എൻജിനീയറിങ് ബുദ്ധി ഉപയോഗിച്ചത് കോപ്പിയടിക്ക്! ഷൂസിനുള്ളിൽ ബ്ലൂടൂത്ത്! 6 പേർ പിടിയിൽ
റായ്പൂർ: ഛത്തീസ്ഗഢ് തലസ്ഥാനമായ റായ്പൂരിൽ ബ്ലൂടൂത്ത് ഉപകരണങ്ങൾ ഉപയോഗിച്ച് ഗേറ്റ് പരീക്ഷയിൽ കൃത്രിമം നടത്താൻ ശ്രമിച്ച ആറ് പേരെ ഛത്തീസ്ഗഢ് പൊലീസ് അറസ്റ്റ് ചെയ്തു.
ഹരിയാനയിൽ നിന്നുള്ള മൂന്ന് എഞ്ചിനീയറിംഗ് ബിരുദധാരികൾ ഉൾപ്പെടെ ആറ് പേരെയാണ് ശനിയാഴ്ച അറസ്റ്റ് ചെയ്തതെന്ന് പൊലീസ് അറിയിച്ചു.
ഡിഡി നഗർ പൊലീസ് സ്റ്റേഷൻ പരിധിയിലുള്ള സരോണയിലെ ION Digital Zone പരീക്ഷാ കേന്ദ്രത്തിലായിരുന്നു സംഭവം.
പരീക്ഷയിൽ കോപ്പിയടിക്കാൻ സാങ്കേതിക ഉപകരണങ്ങൾ ഉപയോഗിച്ചുവെന്ന് റായ്പൂർ ഡെപ്യൂട്ടി പൊലീസ് കമ്മീഷണർ (വെസ്റ്റ് സോൺ) സന്ദീപ് പട്ടേൽ അറിയിച്ചു.
പരീക്ഷാ കേന്ദ്രത്തിനുള്ളിൽ ഷൂസ് ധരിക്കാൻ അനുമതി ഉണ്ടായിരുന്നത് പ്രതികൾ ദുരുപയോഗം ചെയ്തതായും, അതിനുള്ളിൽ വളരെ ചെറുതായ ബ്ലൂടൂത്ത് ഉപകരണങ്ങൾ ഒളിപ്പിച്ചിരുന്നുവെന്നും പൊലീസ് വ്യക്തമാക്കി.
പരീക്ഷ ആരംഭിച്ച ശേഷം ശുചിമുറിയിൽ പോകുന്നുവെന്ന വ്യാജേന പുറത്തേക്ക് പോയി ബ്ലൂടൂത്ത് ഓൺ ചെയ്ത് പുറത്തുണ്ടായിരുന്ന കൂട്ടാളികളുമായി ബന്ധപ്പെടുകയായിരുന്നു പ്രതികളുടെ പദ്ധതി.
മൂന്നു പേർ പരീക്ഷാർഥികളായിരുന്നു. മറ്റുള്ളവർ പുറത്ത് നിന്ന് ഇവരെ സഹായിച്ചു. പുറത്തെ സംഘം ഗൂഗിളും മറ്റ് സെർച്ച് എഞ്ചിനുകളും ഉപയോഗിച്ച് ഉത്തരങ്ങൾ കണ്ടെത്തി ബ്ലൂടൂത്ത് വഴി പരീക്ഷാർഥികൾക്ക് കൈമാറാനായിരുന്നു പദ്ധതിയെന്ന് പൊലീസ് പറഞ്ഞു.
രഹസ്യ വിവരത്തിന്റെ അടിസ്ഥാനത്തിൽ പരീക്ഷാ കേന്ദ്രത്തിന് സമീപം പൊലീസ് നടത്തിയ നിരീക്ഷണമാണ് കൃത്യമായ സമയത്ത് പ്രതികളെ പിടികൂടാൻ സഹായിച്ചതെന്ന് അധികൃതർ അറിയിച്ചു.
ഹരിയാനയിൽ നിന്നുള്ള മുഖ്യപ്രതിയാണ് വിദ്യാർഥികൾക്ക് പരിശീലനവും ഉപകരണങ്ങളും നൽകിയതെന്നും പൊലീസ് വ്യക്തമാക്കി.
പ്രതികളിൽ നിന്ന് എട്ട് മൊബൈൽ ഫോണുകൾ, നാല് ബ്ലൂടൂത്ത് ഉപകരണങ്ങൾ, മൂന്ന് ബ്ലൂടൂത്ത് ഇയർപീസുകൾ ഉൾപ്പെടെയുള്ള ഇലക്ട്രോണിക് ഉപകരണങ്ങൾ കണ്ടെടുത്തു.
അന്വേഷണം പുരോഗമിക്കുകയാണെന്നും മറ്റ് സംസ്ഥാനങ്ങളിലേക്കും അന്വേഷണം വ്യാപിപ്പിക്കാനിടയുണ്ടെന്നും പൊലീസ് അറിയിച്ചു. മുമ്പും ഈ സംഘം വിവിധ മത്സര പരീക്ഷകളിൽ സമാന രീതിയിൽ കൃത്രിമം നടത്തിയിട്ടുണ്ടാകാമെന്നാണ് സംശയം.
പ്രതികളെ കോടതിയിൽ ഹാജരാക്കി ജുഡീഷ്യൽ കസ്റ്റഡിയിൽ വിട്ടു. ഇവർക്കെതിരെ ബിഎൻഎസ് സെക്ഷൻ 318(2), 61(2), ഐടി ആക്ട് സെക്ഷൻ 66, പൊതുപരീക്ഷ (അന്യായ മാർഗങ്ങൾ തടയൽ) ആക്ട് സെക്ഷൻ 10(1) എന്നിവ പ്രകാരം കേസെടുത്തു.
English Summary
Six people were arrested in Raipur, Chhattisgarh, for attempting to cheat in the GATE examination using hidden Bluetooth devices inside their shoes. The accused coordinated with external helpers who searched answers online and sent them to candidates during the exam. Police seized multiple electronic gadgets and have launched a wider investigation into similar exam frauds.
raipur-gate-exam-bluetooth-cheating-racket-arrest
Raipur, Chhattisgarh, GATE exam, exam fraud, Bluetooth cheating, competitive exams, police action, education crime, technology misuse, India news
