പുളിക്കകണ്ടം തറവാട്ടിലെ ഇളമുറക്കാരി പാല ഭരിക്കും; ചരിത്രത്തിലാദ്യമായി മാണി ഗ്രൂപ്പ് പ്രതിപക്ഷത്ത്

പുളിക്കകണ്ടം തറവാട്ടിലെ ഇളമുറക്കാരി പാല ഭരിക്കും; ചരിത്രത്തിലാദ്യമായി മാണി ഗ്രൂപ്പ് പ്രതിപക്ഷത്ത്

പാലാ: പാലാ നഗരസഭയിൽ യുഡിഎഫ് ഭരണം ഉറപ്പിച്ചു. പുളിക്കകണ്ടം തറവാട്ടിലെ മൂന്ന് കൗൺസിലർമാർ യുഡിഎഫിന് പിന്തുണ പ്രഖ്യാപിച്ചതോടെയാണ് അധികാരം യുഡിഎഫിന് ഉറപ്പായത്.

 ഫലപ്രഖ്യാപനത്തിന് പിന്നാലെ നടന്ന വിശദമായ ചർച്ചകൾക്കൊടുവെയാണ് പിന്തുണ ഔദ്യോഗികമായി പ്രഖ്യാപിച്ചത്. ചർച്ചകളിൽ പുളിക്കകണ്ടം കുടുംബം മുന്നോട്ട് വെച്ച ആവശ്യങ്ങൾ യുഡിഎഫ് അംഗീകരിച്ചു.

21 വയസുകാരിയായ ദിയ ബിനു പുളിക്കകണ്ടം പാലാ നഗരസഭയുടെ ആദ്യ ടേം ചെയർപേഴ്സണാകും. പ്രായം വെറും ഒരു നമ്പർ മാത്രമാണെന്നും പാലായുടെ സമഗ്ര വികസനത്തിനായി പ്രവർത്തിക്കുമെന്നും ദിയ പ്രതികരിച്ചു.

പാലാ നഗരസഭയിൽ ആദ്യമായാണ് കേരള കോൺഗ്രസ് (എം) പ്രതിപക്ഷത്തിരിക്കുക. എൽഡിഎഫ് നേതൃത്വവും പുളിക്കകണ്ടം കുടുംബവുമായി ചർച്ച നടത്തിയെങ്കിലും സമവായം സാധ്യമായില്ല. 

ഇതോടെയാണ് പിന്തുണ യുഡിഎഫിലേക്ക് മാറിയത്.

ബിനു പുളിക്കകണ്ടം, ബിജു പുളിക്കകണ്ടം, ദിയ ബിനു പുളിക്കകണ്ടം എന്നിവരാണ് പുളിക്കകണ്ടം കുടുംബത്തിൽ നിന്നുള്ള വിജയിച്ച കൗൺസിലർമാർ. 

ആകെ 26 സീറ്റുള്ള പാലാ നഗരസഭയിൽ എൽഡിഎഫിന് 12 സീറ്റുകളും യുഡിഎഫിന് 10 സീറ്റുകളും ലഭിച്ചു. നാല് സീറ്റുകളിലാണ് സ്വതന്ത്രർ വിജയിച്ചത്. 

സ്വതന്ത്രരായി വിജയിച്ച പുളിക്കകണ്ടം കുടുംബത്തിലെ മൂന്ന് കൗൺസിലർമാരുടെയും തീരുമാനമാണ് ഭരണം നിർണയിച്ചത്.

അദ്ധ്യക്ഷ സ്ഥാനം നൽകുന്ന മുന്നണിയെ പിന്തുണയ്ക്കുമെന്നതായിരുന്നു പുളിക്കകണ്ടം കുടുംബത്തിന്റെ പ്രധാന ആവശ്യം. 

19-ാം വാർഡിൽ നിന്ന് കോൺഗ്രസ് വിമതനായി മത്സരിച്ച രാഹുലും സ്വതന്ത്ര സ്ഥാനാർഥിയായി വിജയിച്ചിട്ടുണ്ട്.

English Summary

UDF has secured power in Pala Municipality after three councillors from the Pulikkakandam family extended their support. Following post-result negotiations, 21-year-old Diya Binu Pulikkakandam will become the chairperson. With no front having a clear majority, the decision of the independent councillors proved decisive, pushing LDF to the opposition.

Pala-municipality-UDF-rule-Diya-Binu-chairperson