വീസത്തട്ടിപ്പിൽ മലയാളികൾക്കടക്കം നഷ്ടമായത് ലക്ഷങ്ങൾ. യൂറോപ്പിലും അമേരിക്കയിലും കാനഡയിലുമൊക്കെ ജോലി തേടിയവർക്കാണ് 5 ലക്ഷം രൂപ വരെ നഷ്ടപ്പെട്ടത്. ഏജൻസി സമൂഹമാധ്യമം വഴി നടത്തിയ തട്ടിപ്പിനെക്കുറിച്ച് മലയാളികളായ 4 പേരടക്കം 130 പേർ നൽകിയ പരാതിയിൽ, മുംബൈ പൊലീസ് കേസെടുത്തു.
മുംബൈ ആസ്ഥാനമാക്കി പ്രവർത്തിക്കുന്ന ഏജൻസി ആണ് തട്ടിപ്പ് നടത്തിയത്. . 5 ലക്ഷം രൂപ വരെ നൽകിയവരുണ്ട്. ഇവരെ ഏകോപിപ്പിച്ച്, ഒരുമിച്ചു പരാതി നൽകുകയായിരുന്നു. കർണാടക, ആന്ധ്ര, തമിഴ്നാട് എന്നിവിടങ്ങളിൽ നിന്നുള്ളവരും തട്ടിപ്പിൽ പെട്ടിട്ടുണ്ടെന്നു തട്ടിപ്പിനിരയായ യുവാവ് പറഞ്ഞു.
തട്ടിപ്പിനിരയായ മലയാളികളിലൊരാൾ പറയുന്നത്….
കഴിഞ്ഞവർഷം ജൂണിലാണ്, സമൂഹമാധ്യമത്തിലൂടെ ഈ സ്ഥാപനത്തെക്കുറിച്ചറിഞ്ഞത്. സമൂഹമാധ്യമങ്ങളിലും ഗൂഗിളിലും സ്ഥാപനത്തിനു മികച്ച റേറ്റിങ്ങും റിവ്യൂവുമായിരുന്നു. ലക്സംബർഗിലേക്കുള്ള വീസയ്ക്കു വേണ്ടി 3.5 ലക്ഷം രൂപ നൽകി.
ഇതിനു ശേഷം സ്ഥാപനവുമായി ബന്ധപ്പെട്ടു. കഴിഞ്ഞ ജൂലൈയിലാണു റജിസ്റ്റർ ചെയ്തത്. മുംൈബ മലാട് വെസ്റ്റിലാണ് ഓഫിസ്. ഓഫർ ലെറ്ററും കോൺട്രാക്റ്റ് രേഖകളുമൊക്കെ കൃത്യസമയത്തു തന്നെ കിട്ടി. കോൺട്രാക്റ്റ് ഒപ്പിട്ട ശേഷം മാസങ്ങൾ കഴിഞ്ഞിട്ടും തുടർ നടപടിയില്ലാതായപ്പോഴാണു സംശയം തോന്നിയത്.
തുടർന്ന്, ഏജൻസിയിൽ വിളിച്ചു നോക്കിയെങ്കിലും പരുഷമായാണ് അവർ മറുപടി നൽകിയത്. പിന്നീട്, അവർ സ്ഥാപനം പൂട്ടിപ്പോവുകയായിരുന്നു. തുടർന്നു നടത്തിയ അന്വേഷണത്തിലാണു മലയാളികളടക്കം ഒട്ടേറെ പേരെ ഇവർ വഞ്ചിച്ചതായി മനസ്സിലായത്. യുവാവ് പറയുന്നു.
