വർഷത്തിൽ അഞ്ചല്ല, പത്ത്; ലൈസൻസ് റദ്ദാക്കുന്ന വ്യവസ്ഥ പരിഷ്കരിച്ച് നടപ്പിലാക്കാൻ കേരളം
തിരുവനന്തപുരം:
വർഷത്തിൽ അഞ്ചോ അതിലധികമോ ഗതാഗത നിയമലംഘനങ്ങൾ നടത്തിയാൽ ഡ്രൈവിങ് ലൈസൻസ് റദ്ദാക്കണമെന്ന കേന്ദ്ര മോട്ടോർ വാഹന നിയമഭേദഗതി സംസ്ഥാനത്ത് അതേപടി നടപ്പാക്കേണ്ടതില്ലെന്ന് സർക്കാർ തീരുമാനിച്ചു.
പകരം, വർഷത്തിൽ പത്തോ അതിലധികമോ നിയമലംഘനങ്ങൾ നടത്തിയാൽ ലൈസൻസ് റദ്ദാക്കുന്ന വ്യവസ്ഥയായി പരിഷ്കരിച്ച് സംസ്ഥാനത്ത് നടപ്പാക്കാനാണ് മോട്ടോർ വാഹന വകുപ്പിന്റെ നീക്കം.
ഇതു സംബന്ധിച്ച റിപ്പോർട്ട് സർക്കാർക്ക് സമർപ്പിക്കുമെന്ന് മോട്ടോർ വാഹന വകുപ്പ് അറിയിച്ചു.
ജനുവരി ഒന്നുമുതൽ പ്രാബല്യത്തിൽ വന്ന കേന്ദ്ര നിയമഭേദഗതി സംസ്ഥാനത്ത് നടപ്പാക്കില്ലെന്ന് ഗതാഗതമന്ത്രി കെ.ബി. ഗണേശ്കുമാർ വ്യക്തമാക്കിയതിന്റെ തുടർച്ചയായാണ് വകുപ്പിന്റെ നടപടി.
മന്ത്രിയുടെ നിർദേശപ്രകാരമാണ് ഭേദഗതി നിർദേശങ്ങൾ തയ്യാറാക്കുന്നത്.
അതേസമയം, ചരക്കുലോറികളും ബസുകളും അടക്കമുള്ള വാണിജ്യ വാഹനങ്ങളാണ് കൂടുതലായി നിയമലംഘനം നടത്തുന്നതെന്നും അവയെ നിയന്ത്രിക്കാൻ കർശന വ്യവസ്ഥകൾ അനിവാര്യമാണെന്നും വകുപ്പ് സർക്കാരിന് മുന്നിൽ വയ്ക്കും.
റോഡപകടങ്ങൾ കുറയ്ക്കുക എന്ന ലക്ഷ്യത്തോടെ കഴിഞ്ഞ 21നാണ് കേന്ദ്ര സർക്കാർ മോട്ടോർ വാഹന നിയമത്തിൽ കർശന വ്യവസ്ഥകൾ ഉൾപ്പെടുത്തി ഭേദഗതി കൊണ്ടുവന്നത്.
ഈ ഭേദഗതി സംസ്ഥാനത്ത് നടപ്പാക്കാനുള്ള നീക്കം വകുപ്പ് ആരംഭിച്ചിരുന്നെങ്കിലും മന്ത്രി ഇടപെട്ട് അത് തടയുകയായിരുന്നു.
ഇതിനിടെ, ഗതാഗത നിയമലംഘനങ്ങൾ തടയുന്നതിനുള്ള ബോധവത്കരണ പരിപാടികൾക്കും മോട്ടോർ വാഹന വകുപ്പ് തുടക്കം കുറിച്ചു.
വകുപ്പിന്റെ ഔദ്യോഗിക ചിഹ്നമായ ‘മോട്ടു’ എന്ന ആനക്കുട്ടിയുടെ വേഷത്തിലാണ് ബോധവത്കരണം നടത്തുന്നത്.
സീബ്രാ ക്രോസിംഗിൽ സിഗ്നൽ ലംഘിച്ച് വാഹനം മുന്നോട്ടെടുക്കുന്നവരെ മോട്ടു ഗദയുടെ രൂപത്തിലുള്ള ബലൂൺ ഉപയോഗിച്ച് തടയും.
നിയമലംഘനം ചെയ്യുന്നവരെ മോട്ടു ശാസിക്കുകയും, നിയമം പാലിക്കുന്നവർക്ക് മധുരം നൽകുകയും ചെയ്യും. നിയമലംഘനം ആവർത്തിക്കുന്നവർക്ക് വകുപ്പിന്റെ ശിക്ഷാനടപടികൾ നേരിടേണ്ടി വരുമെന്ന് അധികൃതർ അറിയിച്ചു.
English Summary
Kerala Motor Vehicles Department plans to modify the Central rule that cancels driving licences after five violations per year. The state is likely to enforce licence cancellation only after ten or more violations annually, following directions from Transport Minister K.B. Ganesh Kumar. The department has also launched public awareness programmes to curb traffic violations.
kerala-mvd-plans-ten-violations-rule-for-licence-cancellation
Kerala MVD, Driving Licence Cancellation, Motor Vehicles Act Amendment, Traffic Violations, Kerala Transport News, Road Safety, K B Ganesh Kumar
