ചക്കയിടാൻ പ്ലാവിൽ കയറി; പിടിവിട്ട് താഴെ വീണ് യുവാവിന് ദാരുണാന്ത്യം!
കോഴിക്കോട്: ചക്കയിടുന്നതിനിടെ പ്ലാവിൽ നിന്ന് വീണ് യുവാവ് മരിച്ചു. കാസർകോട് സ്വദേശിയും താമരശ്ശേരി അടിവാരം മുപ്പതേക്കറിൽ താമസക്കാരനുമായ ഇബ്രാഹിം ആണ് മരിച്ചത്. ബുധനാഴ്ച രാവിലെ പത്തുമണിയോടെയായിരുന്നു അപകടം.
താമസസ്ഥലത്തിന് സമീപമുള്ള സുഹൃത്തിന്റെ പറമ്പിലെ പ്ലാവിൽ ചക്കയിടാനായി ഇബ്രാഹിം ഏണി ഉപയോഗിച്ച് കയറിയിരുന്നു. എന്നാൽ പിന്നാലെ പിടിവിട്ട് താഴേക്ക് വീഴുകയായിരുന്നു.
സംഭവം കണ്ട സമീപത്തുണ്ടായിരുന്ന തൊഴിലാളികൾ ഉടൻ തന്നെ ഇബ്രാഹിമിനെ ആശുപത്രിയിലെത്തിച്ചു. കോഴിക്കോട് മെഡിക്കൽ കോളജ് ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.
മൃതദേഹം മെഡിക്കൽ കോളജ് മോർച്ചറിയിലേക്ക് മാറ്റിയിട്ടുണ്ട്. കാസർകോട്ടുനിന്ന് ബന്ധുക്കൾ എത്തിച്ചേരുന്ന ശേഷം മൃതദേഹം വിട്ടുകൊടുക്കുമെന്ന് അധികൃതർ അറിയിച്ചു.
