മലയാളി നർത്തകിക്ക് ദാരുണാന്ത്യം

മലയാളി നർത്തകിക്ക് ദാരുണാന്ത്യം

ചെന്നൈ: തമിഴ്നാട്ടിലുണ്ടായ വാഹനാപകടത്തിൽ മലയാളി നർത്തകി മരിച്ചു. എറണാകുളം സ്വദേശിനി ഗൗരി നന്ദ (20) ആണ് മരിച്ചത്. കടലൂർ ചിദംബരത്തുള്ള അമ്മപെട്ടൈ ബൈപാസിൽ വെച്ചാണ് അപകടമുണ്ടായത്.

അപകടത്തിൽ എട്ടു പേർക്ക് പരുക്കേറ്റു. ഇതിൽ ഒരാളുടെ നില ഗുരുതരമാണ്. പുതുച്ചേരിയിലേക്കുള്ള യാത്രയ്ക്കിടെ ശനിയാഴ്ച വൈകിട്ടായിരുന്നു അപകടം നടന്നത്. ഇവർ സഞ്ചരിച്ചിരുന്ന കാർ നിയന്ത്രണം നഷ്ടപ്പെട്ടതിനെ തുടര്ന്ന് റോഡരികിലെ കുഴിയിലേക്ക് മറിയുകയായിരുന്നു.

എറണാകുളം സ്വദേശികളായ ഫ്രെഡി (29), അഭിരാമി (20), തൃശൂർ സ്വദേശി വൈശാൽ (27), സുകില (20), അനാമിക (20) എന്നിവരാണ് പരിക്കേറ്റ് ചികിത്സയിൽ കഴിയുന്നത്.

ഇവരെ കടലൂർ ജില്ലാ സർക്കാർ മെഡിക്കൽ കോളേജ് ആശുപത്രിയിലാണ് പ്രവേശിപ്പിച്ചിരിക്കുന്നത്. ഗൗരി നന്ദ ആശുപത്രിയിലേക്ക് കൊണ്ടുപോകുന്ന വഴിയാണ് മരിച്ച‌തെന്നാണ് വിവരം. സംഭവത്തിൽ അണ്ണാമലൈനഗർ പൊലീസ് കേസെടുത്ത് അന്വേഷണം ആരംഭിച്ചു.

വാഹനാപകടത്തിൽ സ്കൂട്ടർ യാത്രികനു ദാരുണാന്ത്യം

മൂവാറ്റുപുഴ വെള്ളൂർകുന്നത്ത് ഉണ്ടായ വാഹനാപകടത്തിൽ സ്കൂട്ടർ യാത്രികനു ജീവൻ നഷ്ടപ്പെട്ടു. മരിച്ചത് വെള്ളൂർകുന്നം മാരിയിൽ ജെയൻ (67) ആണെന്നാണ് വിവരം.

ജെയൻ സഞ്ചരിച്ചിരുന്ന സ്കൂട്ടറിന് പിന്നിൽ ടോറസ് ലോറി വന്നിടിക്കുകയായിരുന്നു. ഇടിച്ച ശേഷമാണ് ലോറി ജയന്റെ ശരീരത്തിലൂടെ കയറി ഇറങ്ങിയത്. ജൂലൈ 31 നു ഉച്ചകഴിഞ്ഞ് 2.54-നായിരുന്നു സംഭവം.

കച്ചേരിത്താഴം ഭാഗത്ത് നിന്ന് വരികയായിരുന്ന ടോറസ് ലോറിയാണ് സ്കൂട്ടറുമായി കൂട്ടിയിടിച്ചത്. ഈ അപകടത്തിന്റെ സിസിടിവി ദൃശ്യങ്ങൾ ഇപ്പോൾ പുറത്തുവന്നിട്ടുണ്ട്.

സ്കൂട്ടറിന് ലോറി ഇടിക്കുന്നതും, അതോടെ ജയൻ റോഡിലേക്ക് വീഴുന്നതുമെല്ലാം ദൃശ്യങ്ങളിൽ കാണാം. അപകടം സംഭവിച്ച ഉടൻ തന്നെ ജയൻ സംഭവസ്ഥലത്ത് തന്നെ മരണപ്പെട്ടു. മൂവാറ്റുപുഴ പോലീസ്, ഫയർഫോഴ്‌സ് എന്നിവരും ഉടൻ തന്നെ സ്ഥലത്തെത്തി.

കണ്ണൂരുകാരുടെ സ്വന്തം ‘രണ്ടു രൂപ ഡോക്ടര്‍’, ഡോ. എകെ രൈരു ഗോപാൽ അന്തരിച്ചു

കണ്ണൂര്‍: കണ്ണൂരിലെ ജനകീയ ഡോക്ടര്‍ എകെ രൈരു ഗോപാൽ അന്തരിച്ചു. വാർധക്യസഹജമായ രോഗത്തെ തുർന്നാണ് അന്ത്യം. 80 വയസായിരുന്നു.

50 വർഷത്തിലേറെയായി രണ്ടുരൂപ മാത്രം ഫീസായി വാങ്ങിയായിരുന്നു രൈരു ഗോപാൽ ചികിത്സ നടത്തിയിരുന്നത്. സംസ്കാരം ഞായറാഴ്ച ഉച്ചയ്ക്ക് പയ്യാമ്പലത്ത്.

കുട്ടികൾമുതൽ പ്രായമുള്ളവർവരെ ചികിത്സയ്ക്കായി ഡോക്ടറുടെ അടുത്ത് എത്താറുണ്ടായിരുന്നു. ദിവസവുംപുലർച്ചെ നാലുമുതൽ വൈകീട്ട് നാലുവരെ ഡോ. രൈരു ഗോപാൽ രോഗികളെ പരിശോധിച്ചിരുന്നു.

പിന്നീട് കുറച്ചുകാലം രാവിലെ ആറുമുതൽ വൈകീട്ട് നാലുവരെയാക്കി മാറ്റി. കൂടാതെ സാമ്പത്തിക ബുദ്ധിമുട്ടുള്ളവർക്ക് മരുന്ന് സൗജന്യമായി നൽകിയിരുന്നു. ജില്ലയ്ക്ക് പുറത്തുനിന്നു പോലും രോഗികൾ എത്തിയിരുന്നു. പാവപ്പെട്ട രോഗികളുടെ ആശ്രയമായിരുന്നു ഡോക്ടറുടെ ക്ലിനിക്ക്.

അച്ഛൻ: പരേതനായ ഡോ. എ.ജി. നമ്പ്യാർ. അമ്മ: പരേതയായ എ.കെ. ലക്ഷ്മിക്കുട്ടിയമ്മ. ഭാര്യ: പി.ഒ. ശകുന്തള. മക്കൾ: ഡോ. ബാലഗോപാൽ, വിദ്യ.

മരുമക്കൾ: ഡോ. തുഷാരാ ബാലഗോപാൽ, ഭാരത് മോഹൻ. സഹോദരങ്ങൾ: ഡോ. വേണുഗോപാൽ, പരേതനായ ഡോ. കൃഷ്ണഗോപാൽ, ഡോ. രാജഗോപാൽ.

Summary: Malayali dancer Gauri Nanda (20) from Ernakulam tragically died in a road accident in Tamil Nadu. The incident occurred at the Ammapettai bypass near Chidambaram in Cuddalore district.