സഹോദരങ്ങൾ അബദ്ധത്തിൽ കിണറ്റിൽ വീണു; അഞ്ചു വയസുകാരന് ദാരുണാന്ത്യം
മലപ്പുറം: അബദ്ധത്തിൽ ആളുമറയില്ലാത്ത കിണറ്റിൽ വീണ സഹോദരങ്ങളിൽ ഒരാൾ മരിച്ചു. മറ്റൊരു കുട്ടിയെ അയൽവാസിയായ യുവതി സിപിആർ നൽകി രക്ഷപ്പെടുത്തി.
എടവണ്ണപ്പാറ പാഞ്ചീരി നരുവായിൽ സിദ്ധീഖിന്റെ മകൻ അഞ്ചുവയസ്സുകാരൻ അഹമ്മദ് നവാജാണ് മരിച്ചത്.
ഇന്നലെ വൈകിട്ട് നാലരയോടെ ചീക്കോട് തലക്കോട്ടയിൽ, ഉമ്മയുടെ വീട്ടിൽ വിരുന്നിനെത്തിയ നവാജും പത്ത് വയസ്സുകാരനായ സഹോദരൻ അഹമ്മദ് മിൻഹാജും വീടിന് സമീപം കണ്ട മയിലിനെ പിന്തുടർന്ന് ഓടുന്നതിനിടെയാണ് അപകടം ഉണ്ടായത്.
ഓടിക്കൊണ്ടിരിക്കെ ഇരുവരും അബദ്ധത്തിൽ ആളുമറയില്ലാത്ത കിണറ്റിലേക്ക് വീഴുകയായിരുന്നു.
കൂടെയുണ്ടായിരുന്ന മറ്റൊരു സഹോദരൻ ഉടൻ തന്നെ സമീപവാസികളെ വിവരം അറിയിച്ചു.
ഇതേ സമയം റോഡിലൂടെ കടന്നുപോയ ഒരാൾ കിണറ്റിലിറങ്ങി കുട്ടികളെ പുറത്തെടുത്തു. പത്ത് വയസ്സുകാരനായ മിൻഹാജിന് അയൽവാസിയായ നസിയ എന്ന യുവതി ഏകദേശം അഞ്ച് മിനിറ്റ് സിപിആർ നൽകി.
സമയോചിതമായ ഇടപെടലിനെ തുടർന്ന് മിൻഹാജ് രക്ഷപ്പെട്ടു.
അതേസമയം, അഞ്ചുവയസ്സുകാരനായ നവാജ് ഗുരുതരാവസ്ഥയിലായിരുന്നു. ഇരുവരെയും ഉടൻ കോഴിക്കോട് മെഡിക്കൽ കോളേജ് ആശുപത്രിയിൽ എത്തിച്ചെങ്കിലും നവാജിന്റെ ജീവൻ രക്ഷിക്കാനായില്ല.
ചാലിയപ്രം ഗവൺമെന്റ് എൽ.പി. സ്കൂളിലെ ഒന്നാം ക്ലാസ് വിദ്യാർഥിയായിരുന്നു അഹമ്മദ് നവാജ്. മൃതദേഹം പോസ്റ്റ്മോർട്ടത്തിനായി കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റി. ഖബറടക്കം ഇന്ന് നടക്കും. സംഭവത്തിൽ പൊലീസ് പ്രാഥമിക അന്വേഷണം ആരംഭിച്ചു.
English Summary
A five-year-old boy died after accidentally falling into an uncovered well along with his brother in Malappuram district. The elder brother was rescued after a neighbour performed timely CPR. The incident occurred while the children were chasing a peacock near a relative’s house. Police have started an inquiry.
malappuram-brothers-fall-into-well-child-dies-cpr-saves-one
Malappuram, well accident, children fall into well, CPR rescue, Ahmed Navaj, Edavannappara, Cheekode, Kerala news
