ഇടുക്കി ലോക്സഭാ തിരഞ്ഞെടുപ്പില് യുഡിഎഫ് സ്ഥാനാര്ത്ഥി ഡീന് കൂര്യാക്കോസിന് വിജയം. മികച്ച ഭൂരിപക്ഷമെന്ന ലക്ഷ്യം ഡീനിലൂടെ യുഡിഎഫ് നേടിയെടുക്കുന്ന കാഴ്ചയാണ് ഇത്തവണയും ഇടുക്കിയിൽ കണ്ടത്. പോസ്റ്റല് വോട്ട് എണ്ണിത്തുടങ്ങിയപ്പോള് തൊട്ട് ഡീന് കുര്യാക്കോസിന് തന്നെയായിരുന്നു മേല്ക്കൈ. നിലവില് ഡീനിന്റെ ലീഡ് നില 133972 ത്തിലേറെയായി ഉയര്ന്നിട്ടുണ്ട്.
ശക്തമായ പോരാട്ടം നയിക്കുമെന്ന് കരുതിയ സിപിഎം സ്ഥാനാർഥി അഡ്വ. ജോയ്സ് ജോർജ് തുടക്കം മുതൽ പിന്നിലാകുന്ന കാഴ്ചയാണ് കാണാനായത്. മലയോര ജില്ലയായ ഇടുക്കി പിടിക്കാനിറങ്ങിയ സിപിഎമ്മിന് കനത്ത തിരിച്ചടിയാണ് ഇത്തവണയും ലഭിച്ചത്. അതിവേഗത്തിൽ കുതിച്ച ഡീനിൻ്റെ ലീഡിന് സമീപം എത്താൻ ഒരിക്കൽ പോലും ജോയ്സ് ജോർജിനായില്ലെന്നതും ശ്രദ്ധേയമാണ്.
ഇത്തവണയും ജയിക്കാനാകും എന്ന് നേരത്തെ ഡീന് കുര്യാക്കോസ് പ്രതീക്ഷ പ്രകടിപ്പിച്ചിരുന്നു. 50000-നും 75000-നും ഇടയിലുള്ള ഭൂരിപക്ഷത്തില് വിജയിക്കുമെന്നാണ് വ്യക്തിപരമായ വിലയിരുത്തല് എന്നാണ് അദ്ദേഹം പറഞ്ഞത്. പ്രചാരണ സമയത്തും പോളിംഗ് സമയത്തും ലഭിച്ച പ്രതികരണങ്ങളെല്ലാം തന്നെ പോസിറ്റീവായിരുന്നുവെന്നും അദ്ദേഹം കൂട്ടിച്ചേർത്തിരുന്നു.
