കൊച്ചി: ഡാൻസാഫ് സംഘത്തിന്റെ പരിശോധന നടക്കവേ നടൻ ഷൈൻ ടോം ചാക്കോ ഹോട്ടലിൽ നിന്ന് ഇറങ്ങിയോടിയതായി റിപ്പോർട്ട്. ബുധനാഴ്ച രാത്രി 11 മണിക്ക് എറണാകുളം നോർത്തിലെ സ്വകാര്യ ഹോട്ടലിൽ നിന്നാണ് നടൻ ഇറങ്ങിയോടിയത്.
ഇതിന്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്. ഹോട്ടലിന്റെ മൂന്നാം നിലയിൽ നിന്ന് ഏണിപ്പടി വഴി ഇറങ്ങിയോടുന്ന ഷൈൻ ടോം ചാക്കോയെ വീഡിയോയിൽ കാണാം.
നടി വിൻസിയുടെ വെളിപ്പെടുത്തൽ വന്നതിന് പിന്നാലെയാണ് കൊച്ചി സിറ്റി പോലീസ് സംഘം ഹോട്ടലിൽ പരിശോധനയ്ക്ക് എത്തിയത്. 314-ാം റൂമിന്റെ വാതിൽ തുറന്നപ്പോൾ മുന്നിൽ പോലീസിനെ കണ്ടയുടനെ ഷൈൻ ടോം ജനൽ വഴി പുറത്തേക്ക് ചാടി ഓടുകയായിരുന്നു.
നേരത്തെ സിനിമാ സെറ്റിലെ ദുരനുഭവുമായി ബന്ധപ്പെട്ട് നടി വിൻസി അലോഷ്യസ് താരസംഘടനയായ അമ്മയ്ക്ക് പരാതി നൽകിയിരുന്നു. ഷൈൻ ടോം ചാക്കോയ്ക്ക് എതിരെയാണ് വിൻസി പരാതി നൽകിയത്.
ലഹരി ഉപയോഗിച്ച് തന്നോട് മോശമായി പെരുമാറിയെന്നും സൂത്രവാക്യം എന്ന ചിത്രത്തിന്റെ സെറ്റിലായിരുന്നു സംഭവമെന്നും വിൻസിയുടെ പരാതിയിലുണ്ട്‌. അതേസമയം, വിൻസിയുടെ പരാതിയിൽ താരസംഘടന ഷൈനെ പുറത്താക്കാനുള്ള നടപടി ഉടൻ എടുക്കുമെന്നാണ് പുറത്തുവരുന്ന വിവരം.
