ഷേർളിയെ കൊലപ്പെടുത്തിയ ശേഷം ജോബ് ജീവനൊടുക്കി
കോട്ടയം കാഞ്ഞിരപ്പള്ളി കൂവപ്പള്ളിയിൽ വീട്ടമ്മയെയും യുവാവിനെയും വീടിനുള്ളിൽ മരിച്ച നിലയിൽ കണ്ടെത്തിയ സംഭവത്തിൽ കൂടുതൽ ഞെട്ടിക്കുന്ന വിവരങ്ങൾ പുറത്ത്.
വീട്ടമ്മയായ ഷേർളിയെ കഴുത്തറുത്ത് കൊലപ്പെടുത്തിയതിന് ശേഷം യുവാവ് ജോബ് ജീവനൊടുക്കുകയായിരുന്നുവെന്നാണ് പോലീസിന്റെ പ്രാഥമിക കണ്ടെത്തൽ.
സംഭവത്തിൽ വിശദമായ അന്വേഷണം പുരോഗമിക്കുകയാണെന്ന് കാഞ്ഞിരപ്പള്ളി പൊലീസ് അറിയിച്ചു.
ഇടുക്കി കല്ലാർഭാഗം സ്വദേശിനിയായ ഷേർളി ഏകദേശം ആറുമാസം മുൻപാണ് കൂവപ്പള്ളിയിലെ ഈ വീട്ടിലേക്ക് താമസം മാറിയത്.
ഭർത്താവിന്റെ മരണത്തെ തുടർന്ന് ഒറ്റയ്ക്കായിരുന്നു ഷേർളിയുടെ ജീവിതം. സമീപവാസികളുടെ മൊഴിപ്രകാരം, വീട്ടിൽ സ്ഥിരതാമസക്കാരിയായി ഷേർളി മാത്രമാണ് ഉണ്ടായിരുന്നത്.
എന്നാൽ ജോബ് എന്ന യുവാവ് ഇടയ്ക്കിടെ ഇവിടെ എത്താറുണ്ടായിരുന്നുവെന്നും നാട്ടുകാർ പറയുന്നു.
പോലീസ് അന്വേഷണത്തിൽ ജോബും ഷേർളിയും തമ്മിൽ അടുത്ത ബന്ധമുണ്ടായിരുന്നുവെന്നാണ് കണ്ടെത്തൽ.
കോട്ടയം ആലുംമൂട് സ്വദേശിയാണ് ജോബ്. ഇരുവരും തമ്മിൽ ഉണ്ടായിരുന്ന ബന്ധത്തെക്കുറിച്ചും സംഭവത്തിലേക്ക് നയിച്ച സാഹചര്യങ്ങളെക്കുറിച്ചും പൊലീസ് വിശദമായി പരിശോധിച്ചുവരികയാണ്.
ഇന്നലെ രാത്രി ഒൻപതരയോടെയാണ് സംഭവം നടന്നതെന്നാണ് പൊലീസിന് ലഭിച്ച പ്രാഥമിക വിവരം.
ഷേർളിയുമായി പരിചയമുള്ള ഒരാൾ ഫോണിലൂടെ ബന്ധപ്പെടാൻ ശ്രമിച്ചെങ്കിലും പ്രതികരണം ലഭിക്കാതിരുന്നതിനെ തുടർന്ന് പൊലീസിനെ വിവരമറിയിക്കുകയായിരുന്നു.
തുടർന്ന് പൊലീസും ഫോറൻസിക് സംഘവും സ്ഥലത്തെത്തി നടത്തിയ പരിശോധനയിലാണ് ഭീകരമായ ദൃശ്യം പുറത്തുവന്നത്.
ഷേർളിയെ വീടിനുള്ളിൽ കഴുത്തറുത്ത് രക്തത്തിൽ കുളിച്ച നിലയിലാണ് കണ്ടെത്തിയത്. യുവാവായ ജോബിനെ ഇതേ മുറിയിൽ തന്നെ തൂങ്ങിമരിച്ച നിലയിലുമാണ് കണ്ടെത്തിയത്.
സംഭവസ്ഥലത്ത് രക്തക്കറകളും മറ്റ് നിർണായക തെളിവുകളും കണ്ടെത്തിയിട്ടുണ്ടെന്ന് പൊലീസ് അറിയിച്ചു.
കൊലപാതകത്തിന് ഉപയോഗിച്ച ആയുധത്തെക്കുറിച്ചും മറ്റ് ശാസ്ത്രീയ തെളിവുകളെക്കുറിച്ചും അന്വേഷണം പുരോഗമിക്കുകയാണ്.
ഇൻക്വസ്റ്റ് നടപടികൾ പൂർത്തിയാക്കിയ ശേഷം ഇരുവരുടെയും മൃതദേഹങ്ങൾ പോസ്റ്റ്മോർട്ടത്തിനായി ആശുപത്രിയിലേക്ക് മാറ്റി.
മരണത്തിന് പിന്നിലെ കൃത്യമായ കാരണം, സംഭവത്തിന് മുൻപ് ഇരുവരും തമ്മിൽ ഉണ്ടായ തർക്കങ്ങൾ, മാനസിക സമ്മർദങ്ങൾ തുടങ്ങിയ എല്ലാ സാധ്യതകളും പൊലീസ് പരിശോധിച്ചുവരികയാണ്.
