല ഭാഗങ്ങളിലും നാശനഷ്ടങ്ങൾ റിപ്പോർട്ട് ചെയ്തിട്ടുണ്ട്. അധികൃതർ ജാഗ്രത നിർദ്ദേശങ്ങൾ പുറപ്പെടുവിച്ചിട്ടുണ്ട്.
ഗൾഫ് രാജ്യങ്ങളിൽ മഴ കനക്കുന്നു
യുഎഇയ്ക്കൊപ്പം സൗദി അറേബ്യ, ഖത്തർ, ഒമാൻ എന്നിവിടങ്ങളിലും ശക്തമായ മഴ തുടരുന്നു. ഖത്തറിലും സൗദിയിലും യുഎഇയിലും വിവിധ ഭാഗങ്ങളിൽ ആലിപ്പഴ വീഴ്ച്ച റിപ്പോർട്ട് ചെയ്തു.
ദുബായിൽ കഴിഞ്ഞ വർഷം ഏപ്രിലിന് ശേഷമുള്ള ഏറ്റവും ശക്തമായ മഴയാണ് അനുഭവപ്പെടുന്നത്. മഴയ്ക്കൊപ്പം ഇടിമിന്നലും ശക്തമായ കാറ്റും തുടരുകയാണ്.
കാലാവസ്ഥാ അസ്ഥിരത കണക്കിലെടുത്ത് ദുബായിൽ നാളെ വർക്ക് ഫ്രം ഹോം പ്രഖ്യാപിച്ചു. ബീച്ചുകളും പാർക്കുകളും അടച്ചിട്ടു. ഗ്ലോബൽ വില്ലേജ് താൽക്കാലികമായി അടച്ചു.
യാത്രക്കാർ അറിയിപ്പുകൾ ശ്രദ്ധിക്കണമെന്ന് ദുബായ് എയർപോർട്ട് നിർദേശം നൽകി.
യുഎഇയിൽ ‘അൽ ബഷായർ’ ന്യൂനമർദ്ദമാണ് മഴയ്ക്ക് കാരണമെന്നാണ് കാലാവസ്ഥാ വകുപ്പ് അറിയിച്ചത്.
English Summary:
A 27-year-old Malayali youth, Salman Faris from Malappuram, died in Ras Al Khaimah after a stone fell on him from a building under construction while he sought shelter from heavy rain and strong winds. The incident occurred amid severe weather conditions across the UAE. Heavy rainfall has also affected Saudi Arabia, Qatar, and Oman, prompting safety advisories, work-from-home announcements in Dubai, and temporary closure of public places.
