കൊച്ചി പനമ്പള്ളി നഗറിലെ വിദ്യാ നഗറിൽ നവജാത ശിശുവിനെ അമ്മ താഴേക്ക് എറിഞ്ഞു കൊലപ്പെടുത്തിയ കേസിൽ ഡിഎന്എ സാംപിള് ശേഖരിച്ച് പൊലീസ്. കുഞ്ഞിന്റെ അമ്മയും കേസിലെ പ്രതിയുമായ യുവതി പീഡനത്തിന് ഇരയായാണുണ് ഗര്ഭിണിയായത് എന്ന സംശയത്തെ തുടര്ന്നാണിത്. നിലവില് ആര്ക്കുമെതിരെ യുവതി മൊഴി നല്കിയിട്ടില്ല. വെള്ളിയാഴ്ച രാവിലെയാണ് യുവതി കുഞ്ഞിനെ സ്വന്തം ഫ്ലാറ്റിന്റെ അഞ്ചാം നിലയില് നിന്നു താഴേക്കു വലിച്ചെറിഞ്ഞത്.
കൊലക്കുറ്റം ചുമത്തി അറസ്റ്റ് രേഖപ്പെടുത്തി ജനറല് ആശുപത്രിയില് പ്രവേശിപ്പിച്ചിരുന്ന യുവതിക്കു ഗുരുതരമായ അണുബാധ കണ്ടെത്തിയതിനെത്തുടര്ന്നു സ്വകാര്യ ആശുപത്രിയിൽ ഐസിയുവില് പ്രവേശിപ്പിച്ചിരിക്കുകയാണ്. വൈദ്യസഹായം ഇല്ലാതെ ശുചിമുറിയില് പ്രസവിച്ചതിനെ തുടര്ന്നാണ് യുവതിക്ക് അണുബാധ ഉണ്ടായതെന്നാണു ഡോക്ടര്മാരുടെ വിലയിരുത്തല്. ഇന്നലെ മജിസ്ട്രേട്ട് ആശുപത്രിയിലെത്തി പ്രതിയെ 14 ദിവസത്തേക്കു റിമാന്ഡ് ചെയ്തു. അന്വേഷണ ഉദ്യോഗസ്ഥര് ഇന്നലെ യുവതിയോടു സംസാരിക്കാന് ശ്രമിച്ചെങ്കിലും ആരോഗ്യസ്ഥിതി മോശമായതിനാല് പിന്വാങ്ങി. യുവതിയുടെ മാതാപിതാക്കളില് നിന്നു പൊലീസ് ഇന്നലെയും മൊഴിയെടുത്തു. യുവതി ഗര്ഭിണിയായിരുന്നു എന്ന വിവരമോ പ്രസവിച്ചതോ തങ്ങള് അറിഞ്ഞിട്ടില്ലെന്ന് ഇരുവരും പറയുന്നത് വിശ്വസനീയമെന്നാണ് പൊലീസ് കരുതുന്നത്.
