മലയാളിയായ കൃഷ്ണപിള്ളയുടെ മകൻ, മുംബൈ വിറപ്പിച്ച ഡോൺ; കുമാർ പിള്ളയെ നാടുകടത്താൻ ഇന്ത്യ
മുംബൈ: കേരളവുമായി കുടുംബബന്ധമുള്ള അധോലോക കുറ്റവാളി കുമാർ പിള്ളയെ ഹോങ്കോങ്ങിലേക്ക് നാടുകടത്താൻ പ്രത്യേക മക്കോക്ക കോടതി ഉത്തരവിട്ടു.
ഹോങ്കോങ് പൗരനായ ഇയാൾക്കെതിരെ ഇന്ത്യയിൽ കൈമാറ്റ ധാരണ പ്രകാരം വിചാരണ നടത്തിയ മൂന്ന് കേസുകളിലും കുറ്റവിമുക്തനായതിനെത്തുടർന്നാണ് നടപടി. ഒരു മാസത്തിനകം നാടുകടത്തണമെന്ന് കോടതി നിർദേശിച്ചു.
ഇന്റർപോൾ പുറപ്പെടുവിച്ച റെഡ് കോർണർ നോട്ടീസിന്റെ അടിസ്ഥാനത്തിൽ സിംഗപ്പൂരിൽ നിന്നാണ് കുമാർ പിള്ളയെ അറസ്റ്റ് ചെയ്ത് 2016ൽ ഇന്ത്യയ്ക്ക് കൈമാറിയത്.
കൊലപാതകശ്രമം, ഭീഷണിപ്പെടുത്തി പണംതട്ടൽ തുടങ്ങിയ മൂന്ന് കേസുകളിൽ മാത്രം വിചാരണ നടത്തുമെന്ന വ്യവസ്ഥയിലാണ് കൈമാറ്റം നടന്നത്.
ആ കേസുകളിലെല്ലാം ഇയാൾ വെറുതെവിട്ടതോടെ, കൈമാറിയ രാജ്യത്തിന്റെ അനുമതിയില്ലാതെ മറ്റ് കേസുകളിൽ വിചാരണ നടത്താൻ കഴിയില്ലെന്ന സുപ്രീംകോടതി വിധി ബാധകമായി.
ആറ് കേസുകളായിരുന്നു ഇന്ത്യയിൽ കുമാർ പിള്ളയ്ക്കെതിരെ ഉണ്ടായിരുന്നത്. എന്നാൽ കൈമാറ്റ നിബന്ധനകൾ കാരണം മൂന്നിൽ മാത്രമാണ് വിചാരണ നടന്നത്.
മധ്യമുംബൈയിലെ വിക്രോളിയിലാണ് കുമാർ പിള്ളയുടെ കുടുംബവേരുകൾ. കന്യാകുമാരി സ്വദേശിയായ പിതാവ് കൃഷ്ണപിള്ള ചെറിയ ജോലികളിലൂടെ മുംബൈയിൽ ജീവിതം തുടങ്ങി പിന്നീട് അധോലോക ബന്ധങ്ങൾ വഴി സ്വാധീനം നേടിയെന്നാണ് പൊലീസ് പറയുന്നത്.
വിക്രോളിയിൽ സ്കൂളും ക്ഷേത്രവും സ്ഥാപിച്ചിരുന്ന കൃഷ്ണപിള്ളയെ കെട്ടിടവിവാദവുമായി ബന്ധപ്പെട്ട് ദാവൂദ് ഇബ്രാഹിം സംഘാംഗങ്ങളുടെ അനുയായികൾ കൊലപ്പെടുത്തിയതായും അന്വേഷണത്തിൽ കണ്ടെത്തിയിട്ടുണ്ട്.
പിതാവിന്റെ കൊലപാതകത്തിന് പ്രതികാരം ചെയ്യാനാണ് കുമാർ പിള്ള അധോലോകത്തിലേക്ക് കടന്നതെന്നാണ് പൊലീസ് വിലയിരുത്തൽ. എൻജിനീയറിങ് ബിരുദധാരിയായ ഇയാൾ ആദ്യം അമർ നായിക് സംഘത്തിൽ ചേർന്നു.
പിന്നീട് അശ്വിൻ നായിക്കിനൊപ്പം പ്രവർത്തിച്ചു. ഭീഷണിപ്പെടുത്തി പണംതട്ടൽ ഉൾപ്പെടെ നിരവധി കേസുകളിൽ ഇയാളുടെ പേര് ഉയർന്നു.
അമർ നായിക് കൊല്ലപ്പെടുകയും അശ്വിൻ നായിക് പരിക്കേറ്റ് വീൽചെയറിലാകുകയും ചെയ്തതോടെ കുമാർ പിള്ള മുംബൈ വിട്ട് വിദേശത്തേക്ക് കടന്നതായി പൊലീസ് പറയുന്നു.
മുംബൈ സ്വദേശിയായ കൽപനയാണ് ഭാര്യ. ദമ്പതികൾക്ക് ഒരു മകളുണ്ട്. 1998ൽ ഒരിക്കൽ പൊലീസിന്റെ പിടിയിലായിരുന്ന ഇയാൾ 1999ൽ ജാമ്യത്തിലിറങ്ങി ഒളിവിൽ പോയി. പിന്നീട് 2016ൽ സിംഗപ്പൂരിൽ നിന്നാണ് വീണ്ടും പിടിയിലായത്.
English Summary:
A Mumbai court ordered the deportation of underworld figure Kumar Pillai to Hong Kong after he was acquitted in all cases tried under extradition terms.
kumar-pillai-deportation-hongkong
Kumar Pillai, Underworld, Mumbai Court, Deportation, Crime News
