കരാൻഗിഡേ എന്ന മത്സ്യ കുടുംബത്തിൽ പെടുന്ന ജയന്റ് ട്രവലി എന്ന് അറിയപ്പെടുന്ന വറ്റ മത്സ്യങ്ങൾ പോതുവേ ആവശ്യക്കാർ കൂടുതലുള്ള മത്സ്യമാണ്. പരമാവധി 70 കിലോഗ്രാം വരെ വളർച്ചയുള്ള ഇവയുടെ വളർച്ച നിരക്ക് മറ്റു പല മത്സ്യങ്ങളെ അപേക്ഷിച്ചു മുന്നിലാണ്. Marine Fisheries Research Center has successfully carried out artificial breeding of live fish
ഇപ്പോളിതാ രാജ്യത്ത് ആദ്യമായി കേന്ദ്ര സമുദ്ര മത്സ്യഗവേഷണ കേന്ദ്രത്തിന്റെ (സിഎംഎഫ്ആർഐ) വിഴിഞ്ഞം പ്രാദേശിക ഗവേഷണ കേന്ദ്രത്തിൽ വറ്റ മത്സ്യങ്ങളുടെ കൃത്രിമ പ്രജനനം വിജയകരമായി പരീക്ഷിച്ചു. ആൺ–പെൺ മത്സ്യങ്ങളെ തിരിച്ചറിഞ്ഞു ഹോർമോൺ കുത്തിവച്ചാണ് ഫലമുണ്ടാക്കിയതെന്ന് ഗവേഷകർ പറഞ്ഞു.
നീണ്ടകരയിൽ നിന്ന് 3 വർഷം മുൻപ് ശേഖരിച്ച് കായലിലെ കൂടുകളിൽ വളർത്തിയ വറ്റ മത്സ്യങ്ങൾ വിഴിഞ്ഞം കേന്ദ്രത്തിലെ ഹാച്ചറിയിൽ എത്തിച്ചാണ് കൃത്രിമ പ്രജനനം നടത്തി വിജയിപ്പിച്ചത്. ഓരോ മത്സ്യവും 2 മുതൽ 4 ലക്ഷം വരെ മുട്ടകൾ ഉൽപാദിപ്പിച്ചു.വിരിഞ്ഞതിൽ 10% ആണ് അതിജീവിച്ചതെങ്കിലും ആദ്യ ഉദ്യമമെന്ന നിലയിൽ ഇതു മികച്ച നേട്ടമാണെന്നാണ് വിലയിരുത്തൽ.
വിഴിഞ്ഞം കേന്ദ്രം മേധാവി ഡോ.ബി.സന്തോഷ്, ഡോ.അംബരീഷ് പി.ഗോപ്, ഡോ.എം.ശക്തിവേൽ എന്നിവരുൾപ്പെട്ട സംഘമാണ് നേട്ടത്തിന് പിന്നിൽ.
