കോഴിക്കോട്: പ്ലസ് ടു വിദ്യാര്ത്ഥിനിയെ കിടപ്പ് മുറിയിൽ ആത്മഹത്യ ചെയ്ത നിലയില് കണ്ടെത്തി. മുക്കം കാരശ്ശേരി കൊടിയത്തൂരിലാണ് സംഭവം. ഗോതമ്പ് റോഡ് സ്വദേശിയായ ജയപ്രകാശിന്റെ മകള് അനന്യ(17)യാണ് മരിച്ചത്.
വീട്ടിലെ മുറിയില് തൂങ്ങി മരിച്ച നിലയിലാണ് മൃതദേഹം കണ്ടെത്തിയത്. തോട്ടുമുക്കം സെന്റ്തോമസ് ഹയര്സെക്കന്ററി സ്കൂളിലെ പ്ലസ് ടു വിദ്യാര്ത്ഥിനിയായിരുന്നു.
മൃതദേഹം കോഴിക്കോട് മെഡിക്കല് കോളേജ് ആശുപത്രിയിലേക്ക് മാറ്റി. മുക്കം പൊലീസ് അസ്വാഭാവിക മരണത്തിന് കേസെടുത്തു.
യാത്രയയപ്പ് ചടങ്ങിനിടെ അധ്യാപകൻ കുഴഞ്ഞ് വീണു മരിച്ചു
തിരുവനന്തപുരം: യാത്രയയപ്പ് ചടങ്ങിനിടെ അധ്യാപകൻ വേദിയിൽ കുഴഞ്ഞ് വീണു മരിച്ചു. തിരുവനന്തപുരം ഭരതന്നൂർ ഗവൺമെൻ്റ് എച്ച്എസ്എസ് ഹിന്ദി അധ്യാപകൻ എസ് പ്രഫുലനാണ് മരിച്ചത്.
ഇന്നലെ രാവിലെ പതിനൊന്ന് മണിയോടെയാണ് സംഭവം. യാത്രയയപ്പു ചടങ്ങിൽ അദ്ദേഹം മറുപടി പ്രസംഗം നടത്തിയതിനു പിന്നാലെയാണ് കുഴഞ്ഞു വീണത്. ഇദ്ദേഹത്തിന് പുറമേ ഇതേ സ്കൂളിൽ നിന്ന് മറ്റ് സ്കൂളുകളിലേക്ക് സ്ഥലം മാറ്റം ലഭിച്ച എട്ട് അധ്യാപകരും ചടങ്ങിലുണ്ടായിരുന്നു.
യാത്രയയപ്പു സ്വീകരണത്തിന് ശേഷം മറുപടി പ്രസംഗം നടത്തി പ്രഫുലൻ തിരിച്ച് കസേരയിൽ വന്ന് ഇരുന്നിരുന്നു. തുടർന്ന് മറ്റൊരധ്യാപകൻ പ്രസംഗിക്കാൻ തുടങ്ങിയപ്പോഴായിരുന്നു അബോധാവസ്ഥയിൽ പ്രഫുലനെ കണ്ടെത്തിയത്.
ഉടൻ തന്നെ അധ്യാപകനെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം ഭരതന്നൂർ സ്കൂളിൽ പൊതുദർശനത്തിന് വെച്ചശേഷം വീട്ടിലേക്കു കൊണ്ടുപോയി. സംസ്കാരം ഇന്ന്.
