സിപിഎം ഏരിയാ കമ്മിറ്റിയംഗത്തെ മർദിച്ചു; പോലീസുകാരന് സസ്പെൻഷൻ

ഇന്നലെ രാത്രിയിലാണ് സംഭവം

പത്തനംതിട്ട: സിപിഎം ഏരിയാ കമ്മിറ്റിയംഗത്തെ മർദ്ദിച്ചെന്ന പരാതിയിൽ പോലീസുകാരനെതിരെ നടപടി. കോന്നി പൊലീസ് സ്റ്റേഷനിലെ ഡ്രൈവർ രഘുകുമാറിനെ സർവീസിൽ നിന്ന് സസ്‌പെൻഡ് ചെയ്തു. പരാതിക്കാരനൊപ്പമെത്തിയ സിപിഎം ഏരിയാ കമ്മിറ്റിയംഗം ടി രാജേഷ് കുമാറിനാണ് മർദ്ദനമേറ്റത്.(Police driver suspended in konni)

ഇന്നലെ രാത്രിയിലാണ് സംഭവം. പരാതിക്കാരൻ പൊലീസ് ജീപ്പിന് മുകളിൽ വെച്ച് പരാതി എഴുതിയതാണ് പ്രകോപനത്തിന് കാരണമായത്. മർദ്ദനമേറ്റതിനെ തുടർന്ന് രാജേഷ് കുമാർ കോന്നി താലൂക്ക് ആശുപത്രിയിൽ ചികിത്സ തേടി. തുടർന്ന് പരാതി നൽകുകയായിരുന്നു.

പരാതി ഉയർന്നതിന് പിന്നാലെ നടത്തിയ വൈദ്യപരിശോധനയിൽ രഘുകുമാർ മദ്യലഹരിയിലായിരുന്നുവെന്ന് തെളിഞ്ഞിട്ടുണ്ട്. തുടർന്നാണ് ഇയാളെ അന്വേഷണ വിധേയമായി സസ്‌പെൻഡ് ചെയ്തത്.