അസം സ്വദേശിയായ വ്ളോഗര് മായ ഗൊഗോയിയെ ബെംഗളൂരുവിലെ അപ്പാർട്മെൻ്റിൽ കൊലപ്പെടുത്തിയ കേസിലെ പ്രതിയായ മലയാളി ആരവ് ഹനോയ് പിടിയില്. കര്ണാടക പോലീസാണ് ആരവിനെ പിടികൂടിയത്. എന്നാല്, എവിടെ നിന്നാണ് അറസ്റ്റ് ചെയ്തതെന്ന് വ്യക്തമല്ല. രാത്രിയോടെ ബെംഗളൂരുവിലെത്തിക്കും. Malayali accused Aarav arrested in vlogger murder case
സോഷ്യല് മീഡിയ വഴി പരിചയപ്പെട്ട ഇരുവരുടേയും ബന്ധത്തിലുണ്ടായ പ്രശ്നങ്ങളായ കൊലപാതകത്തിലേക്ക് നയിച്ചതെന്നാണ് സൂചന. കണ്ണൂര് തോട്ടട സ്വദേശിയാണ് 21-കാരനായ ആരവ്. ബെംഗളൂരുവില് സ്വകാര്യ സ്ഥാപനത്തില് സ്റ്റുഡൻ്റ് കൗണ്സലറായി ജോലിചെയ്യുകയായിരുന്നു.
കൊല്ലപ്പെട്ട 19-കാരിയായ മായയുമായി ആറു മാസത്തോളമായി അടുപ്പത്തിലായിരുന്നു ആരവ്. കൊല നടത്തുകയെന്ന ഉദ്ദേശ്യത്തോടെ ആരവ് കത്തി കരുതിയിരുന്നതായും പ്ലാസ്റ്റിക് കയര് ഓണ്ലൈന് വഴി വാങ്ങിയതായും പോലീസ് കണ്ടെത്തിയിരുന്നു.
മായയും ആരവും 23-ാം തീയതി വൈകീട്ടോടെയാണ് സര്വീസ് അപ്പാർട്മെൻ്റിൽ മുറിയെടുത്തത്. ചൊവ്വാഴ്ച്ചയാണ് ഇന്ദിരാനഗര് സെക്കന്ഡ് സ്റ്റേജിലെ റോയല് ലിവിങ്സ് സര്വീസ് അപ്പാർട്മെൻ്റിൽ മായയെ കൊല്ലപ്പെട്ടനിലയില് കണ്ടെത്തിയത്. മുറിയിലെ കട്ടിലില് കിടക്കുന്നനിലയിലാണ് മായയുടെ മൃതദേഹം പോലീസ് കണ്ടെത്തിയത്.
നെഞ്ചിലും തലയിലും മുറിവുകളുണ്ടായിരുന്നു. നെഞ്ചില് ആഴത്തിലുണ്ടായ മുറിവാണ് മരണകാരണം. യുവതിയുടെ മൊബൈല് ഫോണും മുറിയില്നിന്ന് പോലീസ് കണ്ടെടുത്തിരുന്നു. ഞായറാഴ്ചയും തിങ്കളാഴ്ചയും മുറിയില് ചെലവഴിച്ച ആരവ് ചൊവ്വാഴ്ച രാവിലെ എട്ടുമണിക്ക് ശേഷമാണ് പുറത്തുപോയത്.
ഇതിനുപിന്നാലെ മുറിയില്നിന്ന് ദുര്ഗന്ധം വമിക്കുന്നത് ശ്രദ്ധയില്പ്പെട്ട ജീവനക്കാര് മറ്റൊരു താക്കോല് ഉപയോഗിച്ച് മുറി തുറന്നതോടെയാണ് യുവതിയെ കൊല്ലപ്പെട്ടനിലയില് കണ്ടെത്തിയത്. നെഞ്ചിലും തലയിലും പരിക്കേറ്റ് അഴുകിത്തുടങ്ങിയ നിലയിലായിരുന്നു മൃതദേഹം കണ്ടെത്തിയത്.
