ലോക്സഭാ തെരഞ്ഞെടുപ്പ് അടുത്തിരിക്കെ ആലപ്പുഴ കഞ്ഞിക്കുഴിയിൽ സിപിഎമ്മിൽ കൂട്ട രാജി. മൂന്ന് വനിതകൾ ഉൾപ്പെടെ അഞ്ച് പേരാണ് പാർട്ടി വിട്ടത്. കൃഷ്ണപിള്ള സ്മാരകം തകർത്ത കേസിലെ പ്രതിയും മുൻ കണ്ണർകാട് ലോക്കൽ കമ്മിറ്റി സെക്രട്ടറിയുമായ സാബുവിനെ സിപിഎമ്മിൽ തിരികെയെടുത്തതിൽ പ്രതിഷേധിച്ച് കൂട്ടരാജി. മൂന്നു മാസം മുമ്പാണ് സാബുവിനെ സിപിഎമ്മിൽ തിരികെയെടുത്തത്. പാർട്ടി അംഗത്വം ഉപേക്ഷിച്ചവരിൽ മഹിള അസോസിയേഷൻ, ഡിവൈഎഫ്ഐ മേഖലാ തലത്തിൽ പ്രവർത്തിക്കുന്ന വനിതകളും ഉൾപ്പെടുന്നു.
ഇതിനെതിരെ ജില്ലാ – സംസ്ഥാന നേതൃത്വത്തിന് പരാതി നൽകിയിട്ട് നടപടിയുണ്ടാകാത്തതിനാലാണ് രാജി. സ്മാരകം തകർത്ത കേസിൽ പ്രതികളെ തെളിവില്ലാത്തതിനാൽ കോടതി വെറുതെ വിട്ടിരുന്നു. ഇതിനുശേഷമാണ് സാബുവിനെ പാർട്ടിയിൽ തിരികെയെടുക്കുന്നത്.
