തിരുവനന്തപുരം : മുനമ്പം വിഷയത്തില് ക്രൈസ്തവ സഭാ ബിഷപ്പുമാരെ ചര്ച്ചക്ക് വിളിച്ച് മുഖ്യമന്ത്രി പിണറായി വിജയന്.
സംസ്ഥാനത്തിൻ്റെ ഡല്ഹിയിലെ പ്രതിനിധി കെ വി തോമസ് വഴിയാണ് മുഖ്യമന്ത്രിയുടെ ഇടപെടല്. ഈസ്റ്റർ കഴിഞ്ഞാൽ ഉടൻ തന്നെ ചര്ച്ചയുണ്ടാകുമെന്നാണ് വിവരം. മുഖ്യമന്ത്രിയുമായി ചര്ച്ച നടത്തുമെന്ന് കോഴിക്കോട് ആര്ച്ച് ബിഷപ്പ് പറഞ്ഞു.
വഖഫ് ഭേദഗതിയില് ബിജെപി പറഞ്ഞു പറ്റിച്ചെന്ന വികാരം ക്രൈസ്തവ സഭ നേതൃത്വത്തിനിടയില് ശക്തമാകുന്നതിനിടെയാണ് വിഷയത്തില് മുഖ്യമന്ത്രി പിണറായി വിജയൻ ഇടപെടുന്നത്.
മുനമ്പം വിഷയത്തിന് ശാശ്വത പരിഹാരം ഉണ്ടാകുമെന്ന പ്രതീക്ഷയിലായിരുന്നു വഖഫ് ബില്ലിന് കെസിബിസി അടക്കം പിന്തുണ നല്കിയിരുന്നത്.
എന്നാല് മുനമ്പം വിഷയം പരിഹരിക്കാന് ഇനിയും നിയമപോരാട്ടം തുടരേണ്ടി വരുമെന്ന് കേന്ദ്രമന്ത്രി കിരണ് റിജിജു പറഞ്ഞു.
ഭൂമിയുടെ അവകാശത്തിനായി വഖഫ് ബോര്ഡിനെതിരെ സമരം ചെയ്യുന്ന മുനമ്പം നിവാസികളെ പ്രധാനമന്ത്രി നരേന്ദ്ര മോദി കാണുമെന്ന് ബിജെപി നേതൃത്വം അറിയിച്ചിരുന്നു.
മുനമ്പം സമരസമിതി ഭാരവാഹികളായ 12 പേരുമായാണ് പ്രധാനമന്ത്രി കൂടിക്കാഴ്ച നടത്തുന്നത്. രാഷ്ട്രീയക്കാര് തെറ്റിദ്ധരിപ്പിച്ചെന്നും, നിയമഭേദഗതി കൊണ്ട് ശാശ്വത പരിഹാരമാകാത്തതില് നിരാശയുണ്ടെന്നും സിറോ മലബാര് സഭ അറിയിച്ചു.
