പോലീസിനെതിരെ ഗുരുതര ആരോപണം; ചോരയൊലിപ്പിച്ചു കിടന്ന യുവാവിനെ വഴിയിലുപേക്ഷിച്ച് പോലീസ് കടന്നുകളഞ്ഞു

കൊച്ചി: വാഹനപരിശോധനയ്ക്കിടെയുണ്ടായ അപകടത്തിൽ പരിക്കേറ്റ യുവാവിനെ റോഡിൽ ഉപേക്ഷിച്ച് പോലീസ് സംഘം കടന്നുകളഞ്ഞതായി പരാതി.

ചെല്ലാനം മാളികപ്പറമ്പ് ഐസ് പ്ലാന്റിന് സമീപം കഴിഞ്ഞ ദിവസം പുലർച്ചെ രണ്ട് മണിയോടെയാണ് മനുഷ്യത്വഹീനമായ സംഭവം നടന്നത്.

ആലപ്പുഴ കൊമ്മാടി സ്വദേശി അനിലിനാണ് (28) പോലീസിന്റെ നടപടിമൂലം ഗുരുതരമായി പരിക്കേറ്റത്.

സംഭവം ഇങ്ങനെ:

ഫോർട്ട് കൊച്ചിയിൽ ക്രിസ്മസ് ആഘോഷം കഴിഞ്ഞ് മടങ്ങുകയായിരുന്നു അനിലും സുഹൃത്ത് രാഹുലും. വാഹനപരിശോധന നടത്തുകയായിരുന്ന പോലീസ് ഇവരെ തടയാൻ ശ്രമിച്ചു.

വാഹനം നിർത്താൻ വേഗത കുറച്ചപ്പോൾ കണ്ണമാലി സ്റ്റേഷനിലെ സി.പി.ഒ ബിജുമോൻ അനിലിന്റെ കൈയിൽ ബലമായി പിടിച്ചുവെന്നും,

ഇതോടെ നിയന്ത്രണം വിട്ട ബൈക്ക് മറിയുകയുമായിരുന്നുവെന്ന് രാഹുൽ പറയുന്നു.

അപകടത്തിൽ അനിലിന്റെ മൂക്കിന്റെ പാലം തകരുകയും 34 പല്ലുകൾക്ക് പരിക്കേൽക്കുകയും ചെയ്തു.

സി.പി.ഒ ബിജുമോന്റെ കൈ ഒടിയുകയും അദ്ദേഹം ബോധരഹിതനാവുകയും ചെയ്തു.

ഇൻസ്റ്റഗ്രാം റീൽസ് ചിത്രീകരണത്തിനായി ചുവന്ന ലൈറ്റ്; ട്രെയിൻ നിർത്തിച്ച പ്ലസ് ടു വിദ്യാർത്ഥികൾ പിടിയിൽ

എന്നാൽ, കൂടെയുണ്ടായിരുന്ന എ.എസ്.ഐ പരിക്കേറ്റ പോലീസുകാരനെ മാത്രം ജീപ്പിൽ കയറ്റി കൊണ്ടുപോയെന്നും,

രക്തത്തിൽ കുളിച്ചു കിടന്ന അനിലിനെ ആശുപത്രിയിലെത്തിക്കാൻ തയ്യാറായില്ലെന്നുമാണ് ആരോപണം.

20 കിലോമീറ്റർ ചോരയൊലിപ്പിച്ച് ബൈക്കിൽ:

സഹായത്തിന് ആരുമില്ലാതെ വന്നതോടെ, സുഹൃത്ത് രാഹുൽ പരിക്കേറ്റ അനിലിനെ സ്വന്തം ഷർട്ടുകൊണ്ട് ബൈക്കിൽ കെട്ടിവെച്ച് 20 കിലോമീറ്ററോളം ദൂരമുള്ള ചെട്ടികാട് ആശുപത്രിയിൽ എത്തിക്കുകയായിരുന്നു.

പിന്നീട് അവിടെ നിന്ന് ആലപ്പുഴ മെഡിക്കൽ കോളേജിലേക്കും തുടർന്ന് എറണാകുളത്തെ സ്വകാര്യ ആശുപത്രിയിലേക്കും മാറ്റി.

പോലീസിന്റെ വാദം:

യൂവാക്കൾ ബൈക്ക് ഇടിപ്പിച്ച് പോലീസുകാരനെ കൊലപ്പെടുത്താൻ ശ്രമിച്ചുവെന്നാണ് പോലീസിന്റെ വിശദീകരണം.

കൃത്യനിർവ്വഹണം തടസ്സപ്പെടുത്തിയതിനും പോലീസുകാരനെ പരിക്കേൽപ്പിച്ചതിനും യുവാക്കൾക്കെതിരെ കേസ് എടുത്തിട്ടുണ്ട്.

ചികിത്സയിൽ കഴിയുന്ന അനിലിന്റെ പിതാവ് രാജേന്ദ്രൻ കിഡ്നി സംബന്ധമായ അസുഖ ബാധിതനാണ്.

കുടുംബത്തിന്റെ ഏക അത്താണിയായ യുവാവിനോട് പോലീസ് കാട്ടിയ ക്രൂരതയ്ക്കെതിരെ രാഹുൽ ആലപ്പുഴ എസ്.പിക്ക് പരാതി നൽകി.

English Summary:

A youth named Anil was seriously injured during a police vehicle inspection at Chellanam, Kochi. His friend Rahul alleged that the police forcibly grabbed Anil’s hand while slowing down, causing the crash. While the police took their injured colleague to the hospital, they allegedly abandoned the bleeding youth at the spot.