ആലപ്പുഴ: സംസ്ഥാനത്ത് വീണ്ടും ദൃശ്യം മോഡല് കൊലപാതകം. ആലപ്പുഴ പൂങ്കാവ് വടക്കന്പറമ്പില് റോസമ്മയെയാണ് കൊലപ്പെടുത്തി വീടിനുള്ളില് കുഴിച്ചിട്ടത്. സംഭവവുമായി ബന്ധപ്പെട്ട് റോസമ്മയുടെ സഹോദരന് ബെന്നിയെ പോലീസ് കസ്റ്റഡിയിലെടുത്തു. ബെന്നിയുമായി പോലീസും റവന്യൂ ഉദ്യോഗസ്ഥരുടെ സംഘവും പൂങ്കാവിലെ വീട്ടിലെത്തി നടത്തിയ പരിശോധനയിലാണ് മൃതദേഹം കണ്ടെത്തിയത്.
പൂങ്കാവ് പള്ളിക്ക് സമീപത്തെ വീട്ടിലാണ് ബെന്നിയും സഹോദരി റോസമ്മയും താമസിച്ചിരുന്നത്. ഇരുവരും തമ്മിലുണ്ടായ തര്ക്കത്തിനിടെ ബെന്നി സഹോദരിയെ കൊലപ്പെടുത്തിയ ശേഷം മൃതദേഹം വീടിനുള്ളില് കുഴിച്ചിടുകയായിരുന്നു. തനിക്ക് ഒരു കൈയബദ്ധം പറ്റിയെന്ന് തിങ്കളാഴ്ച രാവിലെ ബെന്നി സഹോദരിയുടെ മകളോട് പറഞ്ഞിരുന്നു. ഇതോടെയാണ് സംഭവം പുറത്തറിയുന്നത്. തുടർന്നാണ് പോലീസ് ബെന്നിയെ കസ്റ്റഡിയിലെടുത്തത്.
വർഷങ്ങൾക്ക് മുൻപ് ഭര്ത്താവ് ഉപേക്ഷിച്ചുപോയ റോസമ്മയ്ക്ക് രണ്ടുമക്കളാണുള്ളത്. ഇതിനിടെ വീണ്ടും ഒരു വിവാഹം കഴിക്കാന് റോസമ്മ ആഗ്രഹിച്ചിരുന്നു. കൈനകരിയിലെ ഒരു വിവാഹദല്ലാള് മുഖേന വിവാഹക്കാര്യവും ശരിയായി. മെയ് ഒന്നിന് വിവാഹം നടത്താനും നിശ്ചയിച്ചു. എന്നാൽ റോസമ്മ വീണ്ടും വിവാഹം കഴിക്കുന്നതിനെ ബെന്നിയും ബന്ധുക്കളും എതിര്ത്തിരുന്നതായാണ് വിവരം. ഇക്കാര്യം പറഞ്ഞ് ബെന്നിയും റോസമ്മയും തമ്മില് കഴിഞ്ഞദിവസം വഴക്കുണ്ടായെന്നും ഇത് കൊലപാതകത്തില് കലാശിച്ചെന്നുമാണ് നിഗമനം.
Read Also: ഇതെന്തൊരു പ്രവചനം; മഴ ഇപ്പോ വരുമെന്ന് പറയും, വരുന്നത് വെയിലും; ഇന്നത്തെ പ്രവചനം ഇങ്ങനെ
