ന്യൂഡല്ഹി: രാജ്യത്തെ ഏറ്റവും മികച്ച മറൈന് സംസ്ഥാനത്തിനുള്ള കേന്ദ്ര ഫിഷറീസ് മന്ത്രാലയത്തിന്റെ 2024ലെ പുരസ്കാരം നേടി കേരളം. ഏറ്റവും മികച്ച മറൈന് ജില്ലയ്ക്കുള്ള പുരസ്കാരത്തിന് കൊല്ലം ജില്ലയും അർഹത നേടി. മത്സ്യബന്ധന മേഖലയിലെ സമഗ്രമായ ഇടപെടലുകള് പരിഗണിച്ചാണ് കേരളം നേട്ടം കരസ്ഥമാക്കിയത്.(Kerala selected as the best marine state in the country)
മത്സ്യത്തൊഴിലാളികള്ക്കായും മത്സ്യമേഖലയിലെ വികസനത്തിനുമായുള്ള തനത് പദ്ധതികള്, കേന്ദ്രാവിഷ്കൃത പദ്ധതികളുടെ സുതാര്യവും സമയബന്ധിതവുമായ നടത്തിപ്പ്, സമുദ്ര മത്സ്യ ഉത്പാദനത്തിലെ വര്ധനവ്, തുടങ്ങിയവയിലെ മികവാണ് കേരളത്തെ പുരസ്കാര നേട്ടത്തിന് സഹായിച്ചത്. തീരദേശത്തെ പാവപ്പെട്ട മത്സ്യത്തൊഴിലാളികളെ ചേര്ത്തുപിടിച്ചു സര്ക്കാര് നടത്തിയ നടപടികളുടെ പ്രതിഫലനമാണ് ഏറ്റവും മികച്ച മറൈന് സംസ്ഥാനം, മറൈന് ജില്ല എന്നീ പുരസ്കാരങ്ങളെന്ന് മന്ത്രി സജി ചെറിയാന് പ്രതികരിച്ചു.
