രാജാ രവിവര്മയുടെ ‘മോഹിനി’ എന്ന ചിത്രത്തിന് ലേലത്തില് ലഭിച്ചത് 17 കോടി രൂപ. പുണ്ടോള് ഗാലറിയാണ് 36.5 ഇഞ്ച് നീളവും 24.5 ഇഞ്ച് വീതിയുമുള്ള ഈ എണ്ണച്ചായാചിത്രം അടക്കം 71 കലാസൃഷ്ടികള് ലേലത്തില് വിറ്റത്. കാമുകന്റെ വരവും പ്രതീക്ഷിച്ച് ഊഞ്ഞാലാടുന്ന യുവതിയുടെ ചിത്രമാണ് ‘മോഹിനി’. 10 മുതൽ 15 കോടി രൂപ വരെയായിരുന്നു ഈ ചിത്രത്തിന് ഗാലറി വിലയിട്ടിരുന്നത്. എന്നാൽ, ലേലത്തിൽ പങ്കെടുത്ത വ്യക്തി 17 കോടി രൂപയ്ക്കാണ് ചിത്രം സ്വന്തമാക്കിയത്. ആരാണ് ചിത്രം വാങ്ങിയതെന്ന് വ്യക്തമാക്കിയിട്ടില്ല. ഓൺലൈൻ ലേലത്തിൽ ഏറ്റവും കൂടിയവിലയ്ക്ക് വിറ്റുപോയത് ഈ ചിത്രമാണെന്ന് ഗാലറി ഉടമകൾ പറഞ്ഞു.
മുംബൈയില് രവിവര്മ ആരംഭിച്ച പ്രസ് നടത്താനായി ജര്മനിയില് നിന്നെത്തിയ ജര്മന്കാരനായ ഫ്രിറ്റ്സ് ഷ്ളിച്ചറിന്റെ കുടുംബത്തിന്റെ ശേഖരത്തിലുള്ളതാണ് ചിത്രം. നര്ത്തകിയും പാട്ടുകാരിയുമായ അഞ്ജനിബായ് മല്പെക്കറാണ് മോഹിനിക്ക് മോഡലായത്. കഴിഞ്ഞ വർഷം ഫെബ്രവരിയിൽ നടന്ന ലേലത്തിൽ രവിവർമയുടെ ‘യശോദ കൃഷ്ണൻ’ എന്ന ചിത്രം 38 കോടിക്ക് വിറ്റുപോയിരുന്നു.
Read More: വളർത്തു നായയുടെ വേർപാട് താങ്ങാനായില്ല; 12 വയസ്സുകാരി ആത്മഹത്യ ചെയ്തു
Read More: കണ്ണൂരില് ടോറസ് ലോറി സ്കൂട്ടറിലിടിച്ച് അപകടം; സ്കൂട്ടർ യാത്രികന് ദാരുണാന്ത്യം
