ട്രംപ് ഇടഞ്ഞതോടെ പ്രതിസന്ധിയിലായവരിൽ മലയാളികളും

ട്രംപ് ഇടഞ്ഞതോടെ പ്രതിസന്ധിയിലായവരിൽ മലയാളികളും

കൊച്ചി: അമേരിക്ക ഇന്ത്യയിൽ നിന്നുള്ള സമുദ്രോത്പന്നങ്ങൾക്ക് ഏർപ്പെടുത്തിയ അധിക തീരുവ കേരളത്തിലെ കയറ്റുമതി മേഖലയിൽ വലിയ പ്രതിസന്ധി സൃഷ്ടിച്ചിരിക്കുകയാണ്.

50 ശതമാനമായി ഉയർത്തിയ തീരുവ നടപ്പിലാക്കിയതോടെ, അമേരിക്കൻ വിപണിയിൽ നിന്ന് കേരളത്തിന്റെ സമുദ്രോത്പന്നങ്ങൾക്ക് ലഭിച്ചിരുന്ന വൻഓർഡറുകൾ മരവിപ്പിക്കപ്പെട്ടു.

ഇതിനാൽ കോടിക്കണക്കിന് രൂപയുടെ ചരക്കുകൾ സംസ്ഥാനത്തെ കമ്പനികളുടെ ഗോഡൗണുകളിൽ കുടുങ്ങിക്കിടക്കുകയാണ്.

കേരളത്തിൽ നിന്ന് അമേരിക്കയിലേക്കുള്ള കയറ്റുമതി ഏറെക്കാലമായി വലിയൊരു വിപണി ആയിരുന്നു. ആറുമാസം മുമ്പ് തന്നെ അമേരിക്കൻ ഇറക്കുമതി സ്ഥാപനങ്ങൾ കേരളത്തിലെ കമ്പനികൾക്ക് വലിയ തോതിൽ ഓർഡറുകൾ നൽകിയിരുന്നു.

അതിന്റെ അടിസ്ഥാനത്തിലാണ് കോടികൾ ചെലവഴിച്ച് സമുദ്രോത്പന്നങ്ങൾ — പ്രത്യേകിച്ച് ചെമ്മീൻ — ശേഖരിച്ചത്.

എന്നാൽ പുതിയ തീരുവ നിലവിൽ വന്നതോടെ അമേരിക്കയിലെ ഇറക്കുമതി സ്ഥാപനങ്ങൾ നിലപാട് മാറ്റി.ഇപ്പോൾ അവർ താത്കാലികമായി ഇറക്കുമതി വേണ്ടെന്ന നിലപാടാണ് സ്വീകരിച്ചിരിക്കുന്നത്.

സമുദ്രോത്പന്ന കയറ്റുമതിക്കാരുടെ കണക്കുപ്രകാരം, അമേരിക്കയിലേക്കു മാത്രം പ്രതിവർഷം ഏകദേശം 21,000 കോടിയോളം രൂപയുടെ സമുദ്രോത്പന്നങ്ങളാണ് കേരളം കയറ്റുമതി ചെയ്യാറുള്ളത്.

എന്നാൽ, ഇത്തവണ ഇതിന്റെ പത്തു ശതമാനത്തിൽ താഴെ മാത്രമാണ് ഇതുവരെ അയയ്ക്കാനായത്. ശേഷിക്കുന്ന ചരക്കുകൾ ഗോഡൗണുകളിൽ കെട്ടിക്കിടക്കുകയാണ്.

മൂല്യം ഇതിനകം തന്നെ 50 ശതമാനം വരെ ഇടിഞ്ഞു

ചെമ്മീൻ ഉൾപ്പെടെയുള്ള പ്രധാന ഉൽപ്പന്നങ്ങളുടെ മൂല്യം ഇതിനകം തന്നെ 50 ശതമാനം വരെ ഇടിഞ്ഞുവെന്നാണ് വ്യവസായികളുടെ വിലയിരുത്തൽ.

അമേരിക്കൻ വിപണി നഷ്ടമായതോടെ, മറ്റ് രാജ്യങ്ങളിലേക്കുള്ള വ്യാപാരവും തിരിച്ചടിയിലായിരിക്കുകയാണ്.

വില ഇടിവ് ഉണ്ടാകാനിടയുള്ളതിനാൽ ചൈന, വിയറ്റ്‌നാം, തായ്‌ലാൻഡ് തുടങ്ങിയ രാജ്യങ്ങളും മുമ്പ് നൽകിയിരുന്ന ഓർഡറുകളിൽ നിന്ന് പിന്മാറി.

നിലവിലെ സാഹചര്യത്തിൽ ചരക്ക് വാങ്ങുന്നത് വൈകിക്കാമെന്നാണ് അവരുടെ നിലപാട്.

ഇന്ത്യയിൽ നിന്നുള്ള ഉത്പന്നങ്ങൾക്ക് അമേരിക്കയിൽ ഉയർന്ന തീരുവ ഏർപ്പെടുത്തിയത്, മറ്റ് രാജ്യങ്ങൾക്കും വിലക്കുറവിന്റെ പ്രതീക്ഷ നൽകുകയും വിപണിയിൽ അനിശ്ചിതത്വം സൃഷ്ടിക്കുകയും ചെയ്തതായി വിദഗ്ധർ പറയുന്നു.

ഇതിന്റെ ആഘാതം ഏറ്റവുമധികം അനുഭവിക്കുന്നത് കേരളമാണ്, കാരണം സമുദ്രോത്പന്ന കയറ്റുമതിയുടെ വലിയൊരു വിഹിതം സംസ്ഥാനത്തുനിന്നാണ്.

ഈ സാഹചര്യം അതീവഗുരുതരമാണെന്ന് സീഫുഡ് എക്സ്‌പോർട്ട് അസോസിയേഷൻ വ്യക്തമാക്കുന്നു. സർക്കാർ അടിയന്തര ഇടപെടലാണ് മേഖലയെ രക്ഷിക്കാൻ ആവശ്യമായി വരുന്നത്.

സ്ഥാപനങ്ങളുടെ പ്രവർത്തനം നിലനിർത്താൻ കുറഞ്ഞ പലിശനിരക്കിൽ വായ്പകൾ അനുവദിക്കണമെന്നാണ് അവരുടെ ആവശ്യം.

പ്രവർത്തനച്ചെലവിന്റെ കുറഞ്ഞത് 30 ശതമാനം വായ്പയായി അനുവദിച്ചാൽ മാത്രമേ ഈ പ്രതിസന്ധി തരണം ചെയ്യാനാകൂവെന്നും സംഘടന വ്യക്തമാക്കി.

സംസ്ഥാനത്തെയും രാജ്യത്തെയും വിദേശനാണ്യ വരുമാനത്തിൽ വലിയ പങ്ക് വഹിക്കുന്ന മേഖലയായതിനാൽ, സർക്കാരും ബാങ്കുകളും ഒന്നിച്ച് ഇടപെടണമെന്ന ആവശ്യം ശക്തമാവുകയാണ്.

പുതിയ വിപണികൾ കണ്ടെത്താനും നിലവിലെ ചരക്കുകൾക്ക് വിപണനം ഒരുക്കാനും അടിയന്തര നടപടികൾ സ്വീകരിക്കാത്ത പക്ഷം, കോടികളുടെ നഷ്ടം നേരിടേണ്ടിവരുമെന്ന മുന്നറിയിപ്പും വിദഗ്ധർ ഉന്നയിക്കുന്നു.

കേരളത്തിന്റെ സമുദ്രോത്പന്ന കയറ്റുമതി വ്യവസായം ആയിരക്കണക്കിന് തൊഴിലാളികൾക്ക് ഉപജീവന മാർഗമാണ്.

അമേരിക്കൻ വിപണി നഷ്ടപ്പെട്ടാൽ, അത് തൊഴിലവസരങ്ങളിലും സാമ്പത്തിക നിലയിലും ഗൗരവമായ തിരിച്ചടിയുണ്ടാക്കും. അതിനാൽ, സർക്കാർ ഇടപെടൽ അത്യാവശ്യമാണ് എന്നതാണ് വ്യവസായികളുടെ ഏകസ്വരമായ അഭിപ്രായം.

English Summary :

Kerala’s seafood export sector faces a major crisis as the US imposes 50% tariff on Indian products. With American orders frozen, crores worth of seafood, mainly shrimp, remain stuck in warehouses.