പാലക്കാട്: വീടിനുള്ളിലുണ്ടായ സ്ഫോടനത്തിൽ അമ്മയ്ക്കും മകനും പരിക്കേറ്റു. പാലക്കാട് നന്ദിയോടിലാണ് സംഭവം. നന്ദിയോട് മേൽപ്പാടം സ്വദേശികളായ വസന്തകോകില (50), മകൻ വിഷ്ണു (28) എന്നിവർക്കാണ് പരിക്കേറ്റത്.
സ്ഫോടനത്തിൽ ജനലും വീട്ടുപകരണങ്ങളും തകർന്നിട്ടുണ്ട്. വീട്ടിൽ സൂക്ഷിച്ചിരുന്ന പടക്കം പൊട്ടിയുള്ള സ്ഫോടനമെന്നാണ് പ്രാഥമിക നിഗമനം. ഇരുവരെയും പാലക്കാട് ജില്ലാ ആശുപത്രിയിലേക്ക് മാറ്റി.
വിവാഹ പിറ്റേന്ന് ഭർത്താവിനൊപ്പം വിരുന്നിനു പോയി, തിരിച്ചു വരുന്ന വഴി കാമുകനൊപ്പം മുങ്ങി യുവതി; സംഭവം മലപ്പുറത്ത്
മലപ്പുറം: വിവാഹത്തിന്റെ പിറ്റേന്ന് ഭർത്താവിനൊപ്പം പോകവേ കാറിൽ നിന്നിറങ്ങി കാമുകനൊപ്പം പോയ യുവതിയെ കണ്ടെത്തി. മലപ്പുറം പരപ്പനങ്ങാടിയിലാണ് സംഭവം നടന്നത്.
ഉള്ളണം മുണ്ടിയൻകാവ് സ്വദേശിയായ യുവതിയാണ് കാമുകനൊപ്പം മുങ്ങിയത്. കഴിഞ്ഞ വ്യാഴാഴ്ചയായിരുന്നു 24കാരിയുടെ വിവാഹം നടന്നത്. തുടർന്ന് കഴിഞ്ഞ വെള്ളിയാഴ്ച യുവതിയും ഭർത്താവും ഉള്ളണത്തെ യുവതിയുടെ വീട്ടിൽ വിരുന്നിനെത്തിയതായിരുന്നു.
തിരിച്ചു ഭർതൃവീട്ടിലേയ്ക്ക് മടങ്ങുംവഴി പുത്തരിക്കലിലെ സ്വകാര്യ ആശുപത്രിക്ക് സമീപമെത്തിയപ്പോൾ സുഹൃത്തിനെ കാണണമെന്ന പേരിൽ യുവതി വാഹനം നിർത്താൻ പറഞ്ഞു. പിന്നാലെ വാഹനത്തിൽ നിന്നിറങ്ങി കാമുകനൊപ്പം പോവുകയായിരുന്നു.
സംഭവത്തിൽ ഭർത്താവ് നൽകിയ പരാതിയിൽ താനൂരിലുള്ള വീട്ടിൽ നിന്നാണ് യുവതിയെ പൊലീസ് കണ്ടെത്തിയത്. തുടർന്ന് യുവതിയെ കോടതിയിൽ ഹാജരാക്കി.
സ്വന്തം ഇഷ്ടപ്രകാരം കാമുകന്റെയൊപ്പം പോവുകയാണെന്ന് അറിയിച്ചതിനെത്തുടർന്ന് യുവതിയെ കാമുകന്റെ കൂടെ വിട്ടയച്ചതായി പരപ്പനങ്ങാടി സിഐ വിനോദ് വലിയാട്ടൂർ അറിയിച്ചു.
