പെരുമ്പാവൂരിൽ ജിബി പാത്തിക്കൽ എൻഡിഎ സ്ഥാനാർഥി
കൊച്ചി: പെരുമ്പാവൂർ മണ്ഡലത്തിൽ ട്വന്റി 20 സ്ഥാനാർഥിയിൽ മാറ്റം വരുത്തി. നടി ലക്ഷ്മിപ്രിയയുടെ പേര് വോട്ടർ പട്ടികയിൽ ഇല്ലാതിരുന്നതിനാൽ പുതിയ സ്ഥാനാർഥിയെ പ്രഖ്യാപിക്കുകയായിരുന്നു.
കോൺഗ്രസ് മണ്ഡലം വൈസ് പ്രസിഡന്റായിരുന്ന ജിബി പാത്തിക്കൽ ആണ് പെരുമ്പാവൂരിൽ എൻഡിഎ സ്ഥാനാർഥിയായി രംഗത്തെത്തുന്നത്. യാക്കോബായ സഭ മാനേജിങ് കമ്മിറ്റി അംഗവും യൂത്ത് അസോസിയേഷൻ പെരുമ്പാവൂർ മേഖലാ ഭാരവാഹിയുമായ ജിബിയുടെ സ്ഥാനാർഥിത്വം കോൺഗ്രസിന് തിരിച്ചടിയാകുന്നതായി വിലയിരുത്തപ്പെടുന്നു.
ലക്ഷ്മിപ്രിയയുടെ പേര് വോട്ടർ പട്ടികയിൽ ഇല്ലെന്ന വിവരം പുറത്തുവന്നതിനെ തുടർന്നാണ് സ്ഥാനാർഥിത്വം മാറ്റാൻ തീരുമാനിച്ചത്. ഇതോടെ പെരുമ്പാവൂരിൽ നിശ്ചയിച്ചിരുന്ന റോഡ് ഷോയും അവസാന നിമിഷം റദ്ദാക്കിയിരുന്നു.
അതേസമയം, ഏറ്റുമാനൂരിൽ സ്ഥാനാർഥിയായി പ്രഖ്യാപിച്ച വീണാ നായർക്കും വോട്ടർ പട്ടികയിൽ പേര് ഇല്ലെന്ന് കണ്ടെത്തിയിട്ടുണ്ട്. തുടർന്ന് താൻ മത്സരിക്കില്ലെന്ന് വീണ നായർ തന്നെ സ്ഥിരീകരിച്ചു.
രണ്ട് ചലച്ചിത്ര താരങ്ങളുടെയും പേരുകൾ വോട്ടർ പട്ടികയിൽ ഇല്ലാത്തത് ട്വന്റി 20ക്കും എൻഡിഎക്കും വലിയ തിരിച്ചടിയായി.
വോട്ടർ പട്ടികയിൽ പേരില്ലാത്തവർക്ക് ഫോം-6 പ്രകാരം പേര് ചേർക്കാൻ അവസരം ഉണ്ടായിരുന്നുവെങ്കിലും, നോമിനേഷൻ അവസാന തീയതിക്ക് മുൻപ് അത് സാധ്യമാകുമോ എന്ന ആശങ്കയാണ് സ്ഥാനാർഥി മാറ്റത്തിന് കാരണമായത്.
തൃപ്പൂണിത്തുറ കരിങ്ങാച്ചിറയിൽ താമസിക്കുന്ന ലക്ഷ്മിപ്രിയയുടെ പേര് അവിടെയും, മുൻ താമസസ്ഥലമായ തൃക്കാക്കരയിലെയും വോട്ടർ പട്ടികയിൽ ഇല്ലെന്നാണ് റിപ്പോർട്ട്.
കഴിഞ്ഞ ദിവസമാണ് ട്വന്റി 20 ചീഫ് കോർഡിനേറ്റർ സാബു എം ജേക്കബ് ലക്ഷ്മിപ്രിയയുടെ സ്ഥാനാർഥിത്വം പ്രഖ്യാപിച്ചിരുന്നത്.
