എന്റെ സുഹൃത്തുക്കളെ…! ഗുജറാത്തിൽ തുടങ്ങിയത് ഒരു നഗരസഭയിൽനിന്ന്, കേരളത്തിലും അടിത്തറയിട്ടു- മോദി

എന്റെ സുഹൃത്തുക്കളെ…! ഗുജറാത്തിൽ തുടങ്ങിയത് ഒരു നഗരസഭയിൽനിന്ന്, കേരളത്തിലും അടിത്തറയിട്ടു- മോദി

തിരുവനന്തപുരം: കേരളത്തിന്റെ വികസനത്തിന് ഇന്നുമുതൽ പുതിയ ദിശാബോധം നൽകുമെന്ന് പ്രധാനമന്ത്രി നരേന്ദ്ര മോദി പറഞ്ഞു. പുത്തരിക്കണ്ടം മൈതാനത്ത് നടന്ന വിവിധ വികസന പദ്ധതികളുടെ ഉദ്ഘാടന ചടങ്ങിൽ സംസാരിക്കുകയായിരുന്നു അദ്ദേഹം.

‘എന്റെ സുഹൃത്തുക്കളെ’ എന്ന് മലയാളത്തിൽ അഭിസംബോധന ചെയ്തുകൊണ്ടാണ് പ്രധാനമന്ത്രി പ്രസംഗം ആരംഭിച്ചത്. വികസിത ഭാരതം എന്ന ലക്ഷ്യത്തിലേക്ക് രാജ്യം മുഴുവൻ മുന്നേറുകയാണെന്ന് മോദി പറഞ്ഞു.

നഗരങ്ങളിലെ പാവപ്പെട്ട കുടുംബങ്ങൾക്കായി കേന്ദ്രസർക്കാർ നിരവധി ക്ഷേമപദ്ധതികൾ നടപ്പിലാക്കിയിട്ടുണ്ടെന്നും ആവാസ് യോജന വഴി കേരളത്തിലെ നിരവധി കുടുംബങ്ങൾക്ക് സ്വന്തമായി വീട് ലഭിച്ചിട്ടുണ്ടെന്നും അദ്ദേഹം വ്യക്തമാക്കി.

ഒരുകാലത്ത് ധനികർക്കു മാത്രം ലഭ്യമായിരുന്ന ക്രെഡിറ്റ് കാർഡ് സൗകര്യം ഇന്ന് തെരുവ് കച്ചവടക്കാരിലേക്കും വ്യാപിച്ചുവെന്നും കേരളത്തിൽ 10,000 പേരും തിരുവനന്തപുരത്ത് മാത്രം 600ലധികം പേരും ഇതിന്റെ ഗുണഭോക്താക്കളാണെന്നും അദ്ദേഹം കൂട്ടിച്ചേർത്തു.

തൃശൂർ–ഗുരുവായൂർ പാസഞ്ചർ ട്രെയിൻ സർവീസ് തീർഥാടകർക്ക് വലിയ ആശ്വാസമാകുമെന്ന് പറഞ്ഞ പ്രധാനമന്ത്രി, നിരവധി പദ്ധതികളുടെ ഉദ്ഘാടനവും തറക്കല്ലിടലും വേദിയിൽ നിർവഹിച്ചു.

റേഡിയോ ചികിത്സാ സെന്ററിന് തറക്കല്ലിട്ടതോടൊപ്പം കേരളത്തിനായി മൂന്ന് അമൃത് ഭാരത് ട്രെയിനുകൾ അദ്ദേഹം ഫ്ലാഗ് ഓഫ് ചെയ്തു. ബിജെപി നേതാവ് വി.വി. രാജേഷ് തന്റെ പഴയ സുഹൃത്താണെന്നും മോദി ഓർമ്മിപ്പിച്ചു.

കേന്ദ്രസർക്കാർ എപ്പോഴും കേരള ജനതയ്ക്കൊപ്പമാണെന്നും കൂടുതൽ വികസന പദ്ധതികൾ മുന്നോട്ടുവയ്ക്കുമെന്നും പറഞ്ഞുകൊണ്ടാണ് പ്രസംഗം അവസാനിപ്പിച്ചത്.

തുടർന്ന് തിരുവനന്തപുരത്ത് നടന്ന ബിജെപി പരിപാടിയിൽ സംസാരിച്ച പ്രധാനമന്ത്രി, തിരുവനന്തപുരത്തെ ബിജെപി വിജയത്തെ ‘ഐതിഹാസികം’ എന്ന് വിശേഷിപ്പിച്ചു.

ഇതോടെ ബിജെപി കേരളത്തിൽ ഉറച്ച അടിത്തറയിട്ടതായി മോദി പറഞ്ഞു.

ഗുജറാത്തിൽ അഹമ്മദാബാദ് നഗരസഭയിൽ നിന്നാണ് ബിജെപിയുടെ വിജയയാത്ര ആരംഭിച്ചതെന്നും അതുപോലെ തന്നെ തിരുവനന്തപുരത്ത് നിന്നാകും കേരളത്തിലെ ജൈത്രയാത്രയെന്നും അദ്ദേഹം പറഞ്ഞു.

‘മാറാത്തത് ഇനി മാറും’ എന്ന് മലയാളത്തിൽ പറഞ്ഞ മോദി, ഏഴു പതിറ്റാണ്ടായി ഇടത്-വലത് മുന്നണികൾ തിരുവനന്തപുരത്തോട് അനീതി കാണിച്ചുവെന്നും വികസിത തിരുവനന്തപുരമെന്ന സ്വപ്നം യാഥാർഥ്യമാകുമെന്നും പറഞ്ഞു.

ഇതുവരെ ഇടതും വലതും മാത്രമേ കേരളം കണ്ടിട്ടുള്ളൂ; ഇനി വികസനത്തിന്റെ എൻഡിഎ എന്ന മൂന്നാമത്തെ പക്ഷവും ഉണ്ടാകുമെന്നും അദ്ദേഹം കൂട്ടിച്ചേർത്തു.

എൽഡിഎഫിന്റെയും യുഡിഎഫിന്റെയും അജണ്ട ഒരുപോലെയാണെന്നും ഇടത്-വലത് കൂട്ടുകക്ഷി ഭരണത്തിൽ നിന്ന് കേരളം മോചിതമാകണമെന്നും മോദി വിമർശിച്ചു.

അയ്യങ്കാളിയെയും മന്നത്ത് പത്മനാഭനെയും ശ്രീനാരായണ ഗുരുവിനെയും അനുസ്മരിച്ചുകൊണ്ടാണ് പ്രധാനമന്ത്രി പ്രസംഗം ആരംഭിച്ചത്.

English Summary

Prime Minister Narendra Modi said that Kerala will witness a new development-oriented direction starting today. Speaking at the inauguration of multiple projects in Thiruvananthapuram, he highlighted central welfare schemes, infrastructure growth, and BJP’s historic political breakthrough in the capital city. Modi described the Thiruvananthapuram victory as the foundation of BJP’s growth in Kerala and called for ending Left-Right alliance politics, proposing NDA as the new development-focused alternative.

pm-modi-kerala-development-thiruvananthapuram-bjp-foundation

Narendra Modi, Kerala development, Thiruvananthapuram, BJP Kerala, NDA, Putharikandam Maidan, Amrit Bharat trains, Indian politics, central government schemes