മലപ്പുറം എടവണ്ണയിൽ കരാട്ടെ അധ്യാപകൻ വർഷങ്ങളായി തന്റെ വിദ്യാർഥിനികളെ കബളിപ്പിച്ച്, ശാരീരികമായി പീഡിപ്പിച്ചിരുന്നുവെന്ന വാർത്ത ഞെട്ടിപ്പിക്കുന്നതായിരുന്നു. താൻ ഗുരുവും ദൈവവുമാണെന്നും ശരീരവും മനസും ഗുരുവിന്റെ തൃപ്തിക്കായി സമർപ്പിക്കണമെന്നും കുട്ടികളെ പറഞ്ഞു വിശ്വസിപ്പിച്ച് അയാൾ നടത്തിയ ലൈംഗികാതിക്രമങ്ങൾ പുറത്തുവരാൻ ഒരു പതിനേഴ് വയസ്സുകാരിയ്ക്ക് ജീവൻ നഷ്ടപ്പെടേണ്ടിവന്നു. Number of POCSO cases registered last year
ഇത്തരത്തിൽ കേരളത്തിൽ കഴിഞ്ഞ വർഷം രജിസ്റ്റർ ചെയ്ത പോക്സോ കേസുകളുടെ എണ്ണം ആശങ്കയുളവാക്കുന്നതാണ്. പോക്സോ നിയമപ്രകാരം കഴിഞ്ഞ വർഷം (നവംബർ വരെ) സംസ്ഥാനത്ത് 4196 ലൈംഗിക അതിക്രമ കേസുകളാണ് രജിസ്റ്റർ ചെയ്തത്. ഡിസംബർ വരെയുള്ള കേസുകളുടെ എണ്ണം ഈ വർഷവും 4500 കവിയുമെന്ന് തന്നെയാണ് സംസ്ഥാന ക്രൈം റെക്കോർഡ്സ് ബ്യൂറോയുടെ കണക്കുകൾ വ്യക്തമാക്കുന്നത്. 2023ൽ 4641 കേസുകളാണ് റിപ്പോർട്ട് ചെയ്തിരുന്നത്.
കഴിഞ്ഞ വർഷം കുട്ടികൾക്കെതിരായി ഏറ്റവും കൂടുതൽ അതിക്രമം നടന്നത് തിരുവനന്തപുരത്താണ്. 571 എണ്ണം. ഇതിനുമുമ്പുള്ള വർഷവും തിരുവനന്തപുരം (601) തന്നെയായിരുന്നു പട്ടികയിൽ മുമ്പിൽ. ഏറ്റവും കുറവ് കേസുകൾ റിപ്പോർട്ട് ചെയ്തത് പത്തനംതിട്ട ജില്ലയിലാണ്. 150 എണ്ണം. 2023ലും പത്തനംതിട്ടയിലായിരുന്നു എറ്റവും കുറവ് കേസുകൾ. 177 എണ്ണം.
മലപ്പുറം (465), കോഴിക്കോട് (416), കൊല്ലം(397), എറണാകുളം (393) എന്നീ ജില്ലകളിലാണ് ഏറ്റവും കൂടുതൽ കേസുകൾ എടുത്തിരിക്കുന്നത്. കുട്ടികൾക്കെതിരായ ലൈംഗികാതിക്രമത്തിന് പോയ വർഷവും കുറവില്ലെന്നാണ് കണക്കുകൾ വ്യക്തമാക്കുന്നത്. കഴിഞ്ഞ എട്ടുവർഷത്തിനിടെ ഏറ്റവുംകൂടുതൽ പോക്സോ കേസുകൾ രജിസ്റ്റർചെയ്തത് 2023ലായിരുന്നു. ഇത്തവണയും ഇതിനോട് അടുത്ത് കേസുകൾ ഉണ്ടാവാനാണ് സാധ്യതയെന്നാണ് കണക്കുകൾ സൂചിപ്പിക്കുന്നത്.
അതിക്രമങ്ങൾക്ക് ഇരയാകുന്നവരിൽ കൂടുതലും പെൺകുട്ടികളാണ്. വീടുകളിലും വിദ്യാലയങ്ങളിലും ട്രെയിനിലും വരെ കുട്ടികൾ പീഡനങ്ങൾക്ക് ഇരയാകുന്നുണ്ടെന്ന് ക്രൈം റെക്കോർഡ്സ് ബ്യൂറോയുടെ കണക്കുകൾ വ്യക്തമാക്കുന്നു. സ്വന്തം പിതാവ് മുതൽ അധ്യാപകർ വരെ കുട്ടികളെ പീഡനത്തിന് ഇരയാക്കിയ നിരവധി കേസുകൾ റിപ്പോർട്ട് കഴിഞ്ഞ വർഷവും ചെയ്യപ്പെട്ടിട്ടുണ്ട്. കഞ്ചാവും ലഹരി മരുന്നുകളും നൽകി കുട്ടികളെ പീഡനത്തിന് ഇരയാക്കുന്ന കേസുകളും സംസ്ഥാനത്ത് വർദ്ധിക്കുന്നതായും കണക്കുകൾ സൂചിപ്പിക്കുന്നു.
കേരളത്തിലെ പോക്സോ കേസുകൾ – 2024 നവംബർ വരെ ( ജില്ല തിരിച്ചുള്ള കണക്ക്)
തിരുവനന്തപുരം – 543
കൊല്ലം- 347
പത്തനംതിട്ട – 150
ആലപ്പുഴ-296
കോട്ടയം – 211
ഇടുക്കി -212
എറണാകുളം-393
തൃശൂർ – 340
പാലക്കാട് -248
മലപ്പുറം – 465
വയനാട്- 178
കണ്ണൂർ – 198
കാസർഗോഡ് – 140
റെയിൽവേ പോലീസ് എടുത്ത കേസുകൾ – 11
