തിരുവനന്തപുരം: ഡൽഹി ചെങ്കോട്ട മെട്രോ സ്റ്റേഷനു സമീപം ഉണ്ടായ ഭീകര സ്ഫോടനത്തിന് പിന്നാലെ കേരളത്തിൽ സുരക്ഷാ സംവിധാനങ്ങൾ കർശനമാക്കി.
ഡിജിപിയുടെ ജാഗ്രതാ നിർദ്ദേശം; പൊതുജനങ്ങൾ ആശങ്കപ്പെടേണ്ടതില്ല
സംസ്ഥാനത്ത് ജാഗ്രത വർധിപ്പിച്ചിട്ടുണ്ടെന്ന് ഡിജിപി റവാഡ ചന്ദ്രശേഖർ അറിയിച്ചു. പൊതുജനങ്ങളുടെ ആശങ്ക വെടിഞ്ഞ് സമാധാനം പാലിക്കണമെന്നും, ഇത് സുരക്ഷാ മുൻകരുതലിന്റെ ഭാഗമായി സ്വീകരിക്കുന്ന നടപടികളാണെന്നും അദ്ദേഹം വ്യക്തമാക്കി.
ഭാരതത്തിലെ ഏറ്റവും തിരക്കേറിയ നഗരങ്ങളിലൊന്നായ ഡൽഹിയിലെ സ്ഫോടനത്തിന് പിന്നാലെ, കേരളത്തിലെ പ്രധാന കേന്ദ്രങ്ങളിലും ഗതാഗത കേന്ദ്രങ്ങളിലും സുരക്ഷ ശക്തമാക്കി. പ്രധാന നഗരങ്ങളിലെ പൊലീസ് നിരീക്ഷണം ഇരട്ടിയാക്കി.
ബസ് സ്റ്റാൻഡുകൾ, മാളുകൾ, തിരക്കേറിയ കേന്ദ്രങ്ങളിൽ നിരീക്ഷണം ശക്തം
റെയിൽവേ സ്റ്റേഷനുകൾ, ബസ് സ്റ്റാൻഡുകൾ, ഷോപ്പിംഗ് മാളുകൾ, വിനോദ കേന്ദ്രങ്ങൾ, തീർത്ഥാടന കേന്ദ്രങ്ങൾ എന്നിവിടങ്ങളിൽ കർശന പരിശോധനകൾ പുരോഗമിക്കുന്നു.
പ്രത്യേകിച്ച് തിരക്ക് കൂടിയ സ്ഥലങ്ങളിൽ നിരീക്ഷണ ക്യാമറകൾ പുനഃപരിശോധിച്ച് സുരക്ഷ ഉറപ്പാക്കാൻ പൊലീസിന് നിർദ്ദേശമുണ്ട്.
റെയിൽവേ സ്റ്റേഷനുകളിൽ ആർപിഎഫ് പരിശോധന ശക്തമാക്കിയിട്ടുണ്ട്. സ്റ്റേഷനുകളുടെ ഉള്ളിലും പുറത്ത് സംശയാസ്പദമായ സാഹചര്യങ്ങൾ കണ്ടെത്താൻ ബോംബ് സ്ക്വാഡ്, ഡോഗ് സ്ക്വാഡ് ടീമുകളുടെ സഹായത്തോടെ പരിശോധന നടത്തപ്പെടുന്നു.
സ്റ്റേഷനുകളിൽ ദൃശ്യങ്ങൾ വീഡിയോകളോ ഫോട്ടോകളോ പകർത്തരുതെന്ന് ആർപിഎഫ് കർശനമായി നിർദ്ദേശം നൽകിയതും ശ്രദ്ധേയമാണ്.
കേരള–കർണാടക അതിർത്തിയിൽ സുരക്ഷ വർധിപ്പിച്ചു
കേരളം–കർണാടക അതിർത്തി പ്രദേശങ്ങളിലും പരിശോധനയുടെയും സുരക്ഷിത യാത്രാനടപടികളുടെയും ഭാഗമായും അധിക പൊലീസ് സേന വിന്യസിച്ചിട്ടുണ്ട്. വാഹന പരിശോധനകളും ഐഡി വെരിഫിക്കേഷനും കര്ശനമാക്കിയിട്ടുണ്ട്.
ഡൽഹിയിലെ സ്ഫോടനം വൈകിട്ട് 6.52 ഓടെയാണ് നടന്നത്. ട്രാഫിക് സിഗ്നലിൽ നിർത്തിയിരുന്ന കാറിലാണ് ആദ്യ പൊട്ടിത്തെറി ഉണ്ടായതെന്ന് പ്രാഥമിക വിവരം.
ഡല്ഹിയില് വന് സ്ഫോടനം: നിർത്തിയിട്ട കാറുകൾ പൊട്ടിത്തെറിച്ചു 9 മരണം
പിന്നാലെ അടുത്തുള്ള മറ്റൊരു വാഹനത്തിലും സ്ഫോടനം ഉണ്ടായതായി ദൃക്സാക്ഷികൾ പറയുന്നു. തീ പടർന്നതോടെ സമീപത്തെ വാഹനങ്ങൾ 150 മീറ്റർ അകലേക്ക് തെറിച്ചുപോയെന്നും നിരവധി വാഹനങ്ങളും കടകളും കേടുപാടുകൾ നേരിട്ടതായും റിപ്പോർട്ടുണ്ട്.
സ്ഫോടന ശബ്ദം രണ്ടര കിലോമീറ്ററിലധികം ദൂരത്ത് വരെ കേട്ടതായി പ്രാദേശികർ പറയുന്നു. 20 ഫയർഫോഴ്സ് യൂണിറ്റുകൾക്ക് ഏറെ നേരത്തെ ശ്രമത്തിനൊടുവിലാണ് തീ നിയന്ത്രണത്തിലായത്.
വ്യാജവാർത്തകൾ ഒഴിവാക്കുക; പൊലീസ് ഔദ്യോഗിക വിവരങ്ങൾ മാത്രം വിശ്വസിക്കുക
സമൂഹമാധ്യമങ്ങളിൽ വ്യാജവാർത്തകളും ഭീതിപരത്തുന്ന സന്ദേശങ്ങളും പ്രചരിപ്പിക്കരുതെന്നും, ഔദ്യോഗിക ഉറവിടങ്ങളിൽ നിന്നുള്ള വിവരങ്ങൾ മാത്രം വിശ്വസിക്കണമെന്നുമാണ് പൊലീസ് നിർദേശം.
പൊതുജനങ്ങൾ സംശയാസ്പദമായ എന്തെങ്കിലും കണ്ടാൽ ഉടൻ പൊലീസിനെ അറിയിക്കണമെന്ന് ഡിജിപി ആവശ്യപ്പെട്ടു.
English Summary
After the blast near Delhi’s Red Fort Metro station, Kerala has strengthened security statewide. Police and RPF have intensified inspections at railway stations, bus stands, and crowded public areas. Border security at Kerala–Karnataka checkpoints has also been enhanced as a precautionary measure. Authorities urged the public to remain calm and follow official updates.
