ബാഗുമായി റോഡിൽ കുത്തിയിരുന്ന് പ്രതിഷേധിച്ച് അഞ്ചാം ക്ലാസ്സുകാരി
ഭോപ്പാൽ: സ്കൂളിലേക്കുള്ള വാൻ എത്തിയില്ലെന്നതിനെ തുടർന്ന് പത്ത് വയസുകാരിയായ വിദ്യാർഥിനി സ്കൂൾ ബാഗുമായി റോഡിൽ ഇരുന്ന് മൂന്ന് മണിക്കൂർ പ്രതിഷേധിച്ചു.
മധ്യപ്രദേശിലെ ബേതുൽ ജില്ലയിൽ അഞ്ചാം ക്ലാസ് വിദ്യാർഥിനിയായ സുരഭി യാദവ് ആണ് സ്കൂളിലേക്ക് പോകണമെന്ന ആവശ്യം ഉന്നയിച്ച് റോഡ് ഉപരോധിച്ചത്. ഇതോടെ ഗതാഗതം തടസപ്പെട്ടു.
റോഡിൽ നിന്ന് മാറാൻ സുരഭി തയ്യാറാകാതിരുന്നതോടെ നാട്ടുകാരും പിന്തുണയുമായി രംഗത്തെത്തി. ഗതാഗതക്കുരുക്ക് രൂക്ഷമായതിനെ തുടർന്ന് പൊലീസ് സ്ഥലത്തെത്തി വിദ്യാർഥിനിയുമായി സംസാരിച്ചു.
വിദ്യാഭ്യാസ വകുപ്പ് ഉദ്യോഗസ്ഥരും ഇടപെട്ടു. സ്കൂൾ മാനേജ്മെന്റുമായി സംസാരിക്കാമെന്ന് ഉറപ്പ് നൽകിയതോടെയാണ് മൂന്ന് മണിക്കൂറിനുശേഷം സുരഭി പ്രതിഷേധം അവസാനിപ്പിച്ച് റോഡിൽ നിന്ന് മാറിയത്.
“സ്കൂളിൽ പോകണം എന്ന ആവശ്യമാത്രമാണ് സുരഭി പറഞ്ഞത്. അവൾ കരയുകയോ ബഹളംവയ്ക്കുകയോ ചെയ്തില്ല; ശാന്തമായി അവിടെ ഇരിക്കുകയായിരുന്നു,” ഒരു പ്രദേശവാസി പറഞ്ഞു.
അതേസമയം, കഴിഞ്ഞ രണ്ട് വർഷമായി യാത്രാ ഫീസ് അടയ്ക്കുന്നതിൽ കുടുംബം വീഴ്ച വരുത്തിയതിനാലാണ് വാൻ സേവനം നിർത്തിയതെന്ന് സ്കൂൾ അധികൃതർ അറിയിച്ചു.
വാൻ സേവനം ഫീസ് അടിസ്ഥാനത്തിലാണെന്നും ആവർത്തിച്ച അറിയിപ്പുകൾ അവഗണിക്കപ്പെട്ടെന്നും അവർ വ്യക്തമാക്കി.
ഇതിന് മറുപടിയായി, വിദ്യാഭ്യാസ അവകാശ നിയമം പ്രകാരമാണ് മകൾക്ക് പ്രവേശനം ലഭിച്ചതെന്നും ഒരു വർഷം മുഴുവൻ ക്ലാസിൽ പ്രവേശിപ്പിക്കാതെ പിന്നീട് നവംബറിൽ 28 ദിവസം മാത്രമാണ് പഠിക്കാൻ അനുവദിച്ചതെന്നും സുരഭിയുടെ അമ്മ ആശാ യാദവ് ആരോപിച്ചു.
പിന്നീട് വീണ്ടും തടഞ്ഞതായും ഇന്ന് വാഹന സൗകര്യം നിഷേധിച്ചതായും അവർ പറഞ്ഞു. “മകൾ വലിയ മാനസിക സമ്മർദ്ദത്തിലാണ്,” എന്നും ആശാ യാദവ് കൂട്ടിച്ചേർത്തു.
എന്നാൽ, കുട്ടിയെ സ്കൂളിലേക്ക് അയക്കുന്നത് മാതാപിതാക്കൾ തന്നെയാണ് നിർത്തിയതെന്ന് സ്കൂൾ മാനേജ്മെന്റ് പ്രതികരിച്ചു. സംഭവത്തിനിടെ ഡ്രൈവറോട് മോശമായി പെരുമാറിയെന്നും മാനേജ്മെന്റ് ആരോപിച്ചു.
English Summary
A 10-year-old girl in Madhya Pradesh’s Betul district staged a three-hour road protest after her school van failed to arrive. Police and education officials intervened, assuring talks with the school management. While the school cited unpaid transport fees, the girl’s mother alleged denial of education rights, leading to a dispute over responsibility.
madhya-pradesh-student-road-protest-school-van-betul
Madhya Pradesh, Betul, Student Protest, School Van Issue, Right to Education, Police Intervention, Education News
