ഇയം ആകാശവാണിയാം… സമ്പ്രതി വാർത്താഃ ശ്രൂയന്താം… പണ്ട് വാർത്ത കേൾക്കാൻ ഇന്ന് പോസ്റ്റർ ഒട്ടിക്കാൻ; റേഡിയോ കിയോസ്കുകളുടെ കഷ്ടകാലം!
തിരുവനന്തപുരം: ‘ഇയം ആകാശവാണിയാം… സമ്പ്രതി വാർത്താഃ ശ്രൂയന്താം…’ — അർത്ഥമറിയാതെയെങ്കിലും ഒരുകാലത്ത് റേഡിയോയിൽ നിന്ന് മുഴങ്ങിയ ഈ വാചകങ്ങൾ കേട്ടവർ ഇന്നും അത് മറന്നിട്ടില്ല.
ഗ്രാമങ്ങളിൽ ഒന്നോ രണ്ടോ വീടുകളിൽ മാത്രമേ റേഡിയോ ഉണ്ടായിരുന്നുള്ളൂ. പൊതുജനങ്ങൾക്ക് വാർത്തകളും പരിപാടികളും ഒരുമിച്ച് കേൾക്കാൻ അവസരം ഒരുക്കുന്നതിനായി പഞ്ചായത്തുകളുടെ നേതൃത്വത്തിലാണ് റേഡിയോ കിയോസ്കുകൾ രൂപം കൊണ്ടത്.
പത്രങ്ങൾക്ക് പരിമിതമായ പ്രചാരമേ ഉണ്ടായിരുന്ന കാലത്ത്, വാർത്തകളും വിവരങ്ങളും അറിയാനുള്ള പ്രധാന വാതിലായിരുന്നു ഈ കിയോസ്കുകൾ.
All India Radio (ആകാശവാണി) പ്രാദേശിക വാർത്തകളും യുവവാണിയും ഗ്രാമീണ ജീവിതം അവതരിപ്പിച്ച പരിപാടികളും ജനമനസ്സിൽ ഇടം പിടിച്ചതിന് പിന്നിൽ കിയോസ്കുകളുടെ പങ്ക് നിർണായകമായിരുന്നു.
ഒരു തലമുറയുടെ ചിന്തകൾക്ക് തീപിടിപ്പിച്ച വിവരവിനിമയ കേന്ദ്രങ്ങളായി റേഡിയോ കിയോസ്കുകൾ മാറി. മുതിർന്ന തലമുറയുടെ ഗൃഹാതുര സ്മരണകളിൽ ഇന്നും ഈ കെട്ടിടങ്ങൾ പ്രത്യേക ഇടം നിലനിർത്തുന്നു.
ഇന്ത്യ–പാകിസ്ഥാൻ യുദ്ധങ്ങൾ, അടിയന്തരാവസ്ഥ, മുൻ പ്രധാനമന്ത്രി ഇന്ദിരാ ഗാന്ധിയുടെ വധം തുടങ്ങിയ രാജ്യത്തെ ഞെട്ടിച്ച സംഭവങ്ങൾ മുതൽ പൊതുതെരഞ്ഞെടുപ്പ് ഫലങ്ങളും സിനിമാഗാനങ്ങളും നാടകങ്ങളും വരെ ജനങ്ങൾ അറിഞ്ഞത് ഇത്തരം കിയോസ്കുകളിലൂടെയായിരുന്നു.
വൈകുന്നേരങ്ങളിൽ നാട്ടുകാർ ഒന്നിച്ചുകൂടി റേഡിയോ കേൾക്കാൻ കിയോസ്കിന് മുന്നിൽ ഒത്തുചേരും.
ഈ കൂട്ടായ്മകളിൽ നിന്നാണ് പല പ്രദേശങ്ങളിലും യുവജന ക്ലബുകൾ രൂപം കൊണ്ടത്. അത് നാടിന്റെ സാംസ്കാരിക മുന്നേറ്റത്തിനും വഴിയൊരുക്കി.
ട്രാൻസിസ്റ്റർ റേഡിയോ വ്യാപകമായതോടെ കിയോസ്കുകൾക്ക് മുന്നിലെ തിരക്ക് കുറഞ്ഞു. 1980കളിൽ Doordarshan സംപ്രേഷണം ആരംഭിച്ചതും 1990കളിൽ സ്വകാര്യ ടെലിവിഷൻ ചാനലുകൾ വ്യാപകമായതും കിയോസ്കുകളെ പതിയെ വിസ്മൃതിയിലാക്കി.
പിന്നീട് രാഷ്ട്രീയ–സിനിമ പോസ്റ്ററുകൾ ഒട്ടിക്കുന്ന ചുവരുകളായി പല കിയോസ്കുകളും മാറുകയായിരുന്നു. ഇത്തരം പൊതുസ്മാരകങ്ങൾ സംരക്ഷിക്കപ്പെടേണ്ടതുണ്ടെന്ന് ചരിത്രസ്നേഹികൾ ചൂണ്ടിക്കാട്ടുന്നു.
ഒരേ രൂപത്തിലുള്ള കിയോസ്കുകൾ
1965ന് ശേഷമാണ് കേരളത്തിൽ റേഡിയോ കിയോസ്കുകൾ വ്യാപകമായി നിർമ്മിക്കപ്പെട്ടത്.
തദ്ദേശ സ്ഥാപനങ്ങളായിരുന്നു നടത്തിപ്പുകാർ. വാൽവ് റേഡിയോ, സ്റ്റോറേജ് സെൽ, ലൗഡ് സ്പീക്കർ എന്നിവയാണ് ഒരു കിയോസ്കിലെ പ്രധാന സംവിധാനങ്ങൾ.
Murphy Radio, NELCO, His Master’s Voice, Philips തുടങ്ങിയവയായിരുന്നു അന്ന് ഉപയോഗിച്ചിരുന്ന പ്രധാന റേഡിയോ ബ്രാൻഡുകൾ.
English Summary
Radio kiosks once served as the primary public information and entertainment hubs in Kerala, especially when radio ownership was limited. Supported by local bodies and powered by All India Radio broadcasts, these kiosks helped shape public opinion, cultural life and youth movements. With the arrival of transistor radios, Doordarshan television and later private TV channels, the kiosks gradually faded into obscurity. Historians now stress the need to preserve these forgotten public landmarks.
radio-kiosks-kerala-akashvani-cultural-history
radio kiosks, Akashvani, All India Radio, Kerala history, public broadcasting, Doordarshan, cultural heritage, media history, nostalgia, local history
