കോട്ടയം: കോട്ടയം ലോക്സഭാ മണ്ഡലത്തിലെ എല്ഡിഎഫ് സ്ഥാനാര്ഥിയായി തോമസ് ചാഴികാടന് മത്സരിക്കും. ഇന്ന് ചേര്ന്ന കേരള കോണ്ഗ്രസ്- എം സ്റ്റിയറിങ് കമ്മിറ്റിക്ക് ശേഷം പാര്ട്ടി ചെയര്മാന് ജോസ് കെ മാണിയാണ് സ്ഥാനാര്ഥിയെ പ്രഖ്യാപിച്ചത്. 2024-ലോക്സഭാ തിരഞ്ഞെടുപ്പിന് സംസ്ഥാനത്തെ ആദ്യ സ്ഥാനാര്ഥി പ്രഖ്യാപനമാണിത്.
കോട്ടയം സീറ്റ് കേരള കോണ്ഗ്രസ് എമ്മിന് നല്കാന് നേരത്തെ എല്ഡിഎഫ് യോഗത്തില് തീരുമാനിച്ചിരുന്നു. നിലവിലെ എംപിയായ തോമസ് ചാഴികാടൻ 2019-ല് യുഡിഎഫിന്റെ ഭാഗമായി മത്സരിച്ചാണ് ജയിച്ചത്. അന്ന് ഇടത് സ്ഥാനാര്ഥിയായിരുന്ന വി.എന്.വാസവനെ ഒരു ലക്ഷത്തിലധികം വോട്ടുകള്ക്കാണ് കേരള കോണ്ഗ്രസ്-എം സ്ഥാനാര്ഥിയായി മത്സരിച്ച തോമസ് ചാഴികാടന് തോല്പിച്ചത്. സ്റ്റിയറിങ് കമ്മിറ്റിയില് ഒരേയൊരു പേര് മാത്രമേ ഉയര്ന്നിരുന്നുള്ളൂവെന്ന് യോഗത്തിനു ശേഷം ജോസ് കെ.മാണി വ്യക്തമാക്കി.
