കൽപ്പറ്റ : സൂര്യൻ നിഴലില്ലാത്ത ദിവസങ്ങൾ സമ്മാനിക്കുന്ന അത്ഭുതപ്രതിഭാസത്തിന്‌ 11 മുതൽ 23 വരെ സംസ്ഥാനം സാക്ഷിയാകും. വെള്ളിയാഴ്‌ച തിരുവനന്തപുരത്ത് ദൃശ്യമാകുന്ന പ്രതിഭാസം 23ന്‌ കാസർകോട്‌ അവസാനിക്കുമെന്നാണ് റിപ്പോർട്ട്. കൊച്ചിയിൽ 15ന്‌ പകൽ 12.25നായിരിക്കും ഈ പ്രതിഭാസം.
സൂര്യൻ കൃത്യമായി തലയ്‌ക്കുമുകളിൽ വരുന്നതിനാലാണ്‌ നിഴൽ മാഞ്ഞു പോകുന്നത്. വർഷത്തിൽ രണ്ടുദിവസം മാത്രമാണിത്‌ സംഭവിക്കുന്നത്‌.
ഇതിനെ നിഴലില്ലാ ദിവസങ്ങൾ (സീറോ ഷാഡോ ഡേ) എന്നാണ്‌ വിളിക്കുന്നത്. ഭൂമിയുടെ സാങ്കൽപ്പിക അച്ചുതണ്ടിന്റെ ചരിവും സൂര്യനുചുറ്റുമുള്ള ഭ്രമണവും ചേർന്നാണ് ഈ പ്രതിഭാസം ഒരുക്കുന്നത്. ഇന്ത്യയിലിത്‌ ഏപ്രിലിലും ആഗസ്‌തിലുമാണ്.
ശാസ്‌ത്രസാഹിത്യ പരിഷത്ത്‌, പരിഷത്ത്‌ യുവസമിതി എന്നിവയുടെയും സ്‌കൂളുകളിൽ ശാസ്‌ത്രക്ലബ്ബുകളുടെയും നേതൃത്വത്തിൽ ഈ ദിവസങ്ങളിൽ ഭൂമിയുടെ ചുറ്റളവ് കൃത്യമായി അളക്കാറുണ്ട്‌.
നിഴലുള്ള സ്ഥലങ്ങളിലെ നിഴലിന്റെ നീളവും അവിടെ നിന്ന് നിഴലില്ലാ സ്ഥലങ്ങളിലേക്കുള്ള ദൂരവും ഉപയോഗിച്ചാണ് ചുറ്റളവ് എടുക്കുന്നത്.
പരിഷത്തിന്റെ ഓൺലൈൻ ചാനലായ ലൂക്കയുടെ നേതൃത്വത്തിലും വിവിധ പരിപാടികൾ സംഘടിപ്പിക്കുന്നു. ലൂക്ക സന്ദർശിക്കാൻ: https://luca.co.in/
–
