കുഞ്ഞുങ്ങൾക്കുള്ള പോഷകാഹാര ബ്രാൻഡുകൾ തിരിച്ചു വിളിച്ച് പ്രമുഖ ബ്രാൻഡ്
കുഞ്ഞുങ്ങളുടെ പോഷകാഹാര ഉത്പന്നങ്ങളുമായി ബന്ധപ്പെട്ട് സുരക്ഷാ ആശങ്ക ഉയർന്നതായി ഭക്ഷ്യവസ്തു നിർമാണ ഭീമനായ നെസ്ലെ അറിയിച്ചു.
സുരക്ഷാ പ്രശ്നം കണ്ടെത്തിയതിനെ തുടർന്ന് NAN, SMA, BEBA എന്നീ ബ്രാൻഡുകളിലെ ചില ബാച്ചുകൾ കമ്പനി മുൻകരുതലിന്റെ ഭാഗമായി വിപണിയിൽ നിന്ന് തിരിച്ചുവിളിച്ചിട്ടുണ്ട്.
ഭക്ഷ്യവിഷബാധയ്ക്ക് കാരണമാകാൻ സാധ്യതയുള്ള cereulide എന്ന വിഷാംശം ഈ ബാച്ചുകളിൽ അടങ്ങിയിരിക്കാമെന്ന സംശയമാണ് നടപടിക്ക് പിന്നിലെന്ന് നെസ്ലെ വ്യക്തമാക്കി.
ജനുവരി 6-ന് പുറത്തിറക്കിയ ഔദ്യോഗിക പ്രസ്താവനയിലൂടെയാണ് കമ്പനി ഇക്കാര്യം പൊതുജനങ്ങളെ അറിയിച്ചത്.
പരിശോധനകളുടെ ഭാഗമായി സംശയം തോന്നിയ ചില ബാച്ചുകൾ മാത്രമാണ് തിരിച്ചുവിളിച്ചതെന്നും, ഉപഭോക്താക്കളുടെ സുരക്ഷയാണ് കമ്പനിയുടെ ഏറ്റവും വലിയ മുൻഗണനയെന്നും നെസ്ലെ വിശദീകരിച്ചു.
ഇതുവരെ യാതൊരു ഗുരുതര ആരോഗ്യപ്രശ്നങ്ങളും സ്ഥിരീകരിച്ചിട്ടില്ലെങ്കിലും, അപകടസാധ്യത ഒഴിവാക്കുന്നതിന്റെ ഭാഗമായാണ് നടപടി സ്വീകരിച്ചതെന്നും കമ്പനി അറിയിച്ചു.
നിലവിൽ യൂറോപ്പിലെ 31 രാജ്യങ്ങളിലും, ലാറ്റിൻ അമേരിക്കയിലെ മൂന്ന് രാജ്യങ്ങളിലും, ഏഷ്യയിൽ ഹോങ്കോങിലും നെസ്ലെയുടെ ഈ കുഞ്ഞുങ്ങൾക്കുള്ള പോഷകാഹാര ഉത്പന്നങ്ങൾ തിരിച്ചുവിളിച്ചിട്ടുണ്ട്.
കുഞ്ഞുങ്ങൾക്കുള്ള പോഷകാഹാര ബ്രാൻഡുകൾ തിരിച്ചു വിളിച്ച് പ്രമുഖ ബ്രാൻഡ്
ഇന്ത്യ ഇതുവരെ തിരിച്ചുവിളിച്ച രാജ്യങ്ങളുടെ പട്ടികയിൽ ഉൾപ്പെട്ടിട്ടില്ല. എന്നിരുന്നാലും, അന്വേഷണം പുരോഗമിക്കുന്നതിനനുസരിച്ച് കൂടുതൽ രാജ്യങ്ങൾ പട്ടികയിൽ ഉൾപ്പെടാൻ സാധ്യതയുണ്ടെന്ന് നെസ്ലെ മുന്നറിയിപ്പ് നൽകി.
അതിനാൽ തന്നെ, ലോകമെമ്പാടുമുള്ള ഉപഭോക്താക്കൾ ജാഗ്രത പാലിക്കണമെന്ന് കമ്പനി ആവശ്യപ്പെടുന്നു.
cereulide എന്ന വിഷാംശം അടങ്ങിയ ഫോർമുല ഉപയോഗിച്ചാൽ കുഞ്ഞുങ്ങളിൽ ഛർദ്ദി, വയറിളക്കം, ഭക്ഷണം കഴിക്കാൻ മടിപ്പ്, ശരീരത്തിൽ ദേഹദ്രവ്യം കുറയുക തുടങ്ങിയ ലക്ഷണങ്ങൾ പ്രകടമാകാമെന്ന് ആരോഗ്യ വിദഗ്ധർ പറയുന്നു.
അപൂർവ സാഹചര്യങ്ങളിൽ ഇത് ഗുരുതര ആരോഗ്യ പ്രശ്നങ്ങളിലേക്കും നയിക്കാമെന്നും മുന്നറിയിപ്പ് നൽകുന്നു. പ്രത്യേകിച്ച് വളരെ ചെറിയ പ്രായത്തിലുള്ള കുഞ്ഞുങ്ങളിൽ ഇത്തരം വിഷബാധകൾ അപകടകരമായിരിക്കാമെന്നാണ് വിലയിരുത്തൽ.
ഇതിനാൽ കുഞ്ഞുങ്ങൾക്കായി ഫോർമുല ഫുഡ് ഉപയോഗിക്കുന്ന മാതാപിതാക്കളും രക്ഷിതാക്കളും അതീവ ജാഗ്രത പാലിക്കണമെന്ന് ആരോഗ്യ വിദഗ്ധരും നെസ്ലെയും നിർദേശിക്കുന്നു.
ഉപയോഗിക്കുന്ന ഉത്പന്നങ്ങളുടെ ബാച്ച് നമ്പറുകൾ സൂക്ഷ്മമായി പരിശോധിക്കണമെന്നും, തിരിച്ചുവിളിച്ച ബാച്ചുകളിൽ ഉൾപ്പെടുന്നവയാണെങ്കിൽ ഉടൻ ഉപയോഗം നിർത്തണമെന്നും നിർദ്ദേശിച്ചിട്ടുണ്ട്.
സംശയമുള്ള ഉത്പന്നങ്ങൾ ഉപയോഗിക്കാതെ, കൂടുതൽ വിവരങ്ങൾക്ക് നെസ്ലെയുടെ ഔദ്യോഗിക വെബ്സൈറ്റിനെയോ ഉപഭോക്തൃ സേവന വിഭാഗത്തെയോ സമീപിക്കണമെന്നും കമ്പനി അറിയിച്ചു.
